Di gel şert û mercên dijwar de, 6ʹemîn Pêşangeha Pirtûkan a Şehîd Herekol dest pê kir ku îsal diyarî giyanê helbestvan
CegerxwînCegerxwîn hate kirin. Endamê Komîteya Amadekar Ebdullah Şêxo anî ziman ku pêşangeh ji bo herêmê pêngaveke çandî ya mezin e û piştgiriya tevgera çandî li Bakur û Rojhilatê Sûriyeyê dike û di navbera herêmê û cîhanê de navgîneke çandî ye.
Bi destekdayîna Desteya Çand û Hunerê ya Bakur û Rojhilatê Sûriyê û serperiştiya Desteya Çandê ya herêma
CizîrêCizîrê, duh 6ʹemîn Pêşangeha Pirtûkan a Şehîd Herekol bi dirûşma Pirtûk samanê cîhanê ye li bajarê Qamişlo li hola Zana dest pê kir. Her wiha bi hezaran kesayetên çandî lê hazir bûn.
PÊŞANGEH DI NAVBERA HERÊM Û CÎHANÊ DE NAVGÎNEKE ÇANDÎ YE
Endamê Komîteya Amadekar a pêşengehê Ebdullah Şêxo destnîşan kir ku 6`emîn pêşengeha pirtûkan armanc jê ew e ku çanda xwendinê li herêmê berfireh bikin û destekdayîna nivîkaran û xwendevanan bikin.
Şêxo piştrast kir ku Ev pêşangeh li herêmê pêşveçûneke çandî ye, ji ber ku herêm berî sala 2011`an hatibû paşguhkirin û qada çandî û wêjeyî tenê bi paytext û bajarên mezin sînordar bû ku di encamê de nivîskar û xwêner neçar bûn biçin wir. Li gorî Şêxo piştî şoreşê rewş hate guhertin û gelek pêşangeh û çalakiyên li dar dikevin.
Têkildarî rewşa wêjeyê li Bakur û Rojhilatê Sûriyê Şêxo diyar kir ku li gel şert û mercên şer, û koçberiyê de, pêşangehê ji sala 2017`an ve armancên xwe pêk anîn û wiha domand: “Rewşa pirtûk û xwendinê li herêmê baş e û bi rêya lidarxistina çalakiyên hunerî û pêşangehan mîna ya şehîd Herekol ber bi rewşeke baştir ve berdewam dike.”
Zêdetirî 50 weşanxane, nivîsgeh, saziyên çandî û navendên lêkolînê yên Bakur û Rojhilatê Sûriyê, Şam, Heleb, Lazîqiyê, Iraq, Başûr û Bakurê Kurdistan, Misir, Tirkiye, Balçîka û Ewropayê beşdarî pêşangehê bûne.
Di pêşangehê de 130 hezar pirtûk bi 13 hezar serenavên çandî, dîrokî, wêjeyî, siyasî û civakî hene. Her wiha di pêşangehê de ji bo pirtûkên jin û zarokan bi zimanên Erebî, Kurdî (Kurmancî, Soranî û Zazakî), Ingilîzî û Francî beş hatin vekirin.
HEWLDANÊN DESTEYA ÇANDÊ HENE KU NIRXÊN PIRTÛKAN KÊM BIKE
Têkildarî buhaya pirtûkan, Şêxo da zanîn ku rexneyên ji bo bihabûna pirtûkan di cih de ye û wiha domand: “Lê belê asta kirîna pirtûkan ji aliyê xwêner ve kêm e. Her wiha pelik ji derve tên. Li aliyekî din, piraniya pirtûk li derveyî Sûriyê tên çapkirin. Ji ber wê lêçûna anîna wê û mafên belavkirinê lê zêde dibe.”
Der barê destekdayîna Desteya Çand û Hunerê de ya bo xwêneran, Şêxo eşkere kir ku deste hewl dide ku destekê bide weşanxaneyan da ku nirxên hin pirtûkan kêm bike, li aliyekî din gelek beşan, tanzîlat li ser pirtûkan çêkirine.
JI NAVA DORPÊÇ Û ASTENGIYAN PÊŞANGEH HATE VEKIRIN
Şêxo wiha domand: “Li pêşiya pêşangehê gelek astengî û pirsgirêk detketin. Di gel ku dorpêç û girtina dergehan ku bû sedem gelek weşanxaneyên ji Başûr û Bakurê Kurdistanê tev li pêşangehê nebin, pirsgirêk û lêçûna anîna pirtûkan ji dewletên din û li aliyekî din jî anîna pirtûkan ji herêmên hikumeta Şamê destûrê dixwaze û dibe jî ev destûr neyê dayî. Lê belê tevî hemû van astengiyan jî me pêşangeh vekir.”
Di pêşengehê de panel, şahiya îmzekirina pirtûkan, berhemên hunerî, muzîk, pêşbirkên çandî û belavkirina pirtûkan weke xelat li ser mêvanan têne lidarxist. Her wiha biryar e ku pêşangeh di 29`ê Cotmehê de bi xelatkirina nivîskar, wêjevan û weşanxaneyên ku beşdar bûne, bi dawî bibe.
Hêjayî gotinê ye ku Pêşangeha Pirtûkan a Şehîd Herekol li Qamişlo sala 2017`an ji bo bîranîna nivîskar û têkoşer Hisên Şawîş (Herekol) ku di sala 2016’an de şehîd bû, hate lidarxistin.
[1]