پارێزگارێ #دهۆک#ێ داخواز ژ #حکوومەتا هەرێما کوردستان#ێ کر کو #ئاکرێ# ببە پایتەختا #نەورۆز#ێ.
راگهاندنا پارێزگەها دهۆکێ ئیرۆ 28ێ ئادارا 2023 بەلاڤ کر، پارێزگارێ دهۆکێ عەلی تەتەر ئیرۆ ب نڤیسەکە فەرمی داخواز ژ ژ ئەنجوومەنا وەزیران کر کو ئاکرێ ببە پایتەختا نەورۆزێ.
سەدەما داخوازا پارێزگارێ دهۆکێ، ژ بەر کولتورا جوانا ئاکرێ د جەژنا نەورۆزێ دە، ئاهەنگێن جودا یێن وی باژاری ژ باژارێن دن و هەژمارەکە مەزن یا گەشتیارێن ناڤخوەیی و بیانی یێن کو ژ بۆ بەشداریا د مەراسیمێن نەورۆزێ دە سەردانا وی باژاری دکنە.
ئەڤ یەک د دەمەکێ دەیە، شارەدارێ ئاکرێ بلند رەزا زێباری رۆژا 21ێ ئادارێ ژ رۆژنامەڤانان رە راگهاند، ئیسال زێدەتر ژ 100 هەزار کەسی بەشداری مەراسیما ڤێخستنا ئاگرێ نەورۆزێ ل ئاکرێ بوون و نێزیکی 500 مێڤانێن بیان ژی ژ بۆ بەشداریا د مەراسمێ دە سەردانا وی باژاری کرن.
باژارێ ئاکرێ دکەڤە باشوورێ رۆژهلاتێ پارێزگەها دهۆکێ. د ناڤبەرا سێ چیایان دەیە و مالێن خوە ل سەر هەڤ هاتنە ئاڤاکرنە، ڤێ یەکێ ژی دیمەنەکە خوەشک و بالکێش دایە باژێر.
ئاکرێ د سالا 1877 دە بوویە ناڤەندا قەزایێ. ئەڤ باژار ژی هەتا سەرهلدانا ئادارا 1991ێ سەر ب پارێزگەها نەینەوایێ بوو، پشترە ب فەرمی بوو بەشەک ژ پارێزگەها دهۆکێ و هەرێما کوردستانێ.[1]