نیهادسەعدوالله/2022
پەرتووکا 4 وچل چرا یاهەلبەستڤانان(خورشید پیرومەری و سۆزا)ێ ل سالا(2021) ێ هاتیە چاپکرن وبەلاڤکرن ب قەبارێ ناڤین، کو ژ (110) لاپەران پێک دهێت، ل پەرتووکخانەیەکا تەهران ل وەلاتێ ئیرانێ هاتیە چاپکرن، پێشەکیا وێ ژلایێ نڤیسەر و رەوشەنبیر و میدیاکارێ باژێرێ دهوکێ بەرێز (حەسەن فەتاح)ی ڤە هاتیە نڤیسین. هێژایێ نڤیسەر دپێشەکیێ دا ئاماژە ب ناڤەرۆکا پەرتووکێ دایە، بەحسێ نڤسینا هەردو هەلبەستڤانان کرییە وب شێوەیەکێ گەلەکێ تازە و جوان پەسنا هەردو هەلبەستڤانان کریە و شیانێن وان یێن دانە بەر ئێکییا پەیڤ و بڕگ و ڕستان بێ کو ئه و ل گەل ئێک بروینن و هەلبەستان بنڤیسن و نە ژی ل ئێک تەمەنن کو بێژین هزرێن وان نێزیکێ ئێکن لێ؛ دسەربۆرێن وان دا دڤێ پەرتووکێ و یێن بەرێ وێ هاتینە چاپکرن ژلایێ وان ڤە، هەردوکا هۆسا وەکی سترانبێژێن فولکلۆری پەیڤ هاڤیتینە بەر ئێک دێ بیژێ ئەڤە هەردو ئێک کەسن و ژیانا خوە هەمی یا ل گەل ئێک بۆراندین وەک نڤیسین و ژیانا خوە یاسادە، هەر وەسا راستە ب دو ناڤان ئەڤ هەلبەستە هاتینە نڤیسین بەلێ؛ دەمێ دخوینی دێ بێژی هەردو ئێک کەسن ب دو ناڤان، ودبیت هەر ل سەر بەرگێ ڤێ پەرتووکێ هێژایێ هەلبەستڤان ناڤێ خوە ب تنێ دانا بیتە سەر بەرگێ پەرتووکێ.
هەروەسا هێژا(حەسەن فەتاح)ی نیشان ب وێ چەندێ ژی دایە، کو د پەیڤ و نڤیسینێن وان دا هۆسا دارێژتینە کو دەمێ ئاشق و ئەڤیندار وان پەیڤان دخوینن هەر ئێک دێ هۆسا هزر کەت یان خوە هەژمێریت ئەوە قارەمانێ هەر ئێک ژ هەلبەستێن وان، ئەڤە پەیڤە بەحسێ وی و قارەمانیا وی نە دهەر هەلبەستەکێ دا، ئەڤجار ئەڤ ئەڤیندارە بچویک بیت یان مەزن، کچ بیت یان کور، دوبارە دەست خوەشیێ ل هێژا (حەسەن فەتاح)ێ دکەم کو ب دلساخیا خوە ئەڤ پێشەکییە دایە نڤیسین.
پەرتووکا هەلبەستان یا بناڤێ 4 و چل چرا ئەوا هاتیە نڤیسین ژلایێ نڤیسەران کو ب ڕاستی دلساخی وڤیان و پشتەڤانیا وان، هزر و بیرێن وان گەلەک نێزیکێ ئێک بووینە و ب ڤێ رێکێ کو ئەز بێژم دمێژویا باژێرێ مە دا ئێکەم کارە ب ڤێ رێکێ وهۆسا بەرفرەه پەرتووکەک دهێتە ئامادەکرن، هەر چەندە دبیت جارجار بەحسێ هندەک خودانێن تبلێن زێرین، نڤیسەر و رەوشەنبیر و دەنگبێژ وهونەرمەندێن جۆرا و جۆر وسەرکردە و قارەمانێن ڤێ دەڤەرێ هات بیتە کرن د هندەک پەرتووک وگوڤاران دا لێ؛ نە ب ڤی شێوەی هۆسا ب تێر وتەسەل.
ئەز ل باوەرم هەردو هەلبەستڤانان زەحمەتەکا مەزن برییە تاکو شیایین کۆمەکا بژارە ژ کەسێن مە ل سەری بەحسکرین ل دەڤەرا بادینا دئێک پەرتووک دا خرڤەکەن، هەر ئێکی پەسنا وی بهێتە کرن ل دووڤ کارێ ئەنجام دای دژیانا خوە دا وهەر وەسا پەسنا وی هاتیە کرن کو ئێدێ بەرپرسایەتیا وی زێدەتر لێ کرییە، کو ڤێجا ئه و هەناسەیا ئەگەر ڤیا بکێشیت ژی بۆ نەهێلا و بەرپرسایەتیا وی زێدەتر لێ کر کو دڤێت کارێن باشتر وسەرکەفتی تر ئەنجام بدەت وبەردەوام د خەندەکا خەباتێ دا بیت، هەر وەسا ئەڤ پەرتووکە بوویە ئەگەر کو ئێدی نڤیسەر و هونەرمەند و رەوشەنبیرێن باژێرێن مە ب تایبەتی یێن گەنج پتر خوە بوەستینن دا دکارێن باشتر ئەنجام بدەن، دا کو ل کارێن بهێن کەسێن وەکی هەلبەستڤان(خورشید پیرومەری) ناڤێن وان بکەنە دپەرتووکێن خوە دا، دبیت هەر ڤێ هزرێ نەکەت ژی.
یا دی یا من ڤیایی بێژم کو گەلەک جاران دەمێ هوزانڤان، رەوشەنبیر، هونەرمەند و کەسانێن خودان شیان دچنە بەردلۆڤانیا خودایێ مەزن، ژنوو دێ پەسنا وان هێتە کرن، دێ کۆر و سمینار ل سەرهێنە دان و ژنوو دێ بەحسێ رەنج وزەحمەت وان هێتە کرن، هەر وەسا دێ ژنوو پەرتووکێن وان هێنە چاپکرن، دێ بێژن رەحمەتی یێ هۆسا ویێ هۆسا بوو و فلان کار و بێڤان کار یێن کرین و شیانێن وی گەلەک مەزن بوون بەلێ؛ قەدەرێ نەهێلا وان کاران ب دووماهیک بئینیت، نابێژن مە نەهێلا کارێن وان رۆناهیا ڕۆژێ ببینن، بەلێ ئه و کەسێن ساخ یێن ناڤێن وان و پەسنا وان دڤێ پەرتووکێ دا هاتینە بەحس کرن، ژ وان ب شەنس تر بوون یێن وەغەرکرین، چنکو هێشتا ساخ خوە دیتن کانێ بهایێ وان چەندە و چ بۆ هاتیە کرن، نە ژلایێ دەزگەه وکۆمەلە و رێکخرا و…..هتد ڤە بەلکو ژلایێ دو کەسایەتیێن دل ساخ و یێن دئێک لەش دا دژین، ئه و کەسێن حەز ژ وەلاتێ خوە و ژ رەوشەنبیرێن وەلاتێ خوە دکەن، دڤێن پشتەڤانیا وان بکەن، وئەڤ رێکە باشترین رێک هەلبژارتی بۆ پەسن کرنا وان و رێز لێ گرتییە، ئه و ژی (خورشید وسۆزان)ن.
یا دی یا من ڤیایی ل سەر ڕابوەستم کو گەلەک یا گرنگە بهێتە گۆتن، کو من دیت دنڤیسینا نڤیسینێن هەردو هەلبەستڤانا دا، گەلەک جارا دەمێ مرۆڤ پەیڤەکێ یان ڕستەیەکێ یان چیرۆک و هەلبەستەک و سەرهاتییەکێ گوه لێ دبیت یان دخوینیت ئێکسەر مرۆڤ دزانیت ئەڤ نڤیسینا مرۆڤی خواندی یان گوه لێ بووی ژ (فولکلۆرێ کوردی)یە، ژبەر چ؟ چنکو دەم وجه ونڤیسەرێ وێ نەیێ دیارە کانێ چەوا هاتیە نڤیسین، بەلێ مرۆڤ دزانیت فولکلۆرێ وێ دەڤەرێ یە، چنکو بەحسێ هەر تشتەکێ ل وێ دەڤەری هەی ژ هەمی لایەنەکێ ڤە، وەکی رەوشت و تیتال، خوارن و ڤەخوارن، جه و دول وچیا ونزار وئاڤ و کانی و رویبار و تێکەلی و سەرەدەریا خەلکێ ل گەل ئێک وگەشت و گۆزار و ….. هتد مرۆڤ دزانیت ئەڤ تشتە یێ فولکلۆرێ وی وەلاتی یە، چنکو خودانێ وێ نەیێ دیارە، بەلێ دەمێ مرۆڤ نڤیسینێن بەرێزان (خورشید وسۆزان)ێ دخوینیت وان سالوخەتان هەمیا د نڤیسین وان دا دبینت وخودانێ وان یێ دیارە، ئانکو ئەز دشێم بێژن ئەڤە چەندە دزڤریتە شارەزایا وان ل دەڤەرێ ژ هەمی لایەنەکێ ڤە، هەر وەسا زەحمەتا وان بری کو خرڤەکرنا هەر سالوخەتەکێ ل دەف هەر ئێک ژ وان یێن بەحسێ وان هاتیە کرن.
ل دووماهیێ دەست خوەشیێ ل هەردو هەلبەستڤانان دکەم و زەحمەتا وان، هەرچەندە خودێ ژێ ڕازی ( سۆزان)ێ وەغەرکرییە وچوویە ل بەر دلۆڤانیا خودێ بەلێ؛ هەر یا ساخە و دێ مینت چرایەکێ هەرێ هەل وەکی پەیڤ و نڤیسین خوە، خودێ جهێ وێ بکەتە بەحشتا بەرین، ئەڤ دیکیۆمەنتکرنە دێ بیتە ژێدەرەکێ گرنگ کو نڤیسەر وڤەکۆلەر و هەر کەسەک مفای ژێ وەرگریت بۆ دوبارە ڕاوەستیانا ل سەر ژیانا هەر ئێک ژ وان یێن بەحسێ وان هاتیە کرن و داخازا سەرکەفتنێ بۆ خالێ خورشید پیرومەری دکەم و ژدل سوپاسیا وی دکەم کو ناڤێ من ژی دگەل وان بژارەیێن هەلبژارتین د ڤێ پەرتووکێ نڤیسای، وهەر سەرکەفتی بن.[1]