کەریم بەگێ سەعید بەگ کو ب کەریم زانستی یێ بەرنیاسە، ساڵا 1900 ل باژێڕێ #سلێمانی# ل خێزانەکە خوەندەوار و زانست پەروەردا ژدایک بوویە.
قویناغێن خوەندنێ ل سلێمانیێ تمام کرییە. کەریمێ زانستی کەسەک ڕووناکبیر بوویە و وەکە ماموستا و شاعێر و وەرگێڕ خزمەت کرییە. ل دەستپێکا ژیانا لاویدا حەزا هندێ هەبوویە کو زانست و زانیاری و خوەندەواریێ بەڵاڤ بکەت. ژبو دەستکەتنا ئەوان ئارمانجێن کو دگەل هەژمارەکا ڕووناکبیرێن وی سەردەمەی وەکە (#پیرەمێرد#، ڕەشید زەکی کابان، ڕەفیق حلمی، ڕەشید نەجیب، ئەحمەد عەزیز ئاغا و عەبدوڵڵا عەزیز هەولێری) ، ب موڵەتا فەرمی یا میری (جڤاکا زانستی) ل #24-06-1926# پێکئانییە.
ئارمانجا کۆمەڵەیێ نەهێلانا نەخوەندەواری و بەڵاڤ کرنا زانست و زانیاری و ڕەوشنبیری بوویە ل ڕییا چاپ کرنا پەرتووک و گوڤار و ڕوژنامە و کۆڕ و کۆمبینان بوویە.
ب مەرەما نەهێڵانا نەخوەندەواریێ، کۆمەڵەیا قوتابخانەیێن زانستی کرییە و ماموستا کەریم بوویە ڕێڤەبەرێ ئەوێ قوتابخانێ و لدیف ڤێڕە ب کەریم زانستی ناڤبانگێ خوە دەرکرییە و هەروەسا ئەوێ قوتابخانەیێ ڕوڵەک دیار هەبوویە ل بەڵاڤ کرنا خوەندەواریێ و چەندین کەس لڤێ قوتابخانەیێ فێری خوەندن و نڤتسین بووینە و چەند کەسایەتی ئێن دیار ژی پێگهاندینە، ژوانا #بەنگینە# یێ شاعێر.
ماموستا کەریم زانستی سەرباری ئەوان خزمەتێن خوە وەکە ماموستا و پەروەردەکار، وەکە هۆزانڤان و وەرگێڕ ژی ڕوڵێ خوە هەبوویە و ل ساڵا 1928 ل چاپحانەیا فورات ل بەغدا پەرتووکا هۆزانێن خوە کو کۆمەک هەڵبەستێن هەژی بوون چاپ کرییە.
ماموستا کەریم وەرگێڕەکێ ب سلیقە ژی بوویە و ل زمانێ عەرەبی ڕە بابەتێن خوە بوسەر زمانێ کوردی وەرگێڕاینە.
ئەڤ زەڵامێ بلیمەتێ کورد پشتی ساڵانەکە زور ل خزمەت و بەخشینێ ژبو زمانێ کوردی ل ڕوژا #04-01-1996# و د ژیێ 96 ساڵیدە وەغەرا داویێ کر. [1]