کۆسار عوسمان
دیدارەکانی تایبەت بە پڕۆسەیەکی نوێی پرسی کورد بەرەوپێش دەچن، سەرۆکی جەهەپە داوای ڕاستگۆیی و شەفافیەت لە پڕۆسەکە دەکات.
#دەوڵەت باخچەلی#، سەرۆکی پارتی بزووتنەوەی نەتەوەیی (مەهەپە) ڕۆژی#01-11-2024# ، بە تەوقەکردن لەگەڵ هاوسەرۆکانی دەم پارتی، پڕۆسەیەکی تایبەت بە پرسی کوردی دەستپێکرد.
ئەو پڕۆسەیە ئێستا گەیشتووەتە ئەو ئاستەی کە شاندی دەم پارتی دوای دیدار لەگەڵ عەبدوڵڵا ئۆجەلان، ڕێبەری زیندانیکراوی #پەکەکە#، لەگەڵ سەرۆکی پەڕڵەمانی تورکیا و دەوڵەت باخچەلی کۆببنەوە.
لە کاتێکدا پڕۆسەکە لەلایەن هاوپەیمانیی جهوور کە ئاکپارتی و مەهەپە پێکیدەهێنن دەستیپێکراوە، #ئۆزگور ئۆزەل#، سەرۆکی جەهەپە هیچ کات دژایەتیی خۆی ڕانەگەیاندووە. ئەوەندە بێت جەهەپە جۆرێک لە مەرجی بۆ پڕۆسەکە داناوە و دەڵێت: نابێت هەنگاوێکی وەها بنرێت کە ماڵباتی سەربازانی کوژراوی سوپا و بریندارانی سەنگەر ئازار بدەن.
ئۆزگور ئۆزەل سەبارەت بە دەستپێکردنی پڕۆسەیەکی هاوشێوەی 'چارەسەری' وتی: ئەگەر پڕۆسەیەکی نوێی لەمجۆرە بە شێوەیەکی ڕاستگۆیانە و شەفاف بەڕێوەبچێت، دەڵێم بەڵێ. مەرجی ئێمە ئەوەیە پڕۆسەکە لە پەڕڵەمان بەڕێوەبچێت و هیچ پارتێکی سیاسیش فەرامۆش نەکرێت.
شاندی دەم پارتی دوای ئەوەی ڕۆژی #28-12-2024#، لە ئیمراڵی دیداری لەگەڵ عەبدوڵڵا ئۆجەلان، ڕێبەری زیندانیکراوی پەکەکە سازکرد، بڕیاری دا لەگەڵ پارتە سیاسییەکان و ڕێکخراوەکاندا کۆببێتەوە. هەر بەگوێرەی پلانەکە، دوای دیدار لەگەڵ پارتە سیاسییەکان، ئینجا لەگەڵ ڕێکخراوەکاندا کۆدەبێتەوە و ئاڵوگۆڕی بیروڕایان لەگەڵدا دەکات.
باخچەلی ڕۆژی #31-12-2024#، سەبارەت بە دیداری شاندی دەم پارتی و ئۆجەلان وتی: بە شێوەیەکی گشتی، بەشێک لەو دیدارە کە لە میدیادا بڵاوکراوەتەوە، جگە لەوەی هیوای دیموکراسی، برایەتیی تورک و کوردی بەهێزکردووە، بووەتە دەستپێکێکی خێردار. ئیدی پێویستە بابەتەکە لە گوتەوە بۆ کردار بگۆڕدرێت و قۆناخ بە قۆناخیش پێشهاتەکان ڕابگەیێندرێن. [1]