بەرپرسێ ئەنجۆمەنێ کاروبارێن بۆلگاریا- کوردستان راگەهاند، ژبەر شەرێ داعش 10 کۆمپانیێن بۆلگاریا نەمانە ل کوردستانێ، لێ نوکە پەیوەندیێن بازرگانێن باشورێ کوردستانێ دگەل وەلاتێ بۆلگاریا گەهشتینە ئاستەکێ گەلەک باش.
ماجد حەمید مزوریماجد حەمید مزوری، بەرپرسێ ئەنجۆمەنێ کاروبارێن بۆلگاریا- کوردستان د چاڤدیتنەکا دواڕۆژدا گۆت بۆ سالا بهێت ئەم یێ هەولدەین کارئاسانیان بۆ خوەندکارێن کورد بکەین کو ل زانینگەهێن بۆلگاریا بخوینن، چنکو خواندن ل زانینگەهێن وان ژ هەرێما کوردستانێ ئەرزانترە و هەر سالەکا کۆلیژێ ب
1200 دولارێن ئەمریکیە. لدۆر پشتگیریا سیاسی ژی خوەیاکر سیاسەتمەدار و گەلێ بۆلگاریا گەلەک پشتگیریێ لسەرخوەبوونا کوردستانێ دکەن.
دواڕۆژ: هەرێما کوردستانێ دگەل وەلاتێ بۆلگاریا چ پەیوەندی هەنە؟
ماجد حەمید: پەیوەندیێن گشتی د ناڤبەرا هەرێما کوردستانێ و وەلاتێ بۆلگاریادا هەنە، پەیوەندیێن بازرگانی ژی ژ هەموویان بهێزترن و پشتی 3 سالان، نوکە ئەو پەیوەندی گەهشتینە باشترین ئاست.
دواڕۆژ: هوون چ ئاسانکارییان بۆ بازرگانان دکەن کو بشێن دناڤبەرا هەرێما کوردستانێ و بۆلگاریا دا کار بکەن؟
ماجد حەمید: دەمێ بازرگانێن هەرێما کوردستانێ دچن بۆلگاریا، یان کۆمپانیێن بۆلگاریا بخوازن سەردانا هەرێما کوردستانێ بکەن ئەم هەماهەنگیێ دناڤبەرا هەردوو ئالیان دا دروست دکەین و فیزەیان ب رەنگەکێ ب سانەهی بۆ بازرگانێن کورد وەردگرین.
دواڕۆژ: پەیوەندیێن بازرگانی دناڤبەرا بۆلگاریا و هەرێما کوردستانێ ل چ ئاستن؟
ماجد حەمید: ژبەر شەڕێ داعش ژ سالا 2014-ێ تا 2017-ێ ل ئاستێ پێدڤی نەبوون، لێ د ئەڤ سالە دا گەهشتینە باشترین ئاست.
دواڕۆژ: کورد زێدەتر چ بازرگانیێ دگەل بۆلگاریا دکەن؟
ماجد حەمید: بازرگانێن کورد گەلەک بازرگانیا جگاران و کۆزماتیکێ دکەن، هەموو کۆمپانیێن کۆزماتیکێ یێن بۆلگاریا نوونەرێن خوە ل هەرێما کوردستانێ و ئیراقێ هەنە.
دواڕۆژ: بۆچی گەلەک داخوازی لسەر کۆزماتیکا بۆلگاری هەیە؟
ماجد حەمید: بەرهەمێن بۆلگاریا ب کۆالێتیا بەرهەمێن ئوروپیە، چنکو د ئێکەتیا ئوروپا دایە، د هەمان دەم دا بهایێ کەلوپەلێن وان ئەرزانن، چنکو هەق دەست و باج بۆ کۆمپانیێن بۆلگاریا گەلەک کێمە.
دواڕۆژ: بازرگانێن کورد بتنێ وان دوو جورێن بازرگانیان دکەن یان زێدەتر؟
ماجد حەمید: بازرگانێن کورد گەلەک ماددەیێن خوارنێ و شریناهیان و بسکۆیتان و گۆزان و دەرمانێن ساخلەمیێ دئینین کوردستانێ.
دواڕۆژ: کۆمپانی و بازرگانێن بۆلگاریا چاوان رەفتارێ دگەل کوردان دکەن؟
ماجد حەمید: بۆلگاریان رەفتارەکا گەلەک باش دگەل کوردان هەیە، چنکو مە پەیوەندی دگەل ژۆرا بازرگانیا بۆلگاریا هەنە، ئەو کۆمپانیێن باش نیشا بازرگانێن کورد ددەن و ل گۆرەی رێککەڤتنەکا دناڤبەرا مەدا، ژۆرا بازرگانیا بۆلگاریا ناهێلیت چو کۆمپانیێن وەلاتێ وان غەدرێ ل بازرگانێن کورد بکەن.
دواڕۆژ: بازرگانێن کورد چەند ژ کۆمپانی و بازرگانیا ل وەلاتێ بۆلگاریا درازی نە؟
ماجد حەمید: گەلەک درازینە، تا نوکە چو ئاریشە بۆ وان چێنەبووینە.
دواڕۆژ: تا نوکە رێککەڤتنەکا بازرگانی و لهەڤگەهشتێ دناڤبەرا هەرێما کوردستانێ و بۆلگاریادا هاتیە کرن دا کۆمپانیێن بۆلگاریا ل کوردستانێ وەبەرهێنانێ بکەن؟
ماجد حەمید: بەلێ، دناڤبەرا پارێزگەها دهۆک و پارێزگەها دیمۆکگرادە یابۆلگاریا پرۆتۆکۆلەک هەیە و پرۆتۆکۆلەک دناڤبەرا پارێزگەها ڤارنە یا گەشتیاری و سلێمانیێ دا هەیە، چەندین پرۆتۆکۆلێن دی یێن ژۆرێن بازرگانیێن دهۆک سلێمانیێ دگەل وەلاتێ بۆلگاریا هەنە.
دواڕۆژ: بۆچی ژ ئەنجامێ وان هەموو پرۆتۆکۆلێن هەیی تا نوکە چو کۆمپانیێن بۆلگاریا ل هەرێما کوردستانێ وەبەرهێنان نەکریە؟
ماجد حەمید: 10 کۆمپانیێن بۆلگاری ل هەرێما کوردستانێ ناڤێن خوە ل وەزارەتا بازرگانی و پیشازی تۆمارکربوون، لێ پشتی هاتنا هێرشێن داعش بۆ سەر هەرێما کوردستانێ، ئەوان بڕیاردان چ کاران نەکەن، لێ نوکە ئەم یێ هەولدەین جارەکادی ئەو کۆمپانی کاربکەن.
دواڕۆژ: پەیوەندیێن کلتۆری و رەوشەنبیری و هونەری دگەل بۆلگاریا ل چ ئاستن؟
ماجد حەمید: ب راستی پەیوەندیەکا باش د ناڤبەرا هەرێما کوردستانێ و بۆلگاریادا هەبوو، سالا 2014-ێ، گرێبەستەک د ناڤبەرا رێڤەبەریا گشتی یا رەوشەنبیری و هونەری یا هەولێر و باژارێ خاسکۆف یێ بۆلگاریا هاتبوو ئیمزاکرن و ئەم شیاین ئورکێسترا هەولێر و سلێمانیێ و کۆمەکا سەمایا کوردی ببەین وەلاتێ بۆلگاریا، لێ ئەو پەیوەندی ل 2 سالێن دەربازبووی لاوازبووینە.
دواڕۆژ: ئەرێ هەوە چ هاریکاری بۆ قوتابیێن کورد کرینە کو ل زانینگەهێن بۆلگاریا بخوینن؟
ماجد حەمید: نوکە بتنێ نێزیکی 11 قوتابیێن کورد ل زانینگەهێن بۆلگاریا دخوینن، لێ ئەم نوکە هەول ددەین دگەل زانینگەهەکا بۆلگاری رێککەڤتنەکێ بۆ وەرگرتنا قۆتابیێن کورد ئیمزا بکەین، لێ نوکە نەشێین ناڤێ وێ زانینگەهێ بێژین، ل زانینگەهێن بۆلگاریا خواندنا ل کۆلیژان بۆ ئێک سال
1500 دولارێن ئەمریکی نە، قستێن وان یێن ماستەرێ ژی گەلەک ئەرزانن، ژ کوردستانێ ئەرزانترن.
دواڕۆژ: ئەرێ پەنابەرێن کورد ل وەلاتێ بۆلگاریا هەنە و ئەگەر هەبن رەوشا وان چاوایە؟
ماجد حەمید: رێژەکا کێم یا کوردان ل کەمپێن بۆلگاریا هەنە، خەلکێ مووسل زێدەتر ل وان کەمپانە.
دواڕۆژ: مە زانیاری هەبوون چەندین گرۆپان ل سالێن دەربازبووی هێرش دکرنە سەر پەنابەرێن کورد ل کەمپێن بۆلگاریا، ئەو چ گرۆپ بوون و بۆچی هێرش دکرن؟
ماجد حەمید: کەسێن هێرش دکرنە سەر پەنابەران نە بۆلگاری بوون، چنکو بۆلگاری گەلەک دباشن، یێن ئەو هێرش دکرن ئەڤغانی و پاکستانی و ئیرانی و ترک بوون.
دواڕۆژ: بۆچی تە پەسنا مللەتێ بۆلگاریا کر و باش دانە ناسکرن؟
ماجد حەمید مزووری: چنکو ئەڤە چەندین سالە ئەز دچم وی وەلاتی من خرابی ژ وان نەدیتیە و گوه لێنەبوویە.
دواڕۆژ: هەلوەستێ سیاسی یێ وەلاتێ بۆلگاریا بەرامبەر کوردان چاوایە؟
ماجد حەمید: هەلوەستێ سیاسی یێ بۆلگاریا بەرامبەر کوردان گەلەک باشە و بۆلگاریا ژوان وەلاتانە یێن پشتەڤانیا سەرخوەبوونا کوردان دکەن.
دواڕۆژ: بۆچی بۆلگاریان هەلوەستەک باش بەرامبەر کوردان هەیە؟
ماجد حەمید: چنکو زمان و کلتورێ کوردان و بۆلگاریان گەلەک نێزیکی ئێکە، و نێزیکی 200 پەیڤێن کوردی و بۆلگاری نێزیکی ئێکن، جلوبەرگ و ستران و موزیکێن کوردان و بۆلگاریان گەلەک بسەر هەڤ دچن.
دواڕۆژ: پەیوەندیێن گەشتیاری ل چ ئاستن؟
ماجد حەمید: پەیوەندیێن، مەی یێن گشەتیاری دگەل وەلاتێن بۆلگاریا بەردەوامن، ڤێ مەهێ ژی گرۆپێن گەشتیاری یێن کوردان سەرەدانا بۆلگاریا کربوون وەک سەرەدانا گرۆپێن نوژداران.
دواڕۆژ: ژمارا کوردان ل بۆلگاریا چەندە و ل کیژ باژاری زێدەتر دژین؟
ماجد حەمید: نێزیکی 200 کوردێن باشورێ کوردستانێ ل بۆلگاریا دژین و پتریا وان ل باژارێ سوفیانە.
ماڵپەرا دواڕۆژ: 07-08-2017