جار دی ژ ڕەنگێ جنان ڤە؛ دل ژ شەیخ سەید کر ب جانڤە
بر ب سەر بەحرا عومان ڤە؛ گرت ب داڤا ڕەغبەتێ
زاهدێ شەیتین هەژاندی؛ فەرەس و ڕوخ ژێ ستاندی
دل ب چوکێشی کشاندی؛ پەهلەوانێ حیلەتێ
چیژەکی شەیتین بەلا بوو؛ خوبەکی (رگی) نەمابوو
دل بکن لیبی ستابوو؛ هێژ سەبەب تەمعییەتێ
گەنم و دانێ تەمایێ؛ چیژەکی داڤ لێ ڤەدایێ
بێ حساب کەتنە بەلایێ؛ بن دو لنگا داکەتێ
پیرۆزە تەمعا ئاخرەتێ؛ یا ناڤ و نامووسا مەتێ
مەیلا لیقایا جەننەتێ؛ ئەوفعلە خاس ب کێر مەتێ
نەبی وە گۆتە وارعان؛ حوببا دنێ دا تامعان
ناچیتە قەلبێ خاشعان؛ سەددەق ژ ڤێ ڕوایەتێ
خەیر و شەڕ و مەکر و بەلا؛ موهرا نەسیب و ئەجەلا
راست بوو ژ ڕۆژا ئەزەلا؛ ئەمر و بەرات ژ بال تە تێ
ئەزەلی بەرسیس حەمول کر؛ شەیخییا ئبلیس قەبول کر
خێری شومییێ فوزول کر؛ چوو تلسما دەولەتێ
زەعەلا شیرین ژ هاڤە؛ ڕوو وەکو شەکر د ناڤە
عاقبەت تەحلە زەراڤە؛ کەس نکارت دەڤ دەتێ
ڤێکەتن هەردو ب یارێ؛ دز کرە مالخوێ مغارێ
ماست دبێ ب تولا سپارێ؛ مال کرە حجرا (مەتێ)
زاهدێ خەیر و سەوابان؛ ماستێ کۆدا دەڤ کلابان
یارییا خور و خرابان؛ ژێ دبینی زەحمەتێ
یارییا خەلقێ نە هەموار؛ ژێ بکن توبە ئیستغفار
دێ کەنە کامل گونەهکار؛ تەنییا دوهن ڤێکەتێ
کوپەکی پەحتی ب نفتێ؛ شەهرەزا کر شەیخ ب مفتێ
بر، کرە یارێ شکەفتێ؛ نە ب خێر کی قسسەتێ
نە ب خێر و نە ب هاڤل؛ پاشی بەرسیسێ بێ ئاقل
قەت وەلێ نابن تو جاهل؛ بێیی علمێ حکمەتێ
لەو بێیی علمێ (من لدن)؛ قاسد هنار شاهێ مەزن
لا یعبدون ئیللا ئەمن؛ لازمە شوکرا نعمەتێ
من ئەڤ مسال لەو بەستنە؛ هشیار ببن مێر و ژنە
شەیتان ب هەر کەس دژمنە؛ بەرسیس غراند بڤێ نسبەتێ
شەیتان ل شەیخ بوو سەرەمێر؛ نیشان ددت شوغلا بخێر
خەلقنۆ دنێ نائێت ب کێر؛ دا جوهد بکن ل ئاخرەتێ
بێ دەس لمێژ لمێژ دکت؛ ب هەجەدان درێژ دکت
لێبا مەزن دێ هێژ دکت؛ یان چار کەنار مەلالەتێ
وەرعێ دکت زولا دبت؛ بەرسیس قەوی پێ شا دبت
نوور ژ ڕووان پەیدا دبت؛ شەبیهێ هەیڤا داکەتێ
حەتا نەبوو شوبهەتێ نوور؛ ڤەڕست نەکر فەتح سدوور
دۆر هات د بزمارێ د کوور؛ هەڤڕوو بکم شەقاوەتێ
وەختێ خوەلی مالێ بکت؛ ئاڤێ ل شەمالێ بکت
قەسدا کەزی کالێ بکت؛ زانت شوغول ب دەست ڤەتێ
خەلقنۆ خودێ تەقدیر دکت؛ جوزئەک لەعین تەدبیر دکت
قەسدا کەنیشکا میر دکت؛ چوونە تەمام ڤراکەتێ
میرەک هەبوو بێ حەد ب مال؛ بکرەک هەبوو قامەت شەپال
سیما وەکو بەدرا کەمال؛ قەت کەس نەداکت وەسفەتێ
قەت کەس نەداکت مەدحان؛ شەبیهێ هەیڤا چاردەهان
عومر ژ وان سال و مەهان؛ ولدان و حورا جەننەتێ
ولدان و حورا بێهن خوەشە؛ ئاسک و غەزالا چاڤ ڕەشە
دێم قەمەرە خال حەبەشە؛ حوبرا (بێ)یە سەر کاغەتێ
خالێ ژ ڕەنگێ فلفلان؛ ئیلان و جۆتێ قاتلان
ئەو فڕ دکن خوونا دلان؛ باکر چ زانت مروەتێ
بیکر ژ ڕەنگێ حورییان؛ سەردارە ڕەففا قومرییان
سەییادە قەلبێ سۆفییان؛ مەشغول ب کێرا زەبحەتێ
کێرا د دەستێ ئەسمەران؛ سۆرە ژ خوینا جگەران
خەلقنۆ ژ ئەڤینا دلبەران؛ مەعلوم نیە چ ب سەر مە تێ
ئەو نازکا مەشهورێ عام؛ شەه توتییا ئیوان مەقام
لەب شەکەرا شیرین کەلام؛ شەیتان د خەودە بع کەتێ
ئەو نازکا وەی موعتەبەر؛ شەیتان د خەودە هاتە سەر
(پیر عەفییا) کابووس دبەر؛ زەبانییا قیامەتێ
خەملی ژ ڕەنگێ پیرەکی؛ سیما وەکو خنزیرەکی
لنگ دا کنیکا میرەکی؛ ئێمن د خەودە ڕاکەتێ
شەیتان بووە جن تازییەک؛ ڕاهشت د گوهدە گازییەک
لێ بوویە تای و لەرزییەک؛ کچ هلبوە ژ غەفلەتێ
کۆپەک د خەودە پێرەیی؛ نازک ژ غەفلەت هلبەیی
لەعلێ دسور کەف لێ مەیی؛ ڕابین بەزینا خدمەتێ
لێ ڕۆهن کرن مۆم و چران؛ د هاتنێ باب و بران
پێدە دڕێژن هێستران؛ یا نازەنین چ ب سەر تە تێ
حالێ کچێ پرسیار دکن؛ دەست و پیا تیمار دکن
جێری و خزمەتکار دکن؛ یار و ڕەفیقێ هێشەتێ
جارەک ببێنە خادمان؛ نەهنێرنە بال عالمان
جەما بکن مونەججمان؛ ژێڕا بکن کتابەتێ
ئانینە ژۆر خەلقێ ڕەمال؛ هندی هەبوو ئەسما ئو فال
تێ سەح نە کر حال و حەوال؛ وان ب حسابا ئەبجەدێ
حساب ل وان موشکل دبوو؛ دەست ل کتابان شل دبوو
حەرفێن د نوو داخل دبوو؛ ئەلیف نە دین دگەر خەتێ
وان قەت نەزانی حال چییە؛ هەمیان دگۆت چاڤینییە
لازم کچێ نێت گرتییە؛ ئسم و تلسمەک لێ نەتێ
اسم و طلسمێ حرز بەن؛ شەیخ و مەلا ژێڕە دکەن
قەت کێم نەبوو ژانا بەدەن؛ سۆر بوو ژ دەست حەرارەتێ
#فەقێ تەیران# [1]