ب دەستووری خودێ
مخابن ژ بۆ خەبیسێ وەفاداری نەبیتن
خودان ئاقلەکی پر ھۆنەر حەیفە کو بەرز ببتن
مەزن بدەن یەک خەبەر دەرەوە لێڤەبیتن
***
ھەم سوحبەتا رەقی بت بۆ ئاشقا بێتامە
چ کینا عەندەلێ بیت تە ل گەل ڤەبری حەرامە
بێ سەبرێ ناشکری بت ژ ئاقلا نەیی تەمامە
***
ئاقل و سەبر حسران تەحمالێ بەحرا نیلە
کەسێ نەگۆت غەدران میرێ ب فەتل و حیلە
دل ب ئاشق و یارن چراغێ بێ فتیلە
***
چراغێ ئاشقا زەمیر دل ژ کلامێ کەنجە
رەمزا کو دێ کەی تەقدیر میزان و لەعل و سنجە
ل شۆلا بێ رایی و تەکبیر کەسێ نابێژت یە قەنجە
***
قەنجی نینە ببتە ھەڤال دگەل خەماسێ قەلسی
ل سەرێ بێ منەت و پال میرێ ل سەر تەخت و کورسی
کلۆرا ھشکە سەد سال چێترە ژ خەبیسا قەلسی
***
چێترە بخۆی ئاخ و بەر نەچییە پێش قلتەبابی
بێ ئەسل بوونە مێرسەر ئەو چەرخێ ئاخر زەمانی
نزانت ببتە رەھبەرە بێ داد ژ بەر نەزانی
***
نەزانێ قەنجیا بەردت باژۆن بلا بچیتە گاران
شۆلا دەھا ژێ خەبەردا سەر ناگرت چوو جاران
چانگێ پاکی سپی بت ناچتە نک قەساران
***
ناچیتە سوکێت قەسارە قماشێ پاکی ئەتلەس
یەک خەبەر و قرارن ھیڤی ناکن ژ توو کەس
نەسیحەت و بدوارە گەر ناگەھیتە نەکەس
***
یارێ بێ فعل و باوەر قەنجی نینە تێ فکری
یارێ ژ دل یەک خەبەر چرایەکی ھلکری
یارێ زمانێ خۆسەر سالوسا چێنەکری
***
قەنج نینە پر خۆسەر ببن خولامێ ئەمین
باران ئەگەر شەکر بیت حەنزەل نابیتە شرین
رەقیبێ دل کەسەر بت باتەیی گۆتێ ئەمین
***
یێ تەمام خودێ یە.[1]