ئەڤرو، شەهلا ڕێکانی:
ماموستایەکا زانکویێ کو ڕاوێژکارا قانوونیە بو ڕوژناما ئەڤرو دیار کر ئافرەتا کورد یا گەهشتیە ئاستەکێ زورێ بلند ب هەبون و بوچونێن خوەڤە و گۆت: مە ل جهێن بریارێ ژن هەنە بەس ئەم بڤی ئاستی د ڕازی نینین، ژبەرکو شیانێن ئافرەتا کورد زورن و دشێت جهێن هێشتا بلندتر وەربگریت. سەبارەت کەساتیا ئافرەتا سەرکردە ماموستایا زانکویێ و ڕاوێژکارا قانوونی دکتورە دلین سەردار دیار کر کو کەساتیا سەرکردە کارتێکرنێ ل سەر کومەکا مروڤان دکەت و شیان هەنە ژ بو دیتنا چارەسەریان بو ئاریشان و ئەنجامدانا هندەک گوهورینێن بلەز و هاندانا کارێن پوزەتیڤ و کێمکرنا یێن نێگەتیڤ. د. دلینێ دیار کر کو کەساتیا سەرکردە هندەک سالوخەتێن دیار تێدا هەنە ئه و ژی هێزەکا مەزن هەیە، هەروەسا کارتێکرنەکا زور ل سەر دەوروبەرێن خوە هەیە و دەستهەلات هەیە و دەستهەلاتا سەرکردەی چەند پتر بیت دێ کارتێکرنا خوە پتر هەبیت.
راوێژکارا قانوونی دا زانین کو سەرکردایەتی دابەش دبیتە سەر سێ ئاستا و گۆت: (ئاستێ ئێکێ سەرکردایەتیا خویەتی کو خوە ئاڤا کەی و خودان بریار و شیان بی، ئاستێ دویێ سەرکردایەتیا دناڤبەرا گروپی، ئەڤە گرێدایە ب چاوانیا سەرەدەری کرنێ و کارتێکرنێ ل سەر کومەکا مروڤان، ئاستێ سیێ کو زور یێ گرنگە، جڤاکێ نیڤ دەولەتی و یاسایێن دەولەتان ل سەر کار دکەن کو ئافرەت ببیتە سەرکردە و خودان بریار).
د. دلینێ دیار کر کو قانوون هەنە ڕێکێ ددەنە ئافرەتێ ماف هەبیت ل جهێن بەرپرسیار و دانا بریارێ بیت، لەوما جڤاک نەشێت ڕێگر بیت و ئافرەتێ ب ڕەنگەکێ تایبەت ڕولێ خوە هەیە و دشێت مافێن خوە ب دەستڤە بینیت و گۆت: (رەنگە جاران جڤاک ڕێگر بیت بەس خێزانێ کارتێکرنەکا پوزەتیڤ هەیە ژ بو کارێ ژنێ د بوارێ سەرکردایەتی دا).
دکتورە دلینێ گوتژی: (پێدڤیە ئەم ئافرەتان هان بدەین نەک بەس کارکەر بیت دڤێت ل جهێ بریارێ ژی بیت، ڕولێ ژنا کورد گەلەک یێ دیارە و شیانێن هەین، بەس ئەم پێدڤی ب بزاڤەکا مەزنین کو جڤاکی هشیارتر بکەین، داکو ڕولێ وێ پتر بەرچاڤ بهێتە وەرگرتن، چونکی ئەم یێن د چەرخەکی دا دونیا هەموو یا ڤەکریە) .
د. دلینێ د بەردەوامیا ئاخفتنێن خوەداگۆت: (ب دیتنا من دڤێت ئەم نفشەکێ نوو ئاڤا بکەین ژ ئافرەتێن سەرکردە و تێگەهێن سەرکردایەتیێ یێن هەڤچەرخ نیشا وان بدەین و شیانێن هەڤرکیێ لدەف هەبن بەرامبەر هەر ئاستەنگەکا دکەڤیتە د ڕێکا وێ دا و باوەری بخو هەبیت د دانا بریارێ دا).
د. دلینێ ئاماژە بڤێ چەندێ ژی کر کو دڤێت ئەم ڕەوشەنبیریا جێندەری بەلاڤە بکەین و وەکهەڤیێ د شیانادا بێخینە دناڤبەرا ڕەگەزێ نێر و مێ، ئەڤجا پێدڤیە ئەم هندەک تێگەها بەلاڤە بکەین کو ئەڤ ڕەوشەنبیریە د جڤاکی دا بەلاڤە ببیت، هەروەسا دڤێت ل زانکو و پەیمانگەهان و قوتابخانا ئەڤ تێگەهە بەلاڤە ببیت کو پوست و جهێن گرنگ یێن سەرکردایەتیێ بەس بو ڕەگەزێ نێر نینن و گۆت: (بەلکو دڤێت ژن ژی بەرەڤانیێ ژ مافێ خوە بکەت ژ بو وەرگرتنا جهێ بریارێ و ببیتە کەسایەتیەکا سەرکردە کارتێکرنەکا زور هەبیت ل سەر خێزانا خوە و جڤاکی و ئه و گروپێ ل گەل کار دکەت).
د. دلین سەردار ڕاوێژکارا قانوونی ئه و چەندە ژی دیار کر کو پێدڤیە ئافرەت بشێت بەرپرساتیێ ڕاکەت، ژبەرکو کەساتیا سەرکردە نە هندا ب ساناهیە، چونکی هەتا مروڤ ژ ئاستەکێ کرێکاری بهێتە بهێتە جهێ بریارێ دڤێت گەلەک شیان هەبن و گۆت: (وەک باوەری بخوە بون و هەست کرن ب بەرپرساتیێ بو گوهورانکاریێ هەروەسا دڤێت بابەتێ کارتێکرنێ ژن لدەف خوە ئاڤا بکەت).[1]