سەلام کوڕێ شێخ ئەحمەدێ #عازەبان#ییە، ل ساڵا (1892) زاینی ل گوندێ (عازەبان) یا دەڤەرا #وارماوا#یا سەر ب پارێزگەها #هەڵەبجە# ژدایک بوویە. زور حەزا خوەندنێ هەبوویە، ل ژیێ چار ساڵیدا کەتییە بەر خوەندنێ، قورئان و زمانێ فارسی خوەندییە، ل ژیێ شەش ساڵیدا بابێ وی وەغەرا دوایێ کر. ئاگەهدارێ ڕیدانێن ئێکەم شوڕەشا (#شێخ مەحمودی حەفید#) ل ساڵا 1919 زاینی بوویە. ل گەلەک جهان خزمەت کرییە وەکە: وارماوە، هەڵەبجە، سلێمانی، تەنانەت بەسرە و بەغدا و حللە و هەندەک جهێن دن.
ل ساڵا 1928 زاینی دگەڵ چەند لاوەکان (کۆمەڵەی زەردەشت) دامەزراند.
ل ساڵا (1930) پشتی کارەساتا ڕوژا ڕەش یا (6)ێ ئەیلولێ دگەل چەند کەسان دچنە گوندێ (#پیران#) دەف (شێخ مەحمود) . هەروەسا پشکدارییا ڕووداوێن ساڵا 1931یا زاینی کرییە ب فەرماندەیێ (شێخ مەحمود) ، ل (1945-1955) یا زاینی خوە خانەنشین کرییە.
ل پێشەکییا دیوانا خوەدە، کو ل ساڵا 1958 زاینی ل بەغدا چاپ بییە، د. مارف خەزنەدار دنڤیسیت: (سەلام پتر شاعیرەکێ نشتیمان ونەتەوەییە، چوونکی دەمێ گەنجییا سەلام، نەتەوێ کورد ب دەورەیەکا تایبەت تێدپەڕی) .
ل بابەتێ هەڵبەستەیێن دەروونی دە دبێژیت: (خەیاڵەکە ڕوون تێدایە و شعورەکە ڕاست دەردخەت، وەکە وشەیێن ل ناخا دەروونیدا بێنە دەرڤە، وەسایە) .
ئێک ل شاکارێن شێخ سەلام چوارینەیێن (خەیام) ە، کو ل فارسی بو کوردی وەرگێراینە، کو ب ڕاستی گیانێ خەیام ل وێ وەرگێڕانێدە ب تمامی هاتییە پاراستن و ب ئێک ل باشترین وەرگێڕانان تێ هەژمارتن، سەلام ل #03-03-1959# ل سلێمانی وەغەرا داویێ کر و ل گردێ سەیوان هات بخاک سپاردن.
$ئەڤەژی نموونەکە ل هۆزانەکە وی:$
وەتەن چییە؟
هەستە لەخەو ئەی لاوی کورد
تێبکۆشە بەدەستوبرد
هاوار ئەکا دایکی وەتەن
وا گیان ئەدا، پێیدا بگەن
خاک و گوڵ و گڵ و گیا
شاخ و چەم و چڵ و چیا
ڕەنگاو ڕەنگی کەژی سیا
هاوار ئەکەن بە جیاجیا
وا مەزانە خاکی وەتەن
ئاو و گڵە دار و دەوەن
ئەم وەتەنە ئاو و گڵە
پشت و ئەژنۆ، جەرگ و دڵە
ئەجدادی تۆ شێرانی کورد
لە ڕێی وەتەن بەمەردیی مرد
مردن، ڕزین بوون بەم خاکە
وەتەن دایک، وەتەن باوک، وەتەن کاکە [1]