ژ نڤیسینا: عامر هیشام ئەلسەفار
وەرگێڕان ژ عەرەبی: شەمال ئاکرەیی
پشیکا قەلەو
مێزەیەک و کورسیکەک و د ناڤبەرا وان دا پشیکەکا قەلەو هەیە. کامیرایەکا تەلەڤزیۆنی. گرتەیێن زیندی یێن خەلکی ل سەر ئەکرانا تەلەڤزیۆنێ هەنە.. ئاڤاهیەک یێ دهەرفیت، چونکی بناغە نە یێ دروستە. نەخوەشەک هەتا مرنێ یێ دنالیت، چونکی دەرمان د سەختە نە. بۆمب دتەقن و جان ژ جەستەی دەردکەڤن، چونکی ئامیرێ پشکنینێ یێ سەختەیە. ب تنێ ئه و پشیکا قەلەو ژ نیڤا دلێ خوە یا دکەنیت و تیقەتیقا وێ یە.
2
دیجلە
ژ ڕووبارێ دیجلەی پرسین: “چما تو ئەڤرۆ خوەنیشادانان ل بەغدادێ دکەی؟.. چو جاران ئاڤا تە یا هاڤی نەبوویە، پەڕاڤێن تە د دلڕەق نەبووینە، چ ب سەری تە هاتی یە؟.. ڕووبارێ نەمر سەرهلدا هەتا پێلێن وی یێن تۆرە هەموو دزێن بیانی بن ئاڤ کرین.
3
قوتابخانە
د پۆلێ ڤە باوشک دهێنە مامۆستای.. قوتابی دکەنن.. مامۆستا دنڤیت.. قوتابی یاریان دکەن.. قوتابخانە دهەرفیت، وەلات ژی دگریت.
4
دز
ل زارۆکینیا خوە هی دزیان ببوو، پارچەیێن حەلاوە و شریناهیێ ژ زارۆکێن تاخی ددزین.. دەما بوویە سنێلە ل بازاڕی فێلبازی ل بازرگانان دکرن و کل ژ چاڤان ددزی.. د فێلبازی و سەردابرن و پیلان و کۆدەتایان دا بوو بسپۆر.. ل دووماهیێ بڕیارا دزینا وەلاتەکی دا.
* عامر هیشام ئەلسەفار: نۆشدار و نڤیسەرەکێ عیراقی یە، ژ دایکبوویێ سالا 1957 یە.. نها ل دەڤەرا ویلز ل بەریتانیا دژیت.
تێبینی: ئەڤ کورتە چیرۆکە ب ڕازیبوونا نڤیسەری ب خوە، ژ پەیجێ وی یێ فەیسبووکی هاتینە وەرگرتن.[1]