دەقی گوتارەکەی #نێچیرڤان بارزانی#:
بنەماڵەی خوالێخۆشبوو کاکە د. ڕۆژ،
هەڤاڵان، هاوخەبات و هاوسەنگەرانی کاکە ڕۆژ،
هەموو لایەکتان بەخێر بێن بۆ ڕێوڕەسمی ساڵوەگەڕی کۆچی دواییی هەڤاڵ و تێکۆشەر و پێشمەرگە و خۆشەویستی هەموو لایەکمان، کاکە ڕۆژ.
ئەمڕۆ هەموومان لێرە کۆبووینەتەوە بۆ ڕێزگرتن و دەربڕینی وەفا و خۆشەویستی بۆ ئەو تێکۆشەرە، بۆ ئەو خەباتکارە کە بە خەباتی خۆی، بە دڵسۆزیی خۆی بۆ کوردستان، بۆ حزبەکەی، بۆ ڕێبازەکەی تا دوایین هەناسەی ژیانیشی لەسەری بەردەوام بوو و وەفادار بوو بۆ ئەو خەباتە، بۆ ئەو ڕێبازە، بۆ کوردستان، بۆ کوردایەتی و بۆ حزبەکەی.
یادی ئەو خۆشەویستە هەمیشە دەمێنێتەوە، هەمیشە بە سەربەرزی یادی دەکەینەوە بۆ هەموو ئەو قەرەمانیەتی و خۆشەویستییەی لەناو دڵی پێشمەرگەی کوردستان، لەناو دڵی کوردستان و لەناو دڵی هەڤاڵانی خۆیدا هەیبوو. ئەمڕۆ یادی ئەو مامۆستایە گەورەیە دەکەینەوە.
من وەک شەخس شەرەفی ئەوەم هەبوو ماوەیەک لەگەڵ کاکە ڕۆژ وەک جێگری سەرۆک وەزیران لە حکوومەتی هەرێمی کوردستان کارم کردووە، پێش ئەوەش ساڵانی دوای 1987 کاتێک کاکە ئیدریس ئەمری خوای کرد هەر لەو کاتەوە، بەیەکەوە بووین و لە هەموو قۆناغەکاندا کاکە ڕۆژ کەسێکی جددی بووە و هەمیشە هەوڵی داوە بە دڵسۆزی و وەفاداری بۆ وڵاتی خۆی و بۆ حزبەکەی خۆی کار بکات.
ئەگەر سەیری مێژووی پارتی دیموکراتی کوردستان بکەین، دوای نسکۆی ساڵی 1975 و بەتایبەتی پێش کۆنگرەی نۆیەمی پارتی دیموکراتی کوردستان، پارتی لە قۆناغێکی یەکجار زۆر سەختدا بوو، بە هەموو شێوەیەک هەوڵ دەدرا پارتی گۆشەگیر ببێت، بە هەموو شێوەیەک هەوڵ دەدرا و هەرچی پلان هەبوو دەگێڕدرا بۆ ئەوەی پارتی هەم لەڕووی سیاسییەوە، هەم لەڕووی سەربازییە و لە هەموو ڕوویەکەوە گۆشەگیر بکرێت، بەڵام نەوەیەک کۆڵی نەدا.
من بەو نەوەیە دەڵێم نەوەی زێڕینی پارتی دیموکراتی کوردستان، ئەو نەوەیەی دوای نسکۆی ساڵی 1975 و بەتایبەتی دوای کۆنگرەی نۆیەم دەستیان بە خەبات کرد و نەوەستان تا ئەو کاتەی حزبەکەیان بە سەرکەوتوویی هێنایەوە قۆناغی خەبات و تێکۆشان. ئاسان نەبوو، من ئەو کاتە بە تەمەن زۆر زۆر گەنج بووم، بەڵام دەمبینی.
هەندێک لەو هەڤاڵانە کۆچی دوایییان کردووە و یادیان بەخێر، هەروەها هەندێک لەو ئازیزانە، لەو تێکۆشەرانە، لەو خەباتکارانە کە پارتی پێی سەربەرزە، ئەمڕۆ لێرە دانیشتوون، ئەوان جێگەی شانازیی بەندە و هەموو ئەندامانی ئەم حزبەن کە چۆن بە تێکۆشان، بە خۆماندووکردن، بە قۆناغی سەختی شاخ و دوای ئەوە لە قۆناغی دوای ڕاپەڕین و هەتا ئەمڕۆش سەربەرزانە بە سەرکەوتوویی سەرکردایەتیی حزبەکەیان کردووە و توانیان دەستکەوتی زۆر گەورە هەم بۆ گەلەکەیان، هەم بۆ پارتەکەیان و هەم بۆ کوردستان بەدەست بهێنن و هەموویان جێگەی شانازین.
یادی ئەو خۆشەویستانە بەخێر و هیوای تەمەندرێژی و سەرکەوتن بۆ ئەو بەڕێز و خۆشەویستانە دەخوازم، کە ئەمڕۆ لێرە دانیشتوون، بێ ئەوەی ناو بهێنم خۆیان لێرەن و تەشریفیان هێناوە. ئێمە شانازی بەو نەوەیەوە دەکەین کە لەو قۆناغە سەختانەدا ئاڵای خەبات و تێکۆشانانیان هەڵگرت و پارتییان بە سەربەرزی گەیاندە ئەمڕۆ.
ئەزموونی خۆم وەک شەخس لەگەڵ کاکە دکتۆر ڕۆژ کە جێگری سەرۆکی وەزیران بووم، دەتوانم لە چەند دێرێکدا بڵێم: کاکە ڕۆژ هەوڵی بەردەوامی ئەوە بوو، حکومەتێکی دامەزراوەیی لەم وڵاتەدا دروست بکات و بەردەوام تێکۆشانی بۆ ئەوە دەکرد، کە بناغەی حکومڕانییەکی دروست و دامەزراوەیی لەم وڵاتەدا دابمەزرێت.
لە دانوستانەکان دەمدیت ئەوەی کە تایبەت بوو لە کاکە ڕۆژ، ئەوە بوو کە لە هەموو دانوستانێک هەوڵی دەدا خاڵە هاوبەشەکان بدۆزێتەوە، بۆ ئەوەی هەموو لایەنێک لە دانوستانەکان خۆیان بە براوە بزانن و ئەمە شتێکی زۆر تایبەت بوو.
خۆم شەخسی هەوڵم دەدا لە هەموو ئەو دانوستانانەی ئەنجام دەدرێن چ لە ناوەخۆ و چ لە دەرەوە و چ لەگەڵ بەغدا، هەمیشە هەوڵم دەدا کاکە ڕۆژم لەگەڵ بێت، چونکە کاکە ڕۆژ هەوڵی دەدا شتێک بدۆزێتەوە کە هەموو لایەک هەست بە سەرکەوتن بکەن. زۆر پەرۆش و خەمخۆری یەکڕیزیی ناوماڵی کورد بوو.
بیرم دێ لە گەرمەی شەڕی ناوخۆ لەگەڵ خوالێخۆشبوو کاکە فەلەکەدین کاکەیی، ئه و کاتە بابەتێکیان نووسی و بۆ کۆتاییهێنان بە شەڕی ناوەخۆ، پێشنیازی ئەوەیان کرد، کە پارتی و یەکێتی دەبێت ببن بە یەک حزب، تا ئەو ڕادەیە ڕۆیشت لە پەرۆشی و خەمخۆریی خۆیەوە بۆ یەکڕیزیی کورد.
ئەو کاتە و ئێستاش مەرجی سەرکەوتنی هەموومانە کە کورد دەبێت یەکڕیز بێت، دەبێت یەک دەنگ بێت بۆ دەستکەوتەکان نەک بۆ پۆست و پایە. دەبێت هەموومان بەیەکەوە بین چونکە باوەڕی ئەو بەڕێزە وابوو، کە قۆناغی زۆر سەختمان لە پێشە، باوەڕی وابوو کە تا ئێستا زۆر بەداخەوە بەغدا ئەو بیرۆکەی کە دەبێت دەستوور حەکەم بێت، تا ئێستا لە بەغدا جێگیر نەبووە، ئەگەر ئێمەش یەکڕیز نەبین بەداخەوە ناتوانین دەستکەوتەکانی خۆمان بپارێزین و پەرەی پێ بدەین.
دەبێ هەوڵ بدەین ئەو دەستکەوتانە بە یەکڕیزی بپارێزین و پەرەیان پێ بدەین و خەباتی پێکەوەیی بکەین بۆ ئەو ئامانجانەی لە پێناویاندا زۆر قوربانیمان داوە چ یەکێتی و چ پارتی و چ لایەنە سیاسییەکانی دیکەی کوردستان هەموومان بەیەکەوە.
ئەوەی ئەمڕۆ هەمانە، لە سایەی خەبات و تێکۆشەرانی وەک کاکە ڕۆژ و هەڤاڵانی دیکە و هەموو ئەو پێشمەرگە قارەمانانەیە کە خوێنی خۆیان بەخشی لەپێناو ئازادی و سەرفرازی و بەرگریکردن لە وڵاتەکەمان. پێویستە ئێمە لەسەر ئەو ڕێبازە بەردەوام بین کە ڕێگەیەکی یەکجار دوورمان لەپێشە.
کاکە ڕۆژ فەرماندەیەکی پڕ بە مانای وشە سەربازی بوو، داستانەکانی بەرگری و خۆڕاگری وەک کاکە فازل ئاماژەی پێدا، هەر لە بادینانەوە تا دەگاتە قەرەداغ و شوێنەکانی دیکەی کوردستان، شایەدی ئەوەن، کە کاکە ڕۆژ چەند سەرکەوتوو بوو لە مەیدانی خەباتی سەربازیدا.
کاکە ڕۆژ خەڵکی شاری خۆشەویستی #سلێمانی# بوو، لە باوک و لە دایکەوە ماڵێکی تێکۆشەر بوون، کەسێکی خەڵکی سلێمانی مەجلیسخۆش بوو، لەگەڵ ئەوەشدا کەسێکی تا بڵێی کوردستانی و کوردپەروەر بوو، هەموو هەوڵێکی دەدا بۆ یەکڕیزی و تەباییی گەلی کوردستان.
کاتێک سەرۆکی پەرلەمان بوو، هەوڵی جددیی ئەوە بوو، ئەو یاسایانە تێپەڕێنێت کە کاریگەریی هەبێت لەسەر ژیانی هاووڵاتیانی هەرێمی کوردستان. ئەمانە هەموو ئەو یادەوەرییە خۆشانەن، ئەو شتانەن کە یادی کاکە ڕۆژ وەک تێکۆشەر و خەباتکارێک بە زیندوویی لای هەموو تێکۆشەر و خەباتکارێکی ڕێبواری ئەم کوردستانە دەمێنێتەوە، جا لە هەر لایەنێک بن.
دڵنیام لەوەی نەک تەنیا پارتی دیموکراتی کوردستان شانازی بەو ڕۆڵەیەوە دەکات، دڵنیام لەوەی لایەنەکانی دیکەش ئەو ڕێز و خۆشەویستییەیان بۆ کاکە ڕۆژ هەیە و دەمێنێتەوە. دەمبینی لە دانوستانەکانی خۆمان لەگەڵ برایانی یەکێتی، لەگەڵ لایەنەکانی دیکە چ ڕێزێکیان بۆی هەبوو.
لەم ڕۆژەدا دووبارە سەری ڕێز و نەوازش بۆ هەموو شەهیدانی کوردستان دادەنوێنین. سەری ڕێز بۆ خەبات و ماندوبوون و گیانی کاکە ڕۆژ دادەنوێنین، یادی ئەو بەڕێزە بەخێر بێت. ئه و هەمیشە بە تێکۆشان و خەبات و بە بەرخۆدانی، لە یاد و یادەوەریی هەموو تێکۆشەرێک و دڵسۆزانی ئەم کوردستانەدا دەمێنێتەوە، جەخت لەو ڕێبازە دەکەینەوە، کە کاکە ڕۆژ خەباتی بۆ کرد و بەردەوام دەبیت.
جەخت لەوە دەکەینەوە کە بە یەکڕیزی و بە یەکبوون و بەیەکەوە هەر هەموو لایەکمان دەبێت هەوڵ و تێکۆشانمان بەردەوام بێت بۆ بەدەستهێنانی مافە دەستوورییەکانی هەرێمی کوردستان سەرەڕای هەموو جیاوازییەک، سەرەڕای هەموو بۆچوونێک کە ڕەنگە بۆچوونی جیاوازیشمان هەبێت، بەڵام مەرجی سەرکەوتنمان و مەرجی تێپەڕاندنی ئەو قۆناغەشمان تەنیا و تەنیا ئەوەیە یەکڕیز بین و بەیەکەوە بین. بە پێکەوەبوون زۆر دەستکەوتمان دەستدەکەوێت، بە ترازان و دوورکەوتنەوە، دڵنیاتان دەکەمەوە هیچ لایەنێک لە کوردستان هیچ شتێکی دەستناکەوێت.
بە هیوای ئەوەی کە کوردستان هەر ئاوەدان بێت و پەنا بەخوا بەرەو باشتریش بڕوات و ئەم قۆناغە سەختەش تێپەڕێت.
ئێوەش هەر لە خۆشیدا بن، یادی کاکە ڕۆژیش بە خێر بۆ هەموو لایەکمان.
بەخێر بێن سەرچاو
زۆر سوپاس[1]