رێڤەبەرێ گشتی یێ کاروبارێن شەھید و #ئەنفال#کریان ل پارێزگەھا #دھۆک#ێ دیار کر کو ل ڕۆژا 25-8-1988 ئەنفالێن بەھدینان دەست پێ کرن د ئەنجام دا پتر ژ 620 گۆندان ھاتنە خرابکرن و پێنج ھزار کەس بوونە قۆربانێ ژ وان ژی سێ ھزار کەس ھاتنە شەھیدکرن و نێزیکی دو ھزار کەسان کەفتنە د دەستێن سوپایێ عیراقێ دا و ھەتا نوکە ژی چارەنڤیسێ وان یێ دیار نینە.
رەجەب ئیبراھیم، ڕێڤەبەرێ گشتی یێ کاروبارێن شەھید و ئەنفالکریان ل پارێزگەھا دھۆکێ بۆ ئەڤرۆ دیار کر کو ئەنفالا بەھدینان قووناغا ھەشتێ دەستپێکر و پتر ژ 620 گۆندێن سەر ب دھۆکێ ڤە ھاتنە خرابکرن و 176 گۆندێن دی ژی ھاتنە ئەنفالکرن و ھەموو خەلکێ ڤان گۆندان ھاتنە گرتن و بێ سەرووشوونکرن و ھەتا نوکە ژی چارەنڤیسی وان یێ دیار نینە و پتر ژ سێ ھزار کەسان د ھەوا ئەنفالێ دا چوونە بەردلوڤانیا خودێ و بوونە شەھید و گۆت:”ژ سەرجەمێ کەسێن د ئەنفالان دا ھاتینە بێ سەروشوونکرن و شەھیدکرن دگەھنە پێنج ھزار کەسان ل سەرانسەرێ پارێزگەھا دھۆکێ”.
رێڤەبەرێ گشتی یێ کاروبارێن شەھید و ئەنفالکریان ل پارێزگەھا دھۆکێ گۆت: ھەتا نوکە ئەڤ کەسێن ھاتینە بی سەروشوونکرن نەھاتینە دیتن ھندەک دبێژن ئەڤ کەسێن ھاتینە بێ سەروشوونکرن یێن دەوروبەرێن پارێزگەھا مووسلێ نە، لێ ژ بەر ڕەوشا ئەمنی یا مووسلێ ھەتا نوکە ئەو گۆرێن بکۆم یێن ئەنفالکریێن خەلکێ پارێزگەھا دھۆکێ نەھاتینە ڤەکرن، ل دھۆکێ لیژنە ژی ھاتینە پێک ئینان بۆ ڤێ چەندێ دگەل وەزارەتا شەھید و ئەنفالکریان ل ھەرێما کوردستانێ لێ لیژنا دەست ب کارێ خوە نەکریە ژ بەر ڕەوشا ل مووسلێ ھەی.
ناڤھاتی ئاشکرا کرکو ل ڕۆژا 28-8-1988 دێ سالڤەگەرا کۆمکوژیا خەلکێ گۆندێ کۆرێمێ ب چەندین چالاکیان و ب پشکداریا بەرپرسێن حکومی و حزبی و خەلکێ دەڤەرێ و ڕێکخراوان ھێتە ساخکرن کو ڕژێما ژناڤچوویا عیراقێ دڤێ کۆمکوژیێ دا 33 کەس گۆللەبارانکرن ژ وان ژی 28 کەس ھاتنە شەھیدکرن و بتنێ پێنج کەس قورتال ببوون و گۆت: “ئەو 28 کەسێن بووینە قوربانی ژی ژوان نەە خەلکێ گوندێ چەلکێ بوون و 18 یێن دی ژی خەلکێ گۆندێ کورێمێ بوون وەکو وەفاداری بۆ شەھیدێن گوندێ چەلکێ و کورێمێ تاجە گول دێ ل سەر گۆرێن ئەنفالکریان ھێنە دانان”.
ناڤھاتی خویا کر کو ھەتا نوکە ب دروستاھی نەھاتیە زانینن چەند گۆرێن بکۆم یێن ئەنفالکریێن خەلکێ پارێزگەھا دھۆکێ ل دەوروبەرێن پارێزگەھا مووسلێ نە ھەتا نوکە حوکمەتا عیراقێ بۆ ئەنفالکریان چو نەکریە و ئەڤ بابەتە یێ کریە بابەتەکێ سیاسی بتنی حوکمەتا ھەرێما کوردستانێ ل دووڤ قانوونەکێَ ھەموو یێن کرینە شەھید و گۆت: “سالڤەگەرا ئەنفالکریێن بەھدینان دێ ل ڕۆژا 30-8-2018 ل پارێزگەھا دھۆکێ د چالاکیەکا مەزن دا ھێتە ساخکرن کو ل ڕۆژا #06-09-1988# ھەوا ئەنفالێن بەھدینان ب دووماھیی ھات ھەموو گۆند ھاتنە خرابکرن چوول کرن”.
ل دووماھیێ ڕێڤەبەرێ گشتی یێ کاروبارێن شەھید و ئەنفالکریان ل پارێزگەھا دھۆکێ دیار کر کو حوکمەتا ھەرێما کوردستانێ کاردکەت کەیسا ئەنفالان بگەھتە ھەموو جیھانێ و دادگەھان و بریار ژی پێ ھاتیە دان و گۆت:”پێنج فرقێن سوپایێ عیراقێ ھاتن دەست ب ئەنفالێ کرن ل دەستپێکی عیراقێ دەرمانێ کیمیاوی ھاڤێت ب تایبەتی ژی ل دەڤەرا برجینی و بەرواریا و بەرێ گاری و دەڤەرا ئامێدیی دا خەلکێ مە نەشییان خوە ڕزگاربکەن ھەتا نوکە ژی زیانێن ڤی دەرمانی ل سەر وەلاتیان ماینە و گەلەک ژ وان ژی بووینە قوربانی و نەماینە د ژیانێ دا ژ بەر کارتێکرنا دەرمانێ کیمیاوی یێ ل وی دەمی حوکمەتا عیراقێ ھاڤێتیە گۆند و دەڤەرێن پارێزگەھا دھۆکێ”.[1]