موغبەچەیێن مەیفرۆش، هەر سەحەرێ تێن سەما
بادەخوران نۆش نۆش، مانە ل دۆرێ جەما
هن گولێ بۆعەنبەرن، هن د شیرین ئەسمەرن
هن گوهەری دانەین، مسلێ سوهەیلێ سەما
هن زەرینە پوڕ سوڕن، سەر ب پەڕ و دێم دوڕن
من کو د چەرخێ وە دی، سەبر و قەرارم نەما
سەبر و قەرارم کو بر، جان و جەگەر هوور دکر
زولمێ وە ڕەنگ کێ دکر، جان دبر و دل تەبا
جان و دلێ من ئەوە، حووروەشێ من ئەوە
پادشەهێ من ئەوە، ئەز ل دەرێ وی گەدا
یارێ کو دی ئەم گەدا، دەست ب دەستێ مە دا
ئەم ب سەمایێ برین، ڕەقس و سەما ژی وە ما
گۆتە مە دوڕدانەیی، ئەم ژ تە و تو ژ مەیی
لەو ب حەقیقەت یەکین، مەسئەلە بێ شوبهە ما
دا مە ب دەستێ سوڕێ، جاما ژ ڕەنگێ دوڕێ
جەزبە گها جان و دل، پوڕ شەووشاندن هەما
بادە م نۆشی ژ دەست، چوومە ژ خوە و مامە مەست
قەترە ب بەحرێ گها، بەحر ب عەینێ خوە ما
گووش ب عامێ مەدە، تەرکێ مودامێ مەدە
(اَکثَرُهُم في غُمیٰ، أغلبهم في عما)
حەرف ژ یەک بوونە فەسل، گەر ببری وان ب ئەسل
حەرف دبت یەک خەتەک، خەت کو نەما نوقتە ما
وەحدەتێ موتلەق مەلا، نوورە د قەلبان جەلا
زۆر د ڤێ مەسئەلێ، ئەهلێ دلان شوبهە ما
مەلای جزیریمەلای جزیری [1]