کامکاران، گروپەکە بەرنیاس و ناڤدار یا موزیکا کوردینە ل کوردستان و جیهانێ کو سترانێن ڕەسەن یێن کوردەواری تێکهەلی ساز و ئامێرێن دن یێن میوزیکی یێن تایبەت ب خوە دکەن کو ڕەنگ و تام و چێژەکە دن ددەتە هونەرا کوردی.
گرووپا کامکاران ل ساڵا 1965 لسەر دەستێ ماموستا حەسەن کامکار ل باژێڕێ #سنە# وەکە گروپەکە کوردی هاتییە تومار کرن و دەست ب چالاکیێن خوە کرییە. ل دەستپێک وەکە گروپەکا خێزانی دەست بکارێ خوە کر لێ بەلێ ل هێدی هێدی دگەل کەسێن بەرنیاس و خودان شیان تێکهەل بوون و وەکە گروپەکە مەزنتر بو کار و چالاکیێن خوە یێن هونەری دەرکەتن.
ئەڤ گروپە پێک دهێت ل: #هۆشەنگ کامکار#، #بیژەن کامکار#، #قەشەنگ کامکار#، #پەشەنگ کامکار#، #ئەرژەنگ کامکار#، #ئەرسەلان کامکار#، #ئەردەشێر کامکار#، #ئەردەوان کامکار#، #نەجمە تەجەددود#، #مەریەم ئیبراهیمپوور#، #سەبا کامکار#، #هانا کامکار#، #نەیریز کامکار#، #سیاوەش کامکار#، #ئومێد لوتفی#.
ئێکەم ئەلبوما هوونەری یا ڤێ گروپێ ل ساڵا 1993 بناڤێ (بارانە) بوویە هەتا ڤی دەمەی 11 ئەلبوم تومار کرینە و پشکدار بووینە ل ئەلبوم و کۆنسێرتێن دن یێن هونەرمەندێن بەرنیاس وەکە #عەدنان کەریم# و #بەهجەت یەحیا#.
ژبلی کارێن ڕێکخستن و دروستکرنا ئەلبومان، ڤێ گروپێ وەکە لێدەرێ تراک ئان کوو ئێک پارچە میوزیک بو بەهرا پتر ل هونەرمەندان ئالیکاری کرییە کو ئێک ژوان ماموستا شەهرام نازریە.
گروپا کامکاران بلی ئاستێ کوردستانی، د مەڕاسیمێن جیهانی ژیک پشکدارییەکە بەرچاڤ هەبوویە وەک مەڕاسیما پێشکەش کرنا خەلاتا نۆبلا ئاشتی یێ کو ل ساڵا 2003 ، د وێ ساڵێ دە #شیرین عەبادی# کو خانمەکە کوردا یاساناس و چالاکا دبوارێ مافێن ئافرەتانە، ئەڤ خەلاتە بدەست خوەڤە ئینا.
ژکارێن هەرە جوان و ناڤدارێن ڤێ گروپێ، ئەنجام دان بڕێڤەبرنا کۆنسێرتەکە میوزیکا کوردی ل باژێرێن ئیستانبول و #ئامەد#ا باکوورێ کوردستانێ بوو کوو بو جارا ئێکەمین بوویە د دیروکا تورکیێ دە کونسێرتەکە بڤی ئاڤایی مەزن و ب زمانێ کوردی ل ڤی وەڵاتەی بهێت ئەنجام دان.
د ڤی دەمەیدا ڤێ گروپێ فێرگەهەکە تایبەت هەنە ژبوو حەژێکەرێن میوزیکا ڕەسەنا کوردی.[1]