ئەندامەکا پەرلەمانێ ئەلمانیا ڕاگەھاند کو دڤێت ئورۆپا خوەدان ل ئەرکێن خوە دەرکەڤیت و پشتەڤانیێ ل ئاڤاکرنا دەولەتەکا سەربخوە یا کوردستانێ بکەت، ژ بەر کو ل ڕۆژھەلاتا ناڤین تاکە ھەڤپەیمانێ ڕاست و دروست بۆ ئورۆپا و جیھانا پێشکەڤتی گەلێ کوردە و ئەڤرۆ دیرۆک ل سەر مە فەرز دکەت کو ئەم ببینە دۆست و ھەڤپەیمانێ کوردان و پشتەڤانیا وان بکەین.
ئەڤرۆ، سەرجان مەحمود:
ئولا یالپکی ئەنداما پەرلەمانێ ئەلمانیا یا سەر ب پارتا چەپ د داخۆیانیەکا تایبەت بۆ دا ڕۆژناما ئەڤرۆ ڕاگەھاند کو ھێرشێن تیرۆرستێن داعشێ بۆ سەر کوردێن عیراق و سووریێ بۆ ھەموو جیھانێ سەلماندیە کو دڤێت دەولەتەکا سەربخوە یا کوردان بھێتە ئاڤاکرن و گۆت: (ئەڤرۆ دەمێ ئەم ل ڕەوشا ڕۆژھەلاتا ناڤین ب گشتی و ل عیراق و سووریێ ب تایبەتی دنێرین بۆ مە ئاشکرا دبیت کو گەلێ کورد ھەم ب ڕێبازا خوە یا ئاشتی و دیمۆکراسیێ و ھەم ژی د شەرێ ل دژی تیرۆرا ئیسلاما توندرەو دا ئەو یەک سەلماندیە کو دڤێت دەولەتەکا سەربخوە یا کوردستانێ بھێتە ئاڤاکرن و ئورۆپا ڤێ کوردستانێ وەک ھەڤپەیمانێ ستراتیژی ببینیت ئەو یەک د ھەمان دەمی دا د بەرژەوەندا ئورۆپا دایە و بۆ نەمانا تیرۆرێ ژی تاکە چارەیا گونجاییە).
ئەنداما پەرلەمانێ ئەلمانیا ھەروەسا دیار ژی کر کو ئەو ژ نێزیک ڤە ئاگەھداری ڕەوشا کۆبانێ و شنگالێ یە و ئێش و ئازارێن گەلێ کورد پارڤە دکەن و گۆت: (ئەز دخوازم ڤێ یەکێ بێژم کو ل ھەمبەر ھێرشێن تیرۆرستێن داعشێ ل دژی ھەرێما کوردستانێ و کانتۆنا کۆبانێ یا ڕۆژئاڤا کوردستانێ و بەرخوەدانا کوردان حێبەتی مایمە و کوردان ب ڤێ بەرخوەدانا خوە بۆ ھەموو جیھانێ سەلماندیە کو ئەو ملەتەکی سەربلند و سەرفرازن و ھەرکەس قەبوول دکەت کو گەلێ کورد د جھێ جیھانێ دا شەرێ تیرۆرێ دکەت و ئەڤرۆ بەرسڤا ھەری ڕاست بۆ بەرخوەدانا کوردان ل ئورۆپا و جیھانێ دێ ب ناسکرنا دەولەتا سەربخوە یا کوردان ل باشور و ڕۆژئاڤایێ کوردستانێ بھێتە داین و دیرۆک ڤێ یەکێ دخوازیت و شەرت و مەرج ژی بۆ ڤێ یەکێ ژ ھەر دەمەکێ گونجایترە و کوردان ب بەرخوەدانا خوە مافێ دیارکرنا چارەنڤیسێ خوە وەرگرتیە).
ئەنداما پەرلەمانێ ئەلمانیا ئەو یەک ژی ڕاگەھاند کو نھا ل پەرلەمانێ ئەلمانیا پرانیا پەرلەمانتارێن ژ پارتێن جودا دخوازن حوکمەت د ھەر واری دا ھاریکاریا کوردان بکەت و د دبلۆماسیێ دا وەک دەولەتەک سەربخوە سەرەدەریێ ل گەل کوردان بکەت و گۆت: (د دەمێ سەرەدانا خوە دا بۆ ھەرێما کوردستانێ مە دیت کو بەرێز مەسعود بارزانی سەرۆکێ ھەرێما کوردستانێ خالا ھەری لاواز یا کوردان ل گەل سەرکردایەتیا کوردێن ڕۆژئاڤا و باکورێ کوردستانێ ژ ھۆلێ ڕاکریە و پارچەبوونا د ناڤبەرا ئالیێن کوردی دا نەھێلایە و بنگەھێ یەکگرتنا نەتەوا کوردان دروست کریە و ل دووڤ ھزرا من نھا کوردان خالا ھەری لاواز کرینە خالا ھەری ب ھێز و ئەو یەک ژی سەرکەڤتنا کوردان د شەرێ ل دژی تیرۆرێ دا گەرەنتی دکەت و کوردان بەر ب دەولەتا سەربخوە ڤە دبەت).
ئولا یالپکی د پشکەکا دی یا ئاخڤتنا خوە دا ژی دیار کر کو کۆمبوونێن ل دھۆکێ یا ب دەستپێشخەریا بەرێز مەسعود بارزانی سەرۆکێ ھەرێما کوردستانێ د ناڤبەرا پارت و ئالیێن ڕۆژئاڤایێ کوردستانێ دا بۆ گەلێ کورد دیرۆکەکی نوو یە و گۆت: (ل دووڤ ھزرا من ڕێککەڤتنا ئالیێن سیاسی یێن ڕۆژئاڤا وەک بەرخوەدانا شنگال و کۆبانێ گرنگە و ھەتا سەرکەڤتنا کوردان د شەرێ ل دژی تیرۆرێ دا گەرەنتی دکەت و نھا ھەم ئورۆپا و ئەمریکا و ھەم ژی ڕایا گشتی یا جیھانێ باوەریێن خوە ب کوردان دھینن).
ئولا یالپکی د دووماھیا ئاخڤتنا خوە دا ژی ڕاگەھاند کو وان خەباتەکا دبلۆماسی و قانوونی دانە دەستپێکرن بۆ کو ناڤێ پارتا کارکەرێن کوردستانێ ژ لیستا تیرۆرێ یا ئوروپا و ئەمریکا دەرکەڤیت و گۆت: (ئێدی دەستھەلاتدارێن وەلاتێن ئورۆپا و ئەمریکا ژی دبینن کو گەلێ کورد ل تورکیا، عیراق، سووریێ و ئیرانێ ب تنێ بۆ ئازادی و دیمۆکراسی و مافێن خوە یێن نەتەوی تێکۆشینێ دکەن و مافێ گەلێ کوردە وەک ھەموو گەلێن جیھانێ چارەنڤیسێ خوە دیار بکەن و دڤێت ئورۆپا و ئەمریکا دەستپێشخەریێ بۆ ئاڤاکرنا دەولەتا کوردی بکەن و دڤێت ئەم ژ بیر نەکەین کورد نھا بۆ ھەموو جیھانێ شەرێ تیرۆرێ دکەن و ھەموو جیھان قەردارێ کوردانە).[1]