دواڕۆژ، بورهان یەحیا
ئالین ئه و کچا شۆخ و شەنگ یا ئێزدی کو ئەمیرەکێ داعش ل سووریا ژبەر جوانی و بچووکییا وێ دبەتە مال و پێشکێشی هەڤژینا خۆ دکەت بۆ هندێ د کارێن مال دا هاریکارییا وێ بکەت، لێ ئه و زارۆ لبن کارێن گران زۆر ماندی دبیت و ئه و ژن ژی بەردەوام دقوتیت و دبێژیت کو کافرە، لێ ئالین دهێتە رزگارکرن و نوکە بزاڤێ دکەت وێ جەهەننەمێ ژبیرا خۆ ببەت و ژیانەکا نوو دەستپێکەت.
ناڤێ وێ ژ ئالینێ کرنە ئایە
داوود موراد خەتاری ڤەکۆلەرێ دیرۆک و جڤاکێ ئێزدییان بۆ دواڕۆژ رۆهنکر کو؛ ئالین ئەحمەد ئیبراهیم ئه و کچا ئێزدییە کو ناڤێ وێ بۆ ئایە هاتبوو گوهۆڕین و قوربانی رەفتارێن داعش ببوو، دەما ئێکەم جار دگەل ئالینێ روونشتین جلێن رەش یێن داعشان لبەربوو و زۆر ماندی و بێ هیڤی دیار دکر، لێ دەما جارا دووێ دگەل روونشتین جلێن خۆ گوهۆڕیبوون و سیمایەکێ گەشتر هەبوو و گرنژین لسەر لێڤێن وێ هەبوو، چونکو ئێدی ل جەهەننەما داعش قورتال ببوو و ناڤ کەسوکار و هەڤالێن خۆ دا دەم دبۆراندن و هیڤی بۆ پاشەرۆژێ هەبوو.
کارێن گران ل مال دکر و دهاتە قوتان
دەیکا ئالینێ ژی گۆت کو؛ دەما چەکدارەکێ داعش ب ناڤێ ئەبو موهەنەد،کچا من ئالینێ دبینیت گەلەک کەیف ب خشۆکی و جوانییا وێ دهێت و ئێکسەر بڕیارێ ددەت کو وێ بۆ هەڤژینا خۆ ببەت بۆ هندێ د کارێن مال دا هاریکارییا وێ بکەت، لێ ڤێ ژنێ زۆر کار ب ئالینێ دکرن و چونکو بەردەوام مال پێ پاقژ دکر و ئەگەر جارەکێ گازندە کربان کو ئێدی نەشێت کار بکەت و پێدڤی ب بێهنڤەدانێ یە ئێکسەر وێ ژنا داعش دا وێ قوتیت و بەردەوام ب ناڤێ کافر گازی دکرێ، رۆژانە ل سپێدەهیێن زوو دا ئالینێ ژ خه و راکەت و هەتا دبوو شەڤ کارێ پاقژیێ و کارێن دی یێن نەپێدڤی پێدکر و ب ڤی رەنگی سێ سال د وێ جەهەننەما داعش دەربازکرن و مێشکێ من ژی د ڤی دەمی دا پربو و ژ دەنگێ کەنی و گریێن ئالینێ کو بۆ دەمەکێ زۆر بوو ل پێش چاڤێن من نەمابوو لێ بەردەوام گەشبین بووم کو دێ شێم جارەکا دی وێ ببینم و ل هەمبرێزا خۆ بگرم.
ئێکەم گرنژینا وێ ئه و دەم بوو کو زانی هاتییە رزگارکرن
ئێکەم گرنژینا لسەر لێڤا ئالینێ ل رۆژا 11/7/2017ێ بوو چونکو هاتبوو رزگارکرن و ئێدی ژ وێ زۆردارییا ئەبو موهەنەد و هەڤژینا وێ قورتال ببوو و دزای کو کارێ گران و ئەشکەنجەدان ب دووماهی هات و دێ ژیانەکا نوو دەستپێکە، چونکو ئەوێن ئالین رزگارکری سۆزدابوویێ دێ ژ سووریێ بۆ هەرێما کوردستانێ بەن و دێ چیتە ناڤ کەسوکار و هەڤالێن خۆ دا.
ئالینێ زێدەتر گۆت کو؛ خێزانا من هەموو هاتینە کوشتن و بیروباوەر و نڤێژا من گوهۆڕین هەتا ناڤێ من ژئالینێ کرە ئایە و ژ زارۆیەکا ئازاد بوومە بەندەیەک د کۆچکا زالمەکێ داعش، ژ زارۆیەکا خودان باوەر بۆ زارۆیەکا کافر گوهۆڕیم و ب وی ناڤی گازی من دکر، لێ سۆپاسییا خودێ دکەم کو شیام رزگار بم و بەرەڤ بەهەشتا خۆ ل هەرێما کوردستانێ دگەل کەسوکارێن خۆ بزڤرم.[1]
07-11-2017