دواڕۆژ، رەڤەند گوھەرزی
خودانێن پڕۆژەیێن بخودانکرنا گوڵکا ل سنورێ ناحیا شێلادزێ سەر ب دەڤەرداریا ئامێدیێ گازندا ل وێ چەندێ دکەن کو بەرھەمێ پڕۆژەیێن وان ناھێنە کرین و مانە ددەستێن واندا و دیسا بھایێ کرینا ئالیک و خوارنا گۆڵکان گرانبوویە و گرتنا رێکێن ئەسمانی و خاڵێن سنووری کێشەیەکادی بۆ وان دروست کریە .
پشتی ئەڤ ئالۆزیەن چێبووی بھایێ کیلویا گوشتی یا ھاتیە خوارێ و یا ئەرزان بووی و رێڤەبەریا چاندنێ ل قەزا ئامێدیێ ژی ساڵانە پڕۆژەیەک پێشکێشی حکومەتێ دکر بۆ ھاریکاریا خودانێن ڤان پرۆژا، بەلێ ئەڤ ساڵە نەشایایە ھاریکاریا جوتیاران بکەت ب تایبەت ئەوێن پڕۆژەیێن بخودانکرنا گۆڵکا ھەی.
شکری علی، خودانێ پرۆژەیێ بخودانکرنا گوڵکا ل ناحیا شێلادزێ بۆ دواڕۆژ راگەھاند: بەری نوکە گوڵکا ل وەڵاتی جۆرجیا و ھندێ وبەرازیلێ ب رێکا باخیرێ و باڵەفڕان دھاتن، بەلێ بازار نۆکە وەکی خۆ نەمایە، یێ راوەستیای، گرتنا دەروازێن سنووری و ھێلێن ئەسمانی و باڵەفڕخانەیان کاریگەریەکا مەزن یا کریە شەر خودانێن پرۆژێن ب خودانکرنا گوڵکا .
پشتی ئالۆزیێن ڤێ دوماھیێ ل دەڤەرێ پەیدابووی ئارێشە بۆ خودانێن پڕۆژەیێن بخودانکرنا گۆڵکا چێبوون و ل گور گۆتنا وان زرارێن ماددی گەھشتنە وان، ل دور ڤێ یەکێ شکری گۆت، نۆکە وەکی جاران گوڵک داخلی کوردستانێ نابن، وەکی جارانژی خەڵکی گوڵکا ناکرن ژبەر کو گرنتی نینە، ژبەر ڤان ئالۆزیێن ڤێ دوماھیێ چێبووین بۆ خەڵکی بوو جھێ دڵگیرانی و ترسێ.
نۆکە دپرۆژی مندا 50 بۆ 100 سەرێن گوڵکا یێت ھەین، دابخودان کەم حەفت بۆ ھەشت ھەیڤا ئیدارامن ژێدھات، نۆکە ئەو نەمایە ، ئەگەر نۆکە بێژیە گۆشت فرۆشی وەرە بکرە دێ بێژیت بازار نینە، چونکی بەری نۆکە ئەگەر گۆشت فرۆشان رۆژانە دوو ئاژەل سەرژێکربان و فرۆتبان نۆکە ھەر دوو سێ رۆژا ئێکێ سەرژێدکەن گۆشت وەکی جارا ناھێتە فرۆتن .
ل گۆر گۆتنا شکری، بەری نۆکە ئالیکا گوڵکا ل تورکیا و ئیرانێ دھات، ھەتا دگەھشتە بەردەستی خودانێ پرۆژەی تەن ب 250 ھەزار دینارا دھاتە کرین، نۆکە بھایێ تەنا ئالیکی یابوویە 370 ھەزار دینار، ئەڤە ژی ژبرە وێ ترسێ یە ئەوال دەف خەڵکی دروستبووی .
ھەتا 150 پڕۆژەیێن بخودانکرنا ئاژەلان یێن ھەین
شکری گۆت : ل سنوورێ ناحیا شێلادزێ سەر ب قەزا ئامێدیێ ل رۆژھەڵاتا پارێزگەھا دھۆکێ نزیکێ ھەتا 150 پڕۆژێن بخودانکرنا گوڵکا یێت ھەین و ھەر ئێک ژوان پڕۆژەیان 80 ھەتا 100 گوڵکا دێ ب خودانکەت ، نۆکە دڤان پڕۆژەیاندا نزیکی 8000 ھەشت ھەزار گۆڵک دھێتە بخودانکرن .
گۆشت فڕۆشەک بناڤێ غازی محسن، ل گۆشت فڕۆشیا شێلادزێ بۆ دواڕۆژ راگەھاند: رەشا نۆکە یا ھەرێما کوردتانێ و دەڤەرێ کارتێکرنا ل خەڵکی کر، ب تایبەت وی خەڵکێ گوڵکا بخودان دکەن، ئەڤە بۆماوێ ھەشت بۆ نەھ ھەیڤانە خودانێن پڕۆژەیان گۆڵکا بخودان دکەن و یێت قەلەوبووی و نۆکە یێت ھاتینە فڕۆتنێ ئەڤ بازارە ھۆلێ ھاتەھە، گوڵکێن مە ناچنە ژدەرڤە رێک ھەمی ھاتن گرتن ب تەنێ یێب ھیڤیا گۆشت فڕۆشاڤە .
گۆشت فڕۆشان بەری نۆکە رۆژێ دوو بۆ سێ گۆڵک سەرژێدکرن، نۆکی ھەر سێ بۆ چوار رۆژانە ئێکی سەرژێدکەن، خودانێ پڕۆژەی ما راوەستای نزانیت چ بکەت و خوسارەت بی و ئالیک ژی ھەر یا گران دبیت، ئەگەر حکومەتێ ھاریکاریان خودانێن پڕۆژان کربا بەلکی گەلەک زرار نەگەھشتبانێ، بەری نۆکە تەلیسێ ئاری ب 11 یازدە ھەزار دینارا بوو نۆکە ب 16 و 17 ھەزار دینارایە، ھەتا 20 ھەزار دینارا ژی ھندەکا بۆ گوڵکێن خوە یێ کری.
پشتی ئەڤ ئارێشە ھاتینە پێش بھایێ کیلویا گوشتی یا ھاتیە خوارێ و یا ئەرزان بووی، بەری نۆکە مە کیلویا گوشتی ب 15 پازدە ھەزار دینارا دفڕۆت، ب ھەسڤیە مە داب 12 دوازدە ھەزار دینارا، نۆکە مە بھایێ گشتیش نەرمە یێ کریە 13 بۆ 14 ھەزارا بەلێ نە ل سەر ھەزارەکێ کێم و زێدەیە خەڵک ناکرین بابەت نە ھەزارەکە .
ژبەر دروسبوونا قەیرانا دارایی ل ھەرێما کوردستانێ، رێڤەبەریا چاندنێ ل قەزا ئامێدیێ نەشایایە ھاریکاریا جوتیاران بکەت ب تایبەت ئەوێن پڕۆژەیێن بخودانکرنا گۆڵکا ھەی، ل گۆر گۆتنا رێڤەبەرێ چاندنێ ل قەزا ئامێدیێ وان ساڵانە پڕۆژەیەک پێشکێشی حکومەتێ دکر بۆ ھاریکاریا خودانێن ڤان پرۆژا.
ھەکار حەمید رەشید، رێڤەبەرێ چاندنێ ل قەزا ئامێدیێ بۆ دواڕۆژ راگەھاند:ب تەنێ چوار پێنج پڕۆژەیێن بخودانکرنا گۆڵکا یێن فەرمی ل دەڤەرێ یێن ھەیین کو دەستیریا بۆ ھاتیەدان، ساڵانە مە بەرنامە ھەبوو دەمێ میزانیە و پارە ھەی ل دیف شیانێن حکومەتێ مە پڕۆژەک پێشکێش دکر ھاریکاریا وان دھاتەکرن بۆ دابینکرنا ئالیکا گۆڵکا، بەلێ پشتی ئەڤ قەیرانا دارایی چێبووی ئەف ساڵ ژی مە پێشکێش کر موافقە ل سەر نەھاتە کرن و جارێ پارە نین دا ھاریکا وان بھێتە کرن .
ئەگەر پارە ھەبیت ھەمی تشت یێ ھەی
رێڤەبەری چاندنێ گۆت تشت ب پارەی دھێتەکرن، ئەگەر پارە ھەبیت ھەمی تشت یێ ھەی، پارە یێ کێم بووی دبازاریدا، ئەز بەری چەند رۆژا ل دەف گۆشت فڕۆشەکێ بووم گۆتی ئەو ھەفتیێ ئێک دوو گۆڵکا سەرژێناکەین، خەڵکێ پارە نینە گۆشتی بکریت، ئەگەر خەڵکێ پارەن نەبن بکریت و گۆشت فڕۆشی ژی پارە نەبین یێ خودانێ پڕۆژەی دێ مینیتە دەستێ ویدا دڤێت دەروازە بھێنە ڤەکرن دابچیتە دەرڤە .
ھەکار دیار کر کو، ئەوێ پڕۆژێ بخودارنکرنا گوڵکا ب رێڤە دبیەت دڤێت ھزرا خۆ دگەلەک تشتادا بکەت، ھەر باب و باپێرێن مە ژی ئەڤ شولە دکر، دەمێ ئاژەل بخوداندکرن ھزار خوارنا وانژی دکرن، ب ھیڤیا حکومەتێ ڤە نەدھیلا، دبیت حکومەت ساڵێ جارەکێ دێ ھاریکاریاوی کەت پشتی ھنگی دێ خودانێ وی پڕۆژەی چ کەت ئەگەر ئالیکا ئاژەلێن وی نەما.[1]
10-11-2017