نامۍ: جەلال
نازنام: مەلەکشا
نامۊ تاتەی: ئەحمەد ڕەحیمی
نامۊ ئەڎێ: ئامینې
ڕۊ پېڎابییەی: #28-12-1952#
ڕۊ مەرڎەی: #10-08-2021ز.#
یاگې پېڎابییەی: #مەلەکشا _ سنە#
یاگې مەرڎەی: #سنە#
$ژیۋاینامە$
جەلال مەلەکشا، شاعېری نیشتیمانی، تاریخو (28-12-1952ز.) دلې دەگاو (مەلەکشای) شارو سنەی ئامان پېڎا. هەر ئەچا شارەنە وانانش و پەروەردە کریان. تافو گەنجیشەنە هۊگرو شېعرې و ئەدەبی بییەن.
جەلال مەلەکشا، پېسە ئینسانێ ئاشتیوازی نەتاواش زوڵم و ناداڎی قبووڵ بکەرۊن، هەر پەوکەی ڕاو ئانەینە ژیوای کۊششی ئەدەبی و فەرهەنگیش کەرد، وەشی ژیوایش کەرد قوربانەو ویرو باوەڕەکەیش.
هەرچن وەڵتەر بە فارسی نویستەنش، بەڵام دماتەر زاتو قەڵەمیش ئامانەرەو بە زوانی ئەڎایی وېش نویستەنش.
بڕێ جە شېعرەکاش پەی سەرو چن زوانێ لاییڎەی هورگېڵیێنې.
جەلال مەلەکشا، یۊن ئەچا نویسەرا هەکە هەرگیز قەڵەمش پەی ژیوای وېش و وەشی دنیێش نەوستەن هەرمانە، ئاڎ هەم شاعېر بییەن و هەم ڕۊنامەوان، بەڵام پەی خزمەتو ئەدەب و فەرهەنگو میللەتەکەیش، چاگەیچۆ پەی مەسەلې هەقەو نەتەوەکەیش.
نامې تاتەیش ئەحمەد ڕەحیمی مەلەکشان و ئەڎایچش ئامینې گەوێڵی کێڵانەیەنە. جەلال یەکەم زاروڵەو خانەوادەکەیش بییەن، یەرې واڵې و یەرې برێش بیېنې. تافو زاروڵەییشەنە وەر چانەی بلۊنە وانگا چېرو کاریگەری مامۊیشەنە عەبدولڕەزا فېرو وانای و نویستەی کورڎی بییەن، پېسە وېش باسش کەردەن: (پەڼج ساڵې بېنا، کە مامۊم بە هاندای و بە زۊر شېعرې شائېرانو کلاسیکی پېسە نالی و مەحویم پەنە وەرکەرې). تەمەنو هەشت ساڵینە تاتەش دلې فەرمانگاو کشتوکاڵو سنەینە مەرزیۊرە، ئیتر بە یانۆ ملان پەی دلې شارو سنەی و چاگە نیشتەجایې مەبان. چوونکی تەمەنش سەری هەشت ساڵی بییەن بە زامەت دلې وانگاو شارو سنەینە وەرمەگېریۊن، هەم بە مەڵامەتو بارو زروفو وڵاتو ئېرانی و قەڎەغەبییەی وانای بە زوانی ئەڎایی، بە ناچاری بە زوانی فارسی وانانش. قۊناغەکې وانای سەرەتاییش دلې وانگاکانو (شېخ موھاجیر) و (سەعدی) و (چواری ئابان) و (سەعدی ژمارە 2) تەمامنان و قۊناغەکې میانی و دمای میانیش دلې وانگاو (شاپوور) و (بووعەلی) و (ڕازی) و (غەزاڵی) و (ھیدایەت) بڕیېنې و دیبلۆمی وېژەییش جە زوانی فارسینە وەرگېرتەن.
ژڵېوەی ڕامیاری:
جەلال مەلەکشا، تەمەنێ کەمەنە تېکەڵو کایې ڕامیارې مەبۊن، ئاڎ کە بە نویستەی شېعرې و ڕازا بە پەلە تاواش یاگې وېش دلې ڕۊنامە و گۊڤارە فارسیەکانە بکەرۊوە، چڼیین جاری بە مەڵامەتو نویستەی و ویروباوەڕەکاشۆ کۆتەن چېرو وەنەپەرسایۆ ساڤاکی و ڕەوانەو زیڼانی کریان. زیڼان پەی مەلەکشای مەبۊن بە زانشتگێوە و دلې زیڼانینە چەنی چڼیین کەسە ڕامیارا سەربە پارتە کورڎیەکا ئاشنایی پېڎا مەکەرۊن و ئاشناو ویر و باوەڕەکاشا مەبۊن. تەمەنێ کەمەنە تېکەڵوو کاری ڕامیاری مەبۊن. وەڵې شوڕشو گەلانو ئېرانی جەلال مەلەکشا پېوەڼیی مەکەرۊن بە سازمانو چریکو فیدائییانی جە کوردەسان و تاکو کۊتاو دەسەڵاتو ڕژېمو شایی پېسە ئەندامو ئا پارتەیە مەنۊوە. ئا کار و ژڵېوە ڕامیاریې دلې بەرهەمەکاشەنە بە تایبە شېعرەکاشەنە ڕەنگە مڎاوە. دماتەر دلې ژڵېوەی حېزبینە مەکېشیۊوە، دلې واتە و واچێنە ماچۊ: (بنیاڎم نمەتاو وېش جە سیاسەتی دوور بوزۊوە، بەتایبەت خاوەن قەڵەم! بەڵام نمەبۊ هونەر و ئەدەب چوارچېوەو حېزبێنە تۊقە بڎریۊن، پېوەزبییەی بە پارتێ سیاسی، یام ئایدولوژیێ، ئازاڎی ویر و ئەندېشەی دلېنە مەبەرۊن).
ئی شاعېرە زامەتکېشەو کورڎی تاریخو (10-08-2021ز.) جە شارو سنەی یانەئاوایی یەکجاریش کەرد و بە ئاواتە ناکامەکاشۆ سەرەش نیاوە.
ئەسعەد ڕەشید. [1]