عزەت یوسف
پەقیشکێن ئاڤێ چیرۆکەکا نە کورت نە درێژە، یا تژی رامان، تێدا دەستێ دەستهەلێ رەشێ بێبەختیێ یێ بلندە، ژ نڤێسینا (جەعفەر مایی)، ل سەر سێزدە دیمەنان هاتیە کەلاژتن. چیرۆکەک ب کورتی و پوختی دبێژتە تە هەر تشتێ بچینی دێ وی هەلینی. موڕالا چیرۆکێ، ب شێوەیەکی یان ئێکا دی ژ دەڤەرەکێ بۆ دەڤەرەکا دی ب ئاوایەکێ جودا جودا د ناڤ باب و باپیران دا هاتیە گۆتن و ڤەگێران، ب ناڤێ بارانا ب سەر کولاڤک یان شاهدەییا پۆڕێ…
سێ کاراکتەر پتر رۆلێ خوە د ڤێ چیرۆکێ دا دگێڕن، ئه و ژی (سەگڤان و بنەفش و شێرۆ). چیرۆک ب پەیڤ و دەربڕینێن جوان و ب زمانەکێ رەوان و دیمەنێن شەپال هاتیە خەملاندن کو خاندەڤانی رادکێشیت بێ ناڤبر بخوینیت و دبەر ڕا ژی سەرێ خوە ب هەژینیت، هەروەکی ل پێشگۆتنا وێ دا دهێتە گۆتن (شێوازێ وێ خزمەتەکا ب وەج و خۆش ددەتە خاندەڤانی).
سەگڤان ب ژار و ژیری رابوویە، کارێ ب زەحمەتێ ژیانا گوندەواری کریە، بابێ وی یێ دەست نە خوەش و هەردەم تووڕە بوو. بابێ سەگڤانی دایکا وی رەڤاندیە و هەردو مال ل سەر چەند خالەکێن خێلەکی ئاشتەوایی کریە، کو دایکا وی ئێک ژ قوربانیێن ئەڤێ پێکهاتن و ئاشتبوونێ بوویە. سەگڤان ل سەر ئەڤێ ژینگەها گونداتیێ و هەژاریێ شیایە بەردەوامیێ بدەتە خاندنا خوە هەتا پەیمانگەهێ ب دوماهی دئینیت.
سەگڤان، ئێکلایەنە حەز ژ کچا مەزنەکێ گوندێ خوە ب ناڤێ بنەفش دکەت، رۆژەکێ ب رێکەفت رێکا وان تێکتشقلی، سەگڤانی ڤیانا دلێ خوە مینا تەڕکێ بۆ داڕێت و داخوازا هەڤژینیێ ژێ دکەت، لێ بنەڤش تشتەکی ئەرێنێ و دلخوەشکەر د لەپا ڕا ناکەت..
رۆژ و مەه دەرباس دبن، بنەفش شوی ب گەنجەکێ مرۆڤێن خوە ل گوندی ب ناڤێ شێرۆ دکەت. رۆژا داوەتێ سەگڤان پشکدار دبیت و ب دلخوەشی داوەتێ دکەت و دکەڤیتە چەپا، لێ یا د دلێ وی دا تشتەکێ دی بوو.
شوی کرنا بنەفشێ بۆ داخەک و کەتە بن پەڕاسیێن سەگڤانی، هندی دهاتە خوە نەدشیا شویکرنا وێ قەبوول بکەت، بەلێ کەسێ پێ نەدزانی و وی ژی خوە پێ نە دئینادەر، بەروڤاژی پەیوەندیێن وی گەلەک د خوەش بوون ل گەل شێرۆی و بابێ وی و مالا وان و مالا بابێ بنەفشێ ژی. سەگڤانی خوەش خوەش سەرەدانا وان دکر و د چوو نک وان ب گوندی ڤە، وان ژی زێدە رێز لێ دگرت. سەگڤان ل ڤێری ژی رانەوەستیا، پشتی دەهێ شەڤێ دچوو بەر پەنجەرەیا بنەفش و مێرێ وێ تێدا دنڤستن و ب دزی ڤە گوهێ خوە ددا دەنگێ وان، گوهداریا ئاریان و ئازراندنا وان یا سێکسی دکر، سەگڤان دکەتە ئەوێ هزرێ کو هەر وەکی ئەوە ل سەر سینگێ بنەفشێ کەیفێ دکەت.
هەمی گاڤا ئاخفتنا بابێ سەگڤانی دهاتە گوها دەمێ دگۆت: (ئه و تشتێ مرۆڤی بڤێت، دڤێت ب دەستخوەڤە بینیت، ئەگەر ب خوەشی بیت باشە، ئەگەر نە؛ نەخوەشی هیڤیا دکەت. من دایکا سەگڤانی ڤیا وێ حەز نەکر، بابێ وێ ژی حەز نەکر، ئینا من ب زۆری رەڤاند).
هەیامەک درێژ بۆری، هەمی تشت ئاسایی، هەتا خودێ زارۆکەک ژی دا بنەفشێ. رۆژەکێ بایەک بەر گوهێن سەگڤانی کەفت، کو شێرۆ دگەل هندەک هەڤالێن خوە دێ چنە راڤا کویڤیان. ئەڤێ گۆتگوتکێ هندەک هزر د سەری وی دا ئازراندن.. ئەوێ شەڤێ چوو مالا شێرۆی وان ب گوندی ڤە کو ل گەل دەیبابێن خوە دژیا، پشتی ب خێرهاتنێ و چا ڤەخوارنێ سوحبەت هاتە سەر راڤ و نێچیرێ. شێرۆی گۆتە سەگڤانی سوباهی ئەم دێ چینە راڤێ ل چیایەکێ نێزیکی گوندێ مالخالێن من، تو ژی ل گەل مە وەرە، سەگڤانی گۆت ئەز چ ژ راڤێ نزانم و من تڤەنگ ژی نینە، شێرۆی گۆتێ تە خەم نەبیت ئەڤە تڤەنگا من تو بینە و ئەز دێ یا بابێ خوە ئینم.
رۆژا پاشتر چار گەنج ژ گوندی بۆ راڤێ چوونە گوندێ خالێ شێرۆی و وێ شەڤێ ل مالا وان ب خوەشی شەڤبێریا خوە کرن، رۆژا پاشتر ل گەل کوڕ خالێ خوە کو ل وان چیا یێ شارەزا بوو، هەر پێنجا بۆ چیای دانە رێ. گەهشتنە چیای و جهێن ئاسێ، شەڤا ئێکێ دەرباس کرن و گیسکەک کوشتن و ب دلێ خوە هەتا سپێدێ خوارن.
رۆژا دوێ، کو نەرمە بارانەک باری بوو، ئاسمان هەمی مژ بوو، کارێ خوە دابەش کرن و هەر ئێک بۆ سەمتەکی و ئاراستەکێ جودا هاتە دانان. شیرۆی گۆت ئەز دێ چمە ئەڤێ سەرەکەڤرا ژۆری، هەڤالان گۆتنێ نەچە هەمی کەڤرێن حلیلوکن بارانا لێهاتی دێ تێدا فڕی، ئەوی رژدی کر و ب یا خوە کر. سەگڤان ژی دێ ل بەر تشتا مینیت، هەڤالان هەر ئێک بۆ جهێ خوە یێ دەستنیشانکری دانە رێ. شێرۆ وەختەکی چوو و ڤەگەریا ڤە چەقۆیا خوە ژبیر کربوو، سەگڤانی گۆتێ راستێ برا ئەز ژی دێ ل گەل تە هێم. ل وان سرت و رزدا سەرکەتن و سەرکەتن، هەمی مەترسی بوو، ژ ڤێ رزدێ بۆ رزدا دی، ژ ڤی کەڤری بۆ یێ دی هەتا گەهشتینە بانیەکێ و بێهنا خوە ڤەدان. خیالێن سەگڤانی خەلەت بوون و گەهشتنا بنەفشێ د سەری دا غولغولی، دەست ب بێخەتیا خوە کر. هندی ژی هاتی قۆنتاخەکا تڤەنگێ داوەشاندنە سەروچاڤێن شێرۆی، پاشی ئێکا دی و ئێکا دی، شێرۆ کەت و دخوینێ وەربوو، شیرۆی خوە ب دەلنگێن وی ڤە گرت و گۆتێ تە خێرە مالخراب ما تو شێت بووی؟! سەگڤانی گۆتێ ئەز شێت نەبوویمە، ناڤێ بنەفشێ ژ دەڤی دەرکەت، شێرۆی گۆتێ بنەفش هەڤژینا منە و چ ل گەل تە نینە.! نە هەرێ هێشتا لێ راستیا، شێرۆی گۆتێ من نەکوژە، ئەوی گۆتێ دێ هەر تە کوژم و کەس نزانیت و دێ گەهمە مرادا خوە بنەفشێ، شێرۆی گۆتێ کریارا تە بەرزە نابیت هەکە خوە پەقیشکێن ئاڤێ شاهدەیی ل سەر تە داینە دێ هەر کەڤیێ! لێ سەگڤانی ب یا خوە کر و لنگێ وی گرت و لێک وەربادا و د رزدە کەڤرەکی دا هاڤێتە خارێ و بۆ خوە گۆت دێ هەرە بلا پەقیشکێن ئاڤێ شاهدەییێ ل سەر من بدەن.
سەگڤان زوی زڤری و هاتە جهێ بهێنڤەدانێ، پاشی یێن دی ئێک ئێکە هاتن، خوارنا خوە حازر کرن و مان ل ژڤانێ شێرۆی، نە هەرێ شێرۆ دیار نەبوو،. هەڤالەکێ وان دویڤ ڕا چوو و تەرمێ شێرۆی دیت کو یێ دکەڤرەکی دا فڕی، دا پشتا خوە و گەهاندە هەڤالێن خوە. هەمی زێدە خەمگین بوون و نێچیرا وان لێ بۆ ژەهر. هێدی هێدی تەرمێ شێرۆی ژ چیای ئینانە خار و ئێڤارەکا درەنگ گەهاندنە گوندێ خالێ وی. مەلەی گۆت ئاخا وی یا کەتیە ڤێرە باشترە ل ڤێرە ڤەشێرن، لێ سەگڤان رازی نەبوو، تەرمێ وی گەهاندە گوندێ وی و هاتە ڤەشارتن و تازی هاتە دانان و تەواو بوو، هەمی خەلکێ گوندی ب مالا بابێ شێرۆی و خەزیرێ وی ژی پەسنا رۆلێ جامێرێ سەگڤانی کرن.
نیڤ سال ب سەر مرنا شێرۆی دا دەرباز بوو، خەم ڤەڕەڤی. هەر تشت د ژیانا بنەفشێ و مالباتا وێ دا ئاسایی بوو. دیسا دایکا سەگڤانی هایدانا خوە دەست پێکر دا سەگڤان ژنەکێ بۆ خوە بینیت. سەگڤان بەرنەهات، دوماهیک جار گۆتێ بەسە دێ ژنێ بینە، ئەوی ئەڤ جارە گۆتە دایکا خوە بلا دادێ ئەز ئێدی دلێ‌َ تە ناهێلم، بەس یا من ڤیا دێ بۆ من ئینی، دایکێ گۆتێ بلا. شێرۆی گۆتێ دایکێ بۆ من بنەفشێ بخوازە! دایک ما حێبەتی! بنەفشا چ حالێ چ! بنەفش بیژنە و زارۆکەکێ هەی، تە کیژ کچ بڤێت دێ بۆ تە خوازم بەس بنەفش نەبیت! نە هەرێ شێرۆی رژدی کر، دایکێ گۆتێ ئەڤە هەمی شەش مەهەکن زەلامێ بنەفشێ یێ مری چەوا دێ بێژینی؟ سەگڤانی گۆتێ ب کەیفا تەیە یان بنەفش یان من ژن نەڤێت.
ب هەر رەوش دایکا شێرۆی خوە گەهاندە دایکا بنەفشێ، دایکا بنەفشێ ل گەل مێرێ خوە ئاخفت. ئەوی ئێکسەر پشتگیریا خوە بۆ ڤی بابەتی دەربڕی و گۆت ئەز دێ بێژمە خەزیرێ وێ ژی، وەسا خەزیر ژی رازی بوو و گۆت سەگڤان وەکی کوڕێ مەیە و گەلەک زەحمەت ب تەرمێ شێرۆیێ رەحمەتی ڤە یێ بری و مرۆڤەکێ باشە و کەسەکێ جامێرە. دەمەکێ درێژ پێ نەچوو، بنەفش رازی بوو شوی ب سەگڤانی بکەت و وەکر.
پازدە قوتە سال د سەر شویکرنا بنەفشێ دا بۆرین، ژیانەکا خوەشی و هەژی، سێ جاران ژ مێرێ خوە سەگڤانی ب زک کەفت، چیرۆکا شێرۆی ژی کەڤن بوو و هاتە ژبیر کرن.
ئێڤارەکێ ل بەرسڤکێ، سەگڤان یێ ژ پێرڤە راوەستیای بوو، پالێ خوە دابوو ستوینەکێ. بارانەکا خوەش دباری، دلۆپ ژ بانی ب ئەردی دکەتن و دبوونە پەقیشک، بیرا شێرۆی هاتە بیری و جارجار د بشکوڕی و دگڕنژی. بنەفشێ ل بەر کوچکی شیڤ دلێنا، دیت مێرێ وێ یێ د بشکوڕیت، حەزەک ل نک پەیدا بوو بشکوڕینا مێرێ خوە بزانیت. گۆتێ ئەی لاوێ من تو ب چ د بشکوڕی؟ گۆتێ چنە تەنێ دالغەک بوو، چ دالغە؟ ئاخفتنەک ل ڤێرێ و ئێک ل وێراهە بنەفشێ گۆتێ ئەگەر تو بۆ من نەبێژی ئەڤ شەڤە تو ل نک من نانڤی، شێرۆی گۆتێ ما چ بۆ تە بێژم بنەفشا من! ئەز ب پەقیشکێن ئاڤێ د پشکوڕیم، حال و مەسەلێن من و شێرۆی ئەڤەنە؟!
ئەوێ شەڤێ بنەفش نە نڤست و نەهێلا مێرێ وێ ژی نێزیکێ وێ ببیت. پشتی بانگێ سپێدێ بنەفشێ مالا بابێ خوە و مالا بابێ شێرۆی پێحەساندن، ل گەل ئەلندا سپێدێ پۆلیس هاتن و سەگڤانێ بێ وژدان وەرپێچان و برن و ئێدی کەسێ سەگڤان نەدیت!!
[1]