ناڤ: موجتەبا
ناسناڤ: میرزادە
سالا ژ دایکبوونێ: 03-18-1946
ڕۆژا مرنێ: 07-17-2005
جهێ ژ دایکبوونێ: کرماشان
$ژیاننامە$
موجتەبا میرزادە ل سالا 1945ێ ل پارێزگەها کرماشانێ یا ڕۆژهەلاتێ کوردستانێ ژدایکبوویە. تا پۆلا پێنجێ بنەڕەتیی ل باژیڕێ ئیلامێ ژیایە و هەر ل وێرێ ژی دەست ب کارێ مۆسیقایێ کر. میرزادە بخۆ دبێژیت، ئەو ئێکەم کەس بوویە ل ئیلامێ ترس و شەرم ژ دلێ زارۆکان و گەنجان دەرئێخستیە بۆ ژەنینا مۆسیقایێ.
ژ دەستپێکا زارۆکینیێ، مامۆستا میرزادە ب بکارئینانا کەرەستەیێن دەوروبەری وەک کاسە و کەڤچک، پشتڕا ب ئامیرێن وەکی فلووت و سەنتوورێ، بێی مامۆستا شیایە مۆسیقایەکا سەرەتایی فێر بیت. ل پۆلا شەشێ سەرەتایی، دگەل خێزانا خۆ ڤەدگەڕیتە کرماشانێ. بابێ وی ژ بەر سەییدبوونا خۆ ڕازی نەبوو کو کوڕێ وی ل دویڤ کارێ مۆسیقایێ بکەڤیت، بەلێ ب پێداگریا و داخازیا ئێک ژ هەڤالێن بابێ وی، بابێ وی ڕازی بوو ڤیۆلۆنەکێ بۆ موجتەبا بکڕیت.
موجتەبا حەزژێکەرەکێ جددی یێ مۆسیقایێ بوویە، ب پەرۆشی و بێی ڕاوەستان ب شەڤ و ڕۆژ ڕاهێنان دکر. ل سالا 1959ێ چوویە ڕادیۆیا #سنە#یێ و ل وێرێ دگەل ئۆرکێسترایا ڕادیۆیێ ب سەرپەرشتیا مامۆستا #حەسەن کامکار#، بۆ ماوێ سالەکێ مایەڤە و گەلەک بەرهەم تۆمار کرن.
ل سالا 1960ێ ڤەدگەڕیتە کرماشانێ و ل تەمەنێ 15 سالیێ دچیتە ڕادیۆیا کرماشانێ. وەک مۆسیقاژەنەکێ گەنج، لێ ب شیانێن مەزن، سەدان بەرهەمێن بهادار و نەمر بۆ گۆرانیبێژێن کورد تۆمار دکەت، ژوانا گۆرانیێن حەسەن زیرەک و مەزهەر خالقی و گەلەک گۆرانیبێژێن دی.
پشتی کو حەسەن زیرەک ب پیلانا چەند کوردفڕۆشان و زۆردارییا ساواکێ ژ ڕادیۆیێ هاتە دەرئێخستن، مامۆستا میرزادە ژی ل وێرێ دلخۆش نەما. ژ بۆ بەردەوامکرنا خواندنا خۆ و زەنگینکرنا ئەزموونا خۆ یا هونەری، دچیتە تەهرانێ و د ماوەیەکێ کێمدا شیا جهەکێ بلند بۆ خۆ دەستڤە بینیت. هەمی بەرهەمێن فارسی شوونگەها هونەری یا وی پێڤە دیارن.
ژ بلی وێ چەندێ کو میرزادە بۆ گۆرانیبێژێن ناڤدارێن کورد و فارس مۆسیقا ژەنییە، پتریا بەرهەمێن فارسی و کوردی ژی هەر وی بخۆ ڕێکخستن و ئامادەکرنە.
ناڤبری ژبلی وێ چەندێ کو د ژەنینا مۆسیقایێدا ستایلەکێ تایبەت ب خۆ هەبوو، چەندین ئامیر ژی وەک ڤیۆلۆن، کەمانچە، سێتار و چەلۆ ب شێوەیەکێ مامۆستایانە و ل ئاستەکێ بلند دا دزانی.
هەژی گۆتنێ یە، میرزادە سەرپەرشتیا چەندین تیپێن مۆسیقایێ یێن ناڤدار کریە، ل چەندین وەلاتان کۆنسێرت کریە و بۆ 90 فیلمێن سینەمایی مۆسیقا چێکریە، کو بتنێ ناڤێ 35 فیلمان بەردەستن.
میرزادە ئاوازدانەر و مۆسیقازانەکێ نموونە و مامۆستایەکێ ب ئەزموون بوو کو د دیرۆکا مۆسیقایێ یا ڕۆژهەڵاتا ناڤیندا هەڤتایێ وی پەیدا نابیت. شایەتا ڤێ چەندێ ژی بەرهەم و ستایلێ هونەری یێ ناڤهاتی یە.
ب مخابنی ڤە، ل دەمەکێ کو گەلێ کورد گەلەک پێدڤی ب ڤان جورە بلیمەتانە، ل 07-17-2005ێ دلێ مامۆستا میرزادەیێ پڕ مێلۆدی بۆ هەتاهەتایێ ژ لێدان کەفت. ب کۆچکرنا ڤی بلیمەتێ هونەری، هونەرا کوردی ڕاستی زیانەکا مەزن هات. ب داخڤە، کورد و دەستهەلاتا کوردی نەشیا ژ بەرهەمێ هونەری و ژ ئەزموونا تایبەت یا ڤی سوارچاکی ل زانکۆیێن کوردستانێ مفایێ وەرگرن.
لیستا سترانبێژێن کورد و فارس کو میرزادە مۆسیقا بۆ وان ئامادە کریە یان ژەنییە:
سترانبێژێن فارسی: هایدە، مەهەستی، گوگوش، شەجەریان، ئەفسەر شەهیدی، عەهدیە، تاجیک، حومەیرا، مۆعین، ئومید، لەیلا فڕۆهەر، ئیرەج حاجی ئەمیری، هومایون کازمی، عەلی ڕەزا ئیفخاری، ئیرەج مەهدیان، گوڵپا، شەکیلا، پەروا، فەرزین، سوسەن، ئاغاسی و دەیان کەسێن دی.
سترانبێژێن کورد: حەسەن زیرەک، ماملێ، خەلیل سددیقی، ڕەزا سەققایی، عەزیز شاروخ، مورتەزا توندرەو، ئیبراهیم خۆشنەوا، مەزهەر خالقی، حسێن شەریفی، جەمشید عەزیزخانی، سەید محەمەد سەفایی و چەندین کەسێن دی.
هێژایێ گۆتنێ یە، مامۆستا میرزادە بخۆ دبێژیت: ل ناڤبەرا سالێن 1968 و 1978، چ گۆرانیبێژەک ل ناڤ فارساندا نەما کو من مۆسیقا بۆ نەژەنیبیت یان مۆسیقا بۆ ئامادە نەکربیت. ئەڤ چەندە نیشاندەت کو گەلەک بەرهەمێن میرزادە هێشتا بەرزەنە و ناڤێ گەلەک سترانبێژێن دی ماینە کو ناڤهاتی مۆسیقا بۆ وان ژەنییە و دڤێت هەول بهێتە دان کو ئەو ناڤ ژی بهێنە کۆمکرن و ب سەر ئەرشیفێ چالاکیێن مامۆستا میرزادە بهێنە زێدەکرن.
لیست و ناڤێ هندەک ژ فیلمێن سینەمایی کو (مامۆستا میرزادە) مۆسیقا بۆ وان چێکرییە:
تێبینی: مامۆستا میرزادە مۆسیقا بۆ نزیکی 90 فیلمێن سینەمایی و بەرنامەیێن تەلەفزیۆنی چێکرییە. ئێکەم کارێ وی یێ مۆسیقایێ بۆ فیلمێ سینەمایی دۆرۆشکەچی بوو.
• گل ها و گلولە ها (1370)
• درشکە چي (1350)
• مسافران مهتاب (1366)
• مدرک جرم (1364)
• حماسە مهران (1363)
• تفنگدار (1362)
• خانە عنکبوت (1362)
• جایزە (1361)
• دادا (1361)
• قرنطینە (1361)
• اعدامي (1359)
• پنجمین سوارسرنوشت (1359)
• بن بست (1357)
• زن و زمین-خوش غيرت (1357)
• صمد در بە در می شود (1357)
• نفس بریدە (1357)
• جای امن (1356)
• در امتداد شب (1356)
• صمد در راە اژدها (1356)
• میراث (1355)
• صمد خوشبخت می شود (1354)
• علي کنکوری (1352)
• عیالوار (1352)
• حکیم باشی (قیامت عشق) (1352)
• تختخواب سە نفرە (1351)
• خانە قمرخانم (1351)
• صمد و سامي، ليلا و لی لی (1351)
• مردی در توفان (1351)
• شاطر عباس (1350)
• صمد و قالیچە حضرت سلیمان (1350)
• عزیز قرقی (1350)
• عمو یادگار (1350)
• لوطي (1350)
• محلل (1350)
• کافی شو (بەرنامەی تەلەفزیۆنی)
[1] [2]