رێڤەبەرێ ڤێتەرنەریێ ل پارێزگەها #دهۆک# دیارکر کو؛ پێشبینی دهێتەکرن بۆ ئەڤ سالە ل سنۆرێ پارێزگەها دهۆک نێزیکی 8000 سەرێن پەزی بهێنە سەرژێکرن کو ئەڤ رێژە بەراورد دگەل دوو سالێن کێم بوویە و تیمەکێ تایبەتێ ڤێتەرنەریێ هەژمارا وێ یا تێلەفونێ ب رێکا دەزگەهێن راگەهاندنێ دێ لبەر دەستێ هەموو وەلاتییان بیت بۆ هندێ بەری قوربانیکرنێ ژ ساخلەمییا ئاژەلێ خۆ پشتراست ببن، ژلایێ خۆڤە رێڤەبەرێ سامانێ ئاژەلی ل دهۆک دا دیارکر کو ب رەزامەندییا وەزارەتێ مەهانە هەتا 5000 سەرێن ئاژەلی ژ دەرڤە دهێنە ناڤ بازاڕێن هەرێمێ دا.
د. دیار تەیب رێڤەبەرێ ڤێتەرنەریسێ ل پارێزگەها دهۆک بۆ دواڕۆژ رۆهنکر کو؛ هەر چار سەرژێگەهێن بەردەرەش، شێلادزێ، زاخۆ و ئاکرێ ب هەماهەنگی دگەل رێڤەبەرییا ڤێتەرنەریێ ل هەر چار رۆژێن جەژنێ دێ ڤەکری بن و هەر وەلاتییەکێ حەز هەبیت دشێت ئاژەلێ خۆ ببەتە وان جهان و سەرژێکەت و ل مەیدانێن ئاژەلی ب تایبەت سێمێل و دلێبێ کو سەرەکینە ب هەماهەنگی دگەل کۆمپانییەکێ کەرتێ تایبەت هەر ئاژەلەکێ ل وێرێ بهێتە کڕین دێ بۆ سەرژێگەهێن تایبەت هێنە ڤەگوهاستن و کەسانێن بسپۆر ب سەرژێکرنێ دێ کارێ خۆ ئەنجامدەن و نۆژدارێن ڤێتەرنەریێ ژی بۆ کونترۆلکرن و پشتراستبوون ژ ساخلەمییا ئاژەلی ل وێ سەرژێگەهێ دبەرهەڤن.
رێڤەبەرێ ڤێتەرنەریێ ل پارێزگەها دهۆک خویاکر کو؛ ب هەماهەنگی دگەل پۆلیس و دەڤەردارییا سێمێلێ تیمەکێ تایبەتێ ڤێتەرنەریێ ب بەردەامی دێ ل مەیدانێن پەزی بەرهەڤ بن بۆ هندێ دووڤچۆنێ وان کەسان بکەن یێن کارێ سەرژێکرنا ئاژەلی کەن، کا ئایا ئەون یێن کو ژلایێ ڤێتەرنەریێ ڤە مۆلەتا کاری بۆ رۆژانێن جەژنێ پێ هاتینەدان یان نە‌و؟ ئەڤە ژی ب مەرەما رێکخستنا کارێ سەرژێکرنا ئاژەلییە بۆ هندێ تووشی چ کێشەیێن ساخلەمیێ نەبین.
د. دیار تەیب ئاماژەکر کو؛ ل سالا 2015ێ نێزیکی 1000 قوربانی ل سنۆرێ پارێزگەها دهۆک هاتینەدان و ل سالا 2016ێ ژی 8 هزار و پێشبینی دهێتەکرن کو ئەڤ سالە ژی ئه و هەژمارە هەر 8000 بمینیت چونکو رەوشا داراییا وەلاتییان باش نینە و قەیرانێ کاریگەرییا خۆ لسەر رێژەیا قوربانیدانێ هەبوویە، لێ ئەڤ هەژمارا دهێتە دیارکرن هوور نینە چونکو گەلەک قوربانی ل مالان و پڕۆژەیێن پەزی ل نێزیک گوندان دهێنە سەرژێکرن و چێدبیت ڤێتەرنەریێ ئاگەه ژێ نەبیت.
ناڤبۆری ئاماژەکر کو؛ سەبارەت گولکان پترییا وان یێن دهێنە سەرژێکرن یێن دەرڤەنە و بەرخ ژی ب وی رەنگی یە، لێ پەزێ دهێتە سەرژێکرن پترییا وێ ناڤخۆیە و لێ بەشەک ژ دەرڤە وەکو سووریێ و ئیرانێ دهێت.
دەشتی مەمێ رێڤەبەرێ سامانێ ئاژەلی سەر ب رێڤەبەرییا گشتییا چاندنێ ل پارێزگەها دهۆک بۆ دواڕۆژ دیارکر کو؛ نێزیکی 46 مۆلەتێن پڕۆژەیێن پەز و چێلان ل سنۆرێ پارێزگەها دهۆک هەنە کو ب فەرمی مۆلەت وەرگرتینە، لێ قەیرانێ کاریگەرییەکا خراب لسەر وان کرییە و کارێ وان ژی چ وەکو بەرهەمێن سپیاتیێ یان گوشتی کێم بوویە و ل دهۆک ژی تایبەتمەندییەک هەیە کو پترییا خودانێن پەزی ئەوێن یێن نەهاتینە تۆمارکرن و مۆلەتا فەرمی نینە.
ناڤبۆری رۆهنکر کو؛ بازرگانەک نێزیکی 6 هزار سەرێن پەزی هەنە لێ مۆلەتا فەرمی وەرنەگرتییە و ب شێوەیەکێ گەرۆک پەز و چێلێن خۆ بۆ دەڤەرێن چیا و دەشتێن کەسک دگەرینن بۆ هندێ بشێن خوارنێ بۆ دابین بکەن و ئەڤ کارە مەزاختیێن سەر وان کێم دکەت، چونکو پەیداکرنا جەهی بۆ 6 هزار ئاژەلی ب زەحمەتە و دێ بارگرانییەکێ بۆ خودانێ پڕۆژەی پەیدا کەت، بۆ نموونە ئەگەر هەر ئاژەلەک 5 کیلۆیێن جەهی بخۆت ئەڤە 30 هزار تەن و ئەڤە هەژمارەکا مەزنە و کێم بازرگان بشێن دابین بکەن.
رێڤەبەرێ سامانێ ئاژەلی ل دهۆک دیارکر کو؛ ب گۆرەی پێدڤییاتیێ حوکمەت رێکێ ددەتە بازرگانان کو ئاژەلی بیننە ناڤ هەرێمێ و ب گۆرەی پلانێ بۆ مەها هەشت هەتا 5000 سەرێن ئاژەلێ مەزن هاتینە ناڤ دهۆک دا و ژ رێنومایێن ئینانێ ژی ئەوە کو پێدڤییە ژێدەر ئانکو ئه و وەلاتێ ژێ دهێت دیار بیت و پێشتر ژلایێ وەزارەتا چاندنێ ڤە نەهاتبیتە قەدەغەکرن و پشکنینێن ساخلەمیێ دێ بۆ هێنەکرن و ب رەزامەندییا وەزارەتێ ژنوو دێ رێک بۆ هاتنا وان بۆ ناڤ بازاڕێن هەرێمێ هێتەدان.[1]
02-09-2017