Agahiyên şehîd:
Nasnav: Ferman Kerîm
Nav paşnav: Mesût Eren
Cihê jidayikbûnê: Şirnex
Dayik-Bav: Taybet-Bûrhan
Dem û cihê şehadetê: 5'ê Mijdara 2022 / Zap

Kurtejiyana şehîd:
Hevrêyê me Ferman weke ewladekî leheng ê xelkê me yê Botanê yê welatparêz ji dayik bû, ku xelkê me yê vê herêmê di Têkoşîna Azadiyê ya Kurdistanê de gelek berdêl daye, ji destpêka têkoşîna me ve gelek fermandarê pêşeng gihandiye. Hevrêyê me Ferman jî ji ber derdora li nav mezin bû, partiya me PKK ji zarokatiyê ve nas kir. Hîn di ciwantiyê de polîtîkayên bêhişkirin û qutkirina ji koka xwe ya dewlet Tirk a faşîst mêtinger a di şexsê ciwanan de li ser gelê Kurd ferz dike, nas kir û li hemberî van polîtîkayan bû xwedî hêrseke mezin. Têgihişt ku bersiva herî bi wate û mezin a li hemberî polîtîkayên îmha û qirkirinê yên dewleta Tirk a faşîst, tevlîbûna li nava refên gerîla ye. Hevrêyê me Ferman bi vê biryara xwe nîşan da ku her ciwanekî Kurd ê bi rûmet li dijî van polîtîkayên dewleta Tirk ên li ser gelê me divê kîjan rêyê hilbijêre.
Hevrêyê me Ferman sala 2013'an berê xwe da gerîla û piştî ku perwerdeya şervanên nû wergirt, li Garê dest bi pratîkê kir. Di kar de kedeke mezin da û bi tevlîbûna xwe ya bêfikar û fedakar di nava hevrêyên xwe de bû cihê hezkirin û hurmetê. Ji roja ku tevlîbû û pê ve, ji xwe re kir esas ku xwe di felsefeya Rêber Apo de kûr bike û têkoşîna vê jî bi xurtî meşand. Hevrêyê me Ferman neheqiya herî biçûk a li hemberî gelê Kurd qebûl nekir, li hemberî êrîşên çeteyên DAÎŞ'ê ku bi piştgiriya dewleta Tirk a faşîst komkujî li gelê Kurd dikir, ji bo gelê me biparêze cihê xwe di nava çeperên şer de girt. Hevrêyê me Ferman bû parçeyek ji têkoşîna mezin a ku mirovahî ji faşîzma tarî ya çeteyên DAÎŞ'ê rizgar kir. Her ku ji aliyê leşkerî û îdeolojîk ve xwe bi pêş ve bir, ber bi fermandarbûyînê ve bi gavên ji xwe bawer meşiya. Bi wêrekî û bêtirsiya xwe tevlî gelek pêngav û operasyonan bû, li dijî çeteyan sîng bi sîng şer kir, bû xwedî tecrûbeyên mezin û gelek caran birîndar bû. Bi têkbirina DAÎŞ'ê re berpirsyariya xwe ya dîrokî bi serketî bi cih anî û careke din berê xwe da çiyayên Kurdistanê.
Hevrêyê me Ferman sala 2017'an bi baweriya ku di felsefeya Rêber Apo de hîn kûrtir bibe û li ser xeta Zîlan bi tevlîbûneke fedaî têkoşîna xwe mezintir bike, beşdarî nava karên Hêzên Taybet bû. Li vê derê danheviyên xwe yên leşkerî bi kûrbûnê xurtir kir û weke fermandarekî pêşeng tevlî pratîkê bû. Li qadên lê mayî bi çalak tevlî hemû çalakiyan bû, cihê xwe di nava pêvajoya pêngavî ya li Xakurkê de girt ku li hemberî êrîşên dijmin hatin kirin. Hevrêyê me Ferman bû yek ji kedkarên mezin ên bicihanîna gerîlatiya serdema nû û rêbaza şerê tîm ê profesyonel. Bi baweriya ji gerîlatiya serdema nû û rêbaza şerê tîm ê profesyonel, li ber her cûre teknîka şer a dijmin rabû, li rê û rêbazên têkbirina teknîkê geriya, pêşengî di pratîkê de kir û di vê mijarê de jî serketî bû. Bi taybetî di êrîşa artêşa Tirk a Sibata 2021'ê ya li ser kampa Siyanê ya Garê de, bû yek ji fermandarên tîm ê fedaî ku tevî fermandar fedaî ya nemir hevala Sara Tolhildan Goyî destpêkê kete nava liv û tevgerê, di nava şert û mercên giran de teknîka dijmin pûç kir û xwe gihand Siyanê. Hevrêyê me Ferman bi tecrûbeyên ji vê pêvajoyê wergirtî, tevkariyeke mezin li pêşvebirina rêbaza şerê tîm ê profesyonel ê sala 2021'ê kir.
Artêşa Tirk a ku li Garê têk çû, piştî ku Nîsana 2021'ê berê xwe da Zapê, hevrêyê me Ferman jî bi tîmên pispor derbasî Zapê bû. Ji bo pêngavên şoreşgerî yên li xeta Cîloya Biçûk û Ertûşê hem pêşengî kir hem jî bi rengekî çalak tevlî bû. Hevrêyê me Ferman ku armanca xwe lêdana li dijmin bû, moral û biryardarî dida derdora xwe, di nava şerê tîm ê pispor ê dema nû de danheviyeke girîng bi dest xist û sekna fermandariya pêşeng a vê yekê nîşan da. Bi dilnizmiya xwe û tevlîbûna xwe ya bi moral reng da jiyana hevrêyên xwe, cihê xwe di dilê hevrêyên xwe hemûyan de girt. Hevrêyê me Ferman ji xwe re kir wezîfe ku tecrûbeyên xwe bigihîne hevrêyên xwe, li ser vê bingehê nêzî hevrêyên xwe bû û timî derdora xwe bi pêş ve dibir. Hevrêyê me Ferman tecrûbeyên xwe di dema êrîşên dagirkeriyê yên sala 2022'an de jî derbasî pratîkê kir û li gelek herêmên Zapê di berxwedanê de bi roleke çalak rabû. Di şer û jiyanê de bû hêza birêvebirinê, di şerê tîm ê bi tevger û tunelên şer de êrîşên dijmin hemû bi hostatî pûç kir û xwe gihand asteke bi vî rengî ya leşkerî. Herî dawî li çeperên şer ên Şehîd Xursî 3 mehan fermandarî ji berxwedana destanî re kir, xurtbûna PKK'ê bi lêdana derbên giran her carê nîşanî dijmin da. Fermandarê fedaî hevrêyê me Ferman tevî hevrêyên xwe, îradeya Apoyî li ser tevahiya jiyanê serwer kir, di êrîşa bi çekên kîmyewî ya nemerdane ya dijmin de şehîd bû û cihê xwe yê bi rûmet di karwanê şehîdan de girt. Hevrêyê me Ferman di nava PKK'ê de bi ciwantî gelekî bi pêş ve çû, xwe gihand asta fermandariyê, her tim li ser xeta fedaîtiyê meşiya û bû fermandarê pêşeng. Bi baweriya xwe ya li taktîk û rêbazên gerîla yê dema nû, di pratîkkirina gerîlatiya serketinê de, rêya serketinê û rêbaza şerê rast nîşanî me hevrêyên xwe da.[1]