ئامێدیێ، مەحمود نهێلی
ژ ئەگەرێ شەرێ دناڤبەرا پەکەکێ و لەشکەرێ تورکیا و توپبارانکرنا ڕۆژانەیا دەڤەرێ، د ڤان چەند سالێن بوری دا نێزیکێ 40 هاوولایێن سنورێ ناحیێن دێرەلۆک و شێلادزێ شەهید و بریندار بووینە و دووماهی جار ژی شەهید بوونا هاوولاتیەکی دن یا ناحیا شێلادزێ بوویە ب ناڤێ حسێن حەیدەر کو ل شەڤا چارشەمیا دەرباز بووی 16/2/2022 بوویە ئارمانجا فرۆکێن لەشکەرێ تورکیا و شەهید بوویە و زێدەباری هەژمارەکا زۆرا هاوولاتیان ژ بێ بەهر بوون ژ چوونا وان بۆ سەر گوندێن خوە و ئەڤێ یەکێ کارتێکرن کریە سەر ڕەوشا دەرون و ئابوریا وانا.
کەس و کارێن وی هاوولاتی ژی داخاز دکەن ئەڤ شەرە ب داوی بهێت و ئێدی بەس خەلکێ وان ببیتە قوربانی ململانیێن دناڤبەرا پەکەکێ و تورکیا دا.
مەلا فایق ئێک ژ کەس و کارێن ڤێ هاوولاتیە دبێژیت: هیڤی دکەین چارەسەریەک بۆ ڤی شەری بهێتە دیتن و ئەڤ خەلکە بەس ببنە قوربانی و گۆت: داخازا مە و داخازا هەموو خەلکێ دەڤەرێ ئەوە ئەڤ شەرە ل دەڤەرا مە نەمینت و ببنە سەر جهێن خوە و ڤێرێ نەکە مەیدانا شەر و ململانێ یێن خوە و ئەڤ بتنێ زیانێ دگەهینتە خەلکێ دەڤەرێ. داخازێ ژ حکومەتا هەرێمێ ژی دکەین چارەسەریەکی بۆ ببینت و خەلکێ مە ژی بشێن ب ئازادانە بچنە سەر جه و وارێن خوە.
هاولاتیەکی دی یێ دەڤەرێ دیار کر، ژ ئەگەرێ هەبوونا چەکدارێن پەکەکێ بەردەوام ئەڤ دەڤەرە دهێتە توپ باران کرن و سالانە خەلکێ مە دبیتە قوربانی و ئەڤ هاوولاتیێ نوکە ژی شەهید بووی ئێک بوویە ژ وان قوربانیان و گۆت: حسێن حەیدەر سیتەی ئاکنجیێ کومەلگەها سیریێ یێ سەر ب ناحیا شێلادزێ بوویە و تەمەنێ وی 52 سال بووینە و بابێ 10 زارۆیان بوو، ژ بۆ دابینکرنا پاریێ ژین و ژیارا خوە قەستا گوندێ خوە ل سیتە کربوو، لێ ب مخابنی ڤە بو ئارمانجا فرۆکەیێن تورکیا و شەهید بوو.
رزگار عوبەید ڕێڤەبەرێ ناحیا شێلادزێ بۆ ڕۆژناما ئەڤرۆ دیار کر، ل سنورێ ناحیا وان پتر ژ هەشتێ گوندان دبن بوردوما فرۆکێن تورکیا دانە و ڕۆژانە ئەڤ دەڤەر دهێنە توپ باران کرن و گۆت: ل سنورێ هەردو ناحیێن دێرەلۆک و شێلادزێ د ڤان دو سێ سالێن دەرباز بوویی دا نێزیکێ 40 هاوولاتی شەهید و بریندار بووینە و گۆت: شەهید بوونا ڤی هاوولاتی ژی ئێک بوویە ژ قوربانیێن ڤێ بوردومانێ و شەر و ئالوزیێن دناڤبەرا لەشکەرێ تورکیا و چەکدارێ پەکەکێ و تەکەز کر، کو گەلەک جاران وان خەلکێ دەڤەرێ ژی ئاگەهدار کرینە کو قەستا وان جهان نەکەن یێن دبنە ئارمانجا فرۆکان و بوردومانێ و هیڤی ژی خواستن کو لایەنێن پشکدار دڤی شەری دا شەرۆ و ئالوزیێن خوە ببنە مەیدانا خوە و دەڤەرا مە نەکەنە مەیدانا شەری و ئێدی بەس هاوولاتی ببنە قوربانی ڤان ئالوزیان.
پشتی تێکچوونا پروسەیا ئاشتێ دناڤبەرا لەشکەرێ تورکیا و چەکدارێن پەکەکێ ل دەڤەرێ ل سالا 2015 تا نوکە بەردەوام گوندەوارێن سنوری یێن دەڤەرا ئامێدیێ دهێنە توپ باران کرن و تا نوکە پتر ژ 200 گوندان ب چولماینە و نەهاتینە ئاڤا کرن و هند گوند ژی پشتی شەر و ئالوزیێن دەڤەرێ هاتینە چولکرن و نێزیکی 40 هاوولاتیان ژی بووینە قوربانی، ئەڤێ یەکێ ژی کارتێکرن ل سەر ژیارا هاوولاتیان ژلایێ ئابوری و دەرونی ڤە و داخاز دکەن جارەکا دی پرۆسەیا ئاشتیێ ل تورکیا دروست ببیتە ڤە و ئەڤ شەرە ل دەڤەرا وانا نەمینیت و ئه و ب ئازادانە بچنە سەر گوندێن خوە و دەست ب چاندنێ و ئینانا دەرامەتی بکەن ژ بەر کو سالانە داهاتی ڤان گوندان گەلەک زۆرن و هەموو گەنجینە نە بۆ خەلکێ دەڤەرێ و دشێن مفایەکی باش ژ چوونا سەر گوندان وەرگرن و هاوولاتی ژی بەس ببنە قوربانی.[1]