Bi hunera destan kevneşopiyê didomînin
Pencşem, 19 Çile 2023

Li ser riya sereke ya taxa Kornîş a Qamişlo dikanek balê dikişîne. Di dikana ku berhemên hunerên destan tên pêşandan de, keda destê jinan derdikeve pêş.
Dikan demek dirêje hatiye vekirin û piranî wêneyên kesayetên navdar hatine xêzkirin û berhemên hunera zilaman dihat pêşandan. Lê ev salek dawiye ku jin jî tê de kar dikin û hunera destên xwe nîşan didin.
Li dikanê 2 jin kar dikin, lê çend jinên din jî li malên xwe berheman çêdikin û li dikanê didin pêşandan.
Di nava hunerên destan ên jinan de Şahmaran, kemerên cilên Kurdî, bazinên destan, destmal, berhemên xemla malan, çenteyên milan û hwd. balê dikişînin.
Yek ji jinên ku li hunera xwe pêşkêş dike Cîhan Xefûr a ji gundê Til Mensur ê girêdayî bajarê Hesekê ye. Cîhan a ku beşa hunerên destan xwendiye, ev 20 salin bi vî karî re mijûl dibe û berhemên xwe li gelek pêşengehan pêşkêş kirine. Demekê jî zarok fêrî çêkirina hunerên destan kirine.
Cîhan niha bi komek jinan re berhemên xwe çêdike û li dikanê pêşkêş dike. Cîhanê karê hunera destan ji zarokatiya xwe ve fêr bûye. Li gorî Cîhanê, di zarokatiya xwe de vê hunerê pir bala wê kişandiye, ji dayika xwe pirsî ye û ji mamosteyek Suryanî ev hûner fêr bûye. Cîhan dibêje ku gelekî ji karê xwe hes dike û dixwaze wekî parastina perçeyek çandê jî bidomîne. Li gorî Cîhanê di rojên pîrozbahî û cejnên Kurdî de, eleqeya jinan ji bo van berheman zêde dibe.
Jina ciwan a bi navê Hêvîn Hiso jî ev nêzî 5 meh e li vir hunera xwe pêşkêş dike. Huner destan gelekî bala Hêvînê jî kişandine, lewra biryara destpêkirina xebatê daye û li gel hevalên xwe yên li dikanê berheman derdixîne holê.
[1]