ناونیشانی بابەت: حکومەتی بەتاڵ
ئامادەکردن و نووسین: #عەبدوڵڵا کەریم مەحمود#
دوای گۆڕانکارییەکانی 09-04-2003 , هەڵبژاردنی پەرلەمانی عێراق لە بەغداد ، سەرکردایەتی سیاسیی کورد و حیزبەکانی کوردستان ، لە پەرلەمانی عیراق و حکومەتی عێراق ، ئەوەنده ی دژایەتی ناڕەوای یەکتریان کرد و هەڵپەیان بۆ بەدەست هێنانی کورسی دەسەڵات و دەستکەوت کرد .
میدیا زەبەلاحەکانیان بۆدروست کردنی درۆ و تۆمەت و بوختیان هەڵبەستن بۆ یەکتریی ، ئەوەندە خاوەنی ستراتیژی وتاری نەتەوەیی نەبوون ،
بەمەش سیناریۆو نمایشی بەتاڵ و خاڵە لاوازەکانی ململانێ ی ناڕەوای سەرکردە سیاسییەکان و حکومەتی هەرێم و پەرلەمانی کورد لە بەغداد کەوتە ڕوو.
پەرلەمانتارانی کورد ، نەیانتوانی بە یەک دەنگ و بە یەک هەڵوێست ، لە ناو هۆڵی پەرلەمانی بەغدادی پایتەختەوە ، زنجیرە کۆمەڵکوژی و ئەنفال و کیمیا باران و گۆڕەبەکۆمەڵەکانی گەلەکەیان بگەینە ئاستی عێراق ، ویژدانی ئەندام پەرلەمانی لیستە جیا جیاکانی عێراق بهەژێنن .
نەیانتوانی جینۆسایدی کورد لە گۆڕەبە کۆمەڵەکانەوە بکەن بە دۆکۆمینتێکی نیودەوڵەتی ، لە هۆڵی پەرلەمانی عێراقەوە بیگەیننە جیهان .
نەیانتوانی نوێنەری دەنگ و ڕەنگی داوا سەرەتایی و مافە دەستوورییەکانی کورد بن ، نەیان توانی له و چەند خولەی پەرلەمان و حکومەتی عێراق کێشه و قەیرانە ئاڵۆزکراوەکانی کورد چارەسەر بکەن.
ئەندام پەرلەمانەکانی کورد لە بەغداد ، نەیانتوانی سنووری سروشتی باشووری کوردستانی لەسەر نەخشەی جوگرافیای عێراق ی نوێ دیاری بکەن .
کوا ئه و پلان و بەرنامه و نەخشانەی بۆجێبەجێکردنی مادەی 140 دیاری کرابوو؟ ، بەجۆرێک کاڵ کراوەیەوە لەوەدەچێ شوێنەواری نەمابێ .
نەیانتوانی بە حکومەتی نوێی عێراق ڕاگەیەنن ، دادگای باڵای تاوانبارانی عێراق لە ناوچە سەوزی بەغداد ، کۆمەڵکوژی فەیلییەکان و بارزانیەکان و ئەنفال و کیمیا بارانی #هەڵەبجە#ی بە جینۆساید داناوە ، کوا بۆ تا ئێستا حکومەتی نوێی عێراق مەرسومی جمهوری دەر نەکرد وە، بۆ حکومەتی عێراق دوای لێبوردنی لە کورد نەکرد ، بۆ قەرەبووی یاسایی و مادی و مەعنەوی کورد نە کرانەوە ،
بەڵام قەرەبووی جینۆسایدیی کوێتیەکان کرایەوە.
نەیان توانی بە هەماهەنگی پەرلەمانی لیستە جیا جیاکان ، فشار بخەنە سەردەوڵەتی عێراق ، عێراق ببێ بە ئەندامی دادگای نیودەوڵەتی ، بۆ ئەوەی جارێکی تر کورد ، ئەنفال و جینۆساید نەکرێتەوە ، دادگای باڵای تاوانبارانی عێراق وا بە ساردوسڕی دانەخرێ.
بۆئەندام پەرلەمانەکانی کورد لە بەغدادو #هەولێر# بواریان ڕەخساند ، سەکردایەتی سیاسی کوردو حکومەتی هەرێم و حیزبە سیاسییەکانی کوردستان بڕیاری یاسایی دادگایی باڵای تاوانبارانی ئەنفال بخەنە پەراوێزە و تۆمتبارانی ئەنفال بپارێزن ، بوار نەدەن ڕووبەرووی دادگا بکرێنەوە .
دەبوایە سنوورێک بۆ ئه و هەموو زنجیرە جینۆسایدانەی کورد دابنرایە کە دەوڵەتی ئێران و تورکیای دراوسێ ڕۆژانە لەسەر سنوورەکان بەرپای دەکەن .
دەبوایە بە پێ ی دەستوورو یاسا وسیستەمی سەرەوتی نیشتمانی ، بوار نەدرایە ، بە هیچ سەرکرده و حیزبێک، بیرە نەوتەکان بۆ بەرژوەندی خۆیان بەکار بهێنن ، چی تر یاری بە گرێبەستی نەوت نه کرێ ، داهاتی خاڵە گومرگییەکانی سنوورەییەکان بەهەدەر نه درێ .
حکومەتی هەرێم ئەوە 32 ساڵە ، ئاوا مەزاجیانە و بێ موبالاتانە، دوور لە دەستوورو یاسا ورێسا ، یاری بەقوت و بژێوی هاوڵاتیان دەکەن ، ژیانی خەڵکیان بە جۆرێک دژوارو قورس کردوە ،
شەپۆل شەپۆل گەنجەکان ، رێگای هات و نەهاتی دەریای ئیجە دگرنە بەر، بەره و چارەنووسێکی ون .
گەر کورد لە ئاستی عێراق ، نەک 60 کورسی ، گەر 100 کورسی، لە پەرلەمانی بەغداد هەبێ ، لە بەر ئەوەی گرێ ی جەلالی ومەلایی و پێکهاتەکانی تر یەکتریی قوبوڵ ناکەن ، یەکتریی دەسڕنەوە ، ڕۆڵی کورد لە بەغداد لاوازه و هیچ گۆڕانکارییەکیان پێ ناکرێ .
ئیستا هەموو دەسکەوتەکانی حکومەتی هەرێم وپەلەمانی کورد لە حکومەتی بەغداد ئەوەیە ، گەر بەغداد بودجە بنێرێ ، حکومەتی هەرێم موچەی هاوڵاتیان نابڕێ و لە کاتی خۆی دا دابەشی دەکات.
گەر حکومەتی بەغداد موچە نەنێرێت ، ئەوا حکومەتی کوردی ، وەک حکومەتێکی بەتاڵ ، موچەی هاوڵاتیانی پێ نادرێ .
ژیانی ئەفسانەی لویسانەی سەرانی کورد لە پەرلەمان و حکومەتی هەرێم و حیزبەکان ، لە کۆشک و ڤێلاو لە ناو دنیایی دۆلاری ژێر زەمینە کانیان ، بە جۆرێک لە گەڵ هاوڵاتیان دا جیاوازە ، وەک ئەوان هاوڵاتی ئەم خاکە نەبن. و لە ئەستێرەیەکی ترەوە هاتبن ، هیچ هەستێکیان نییە:
با ژیانی هاوڵاتیانی ئەم نیشتمانە ، هەر نەهامەتی بێ ، با هاوڵاتیان بێ موچە و بێ کاروکاسپی بن ، بەگیرفان بەتاڵەوە بە عیزەتی نەفسەوە ، بە بێ دەنگی بمرن. [1]
=KTML_Bold=ئەم بابەتە بە ڕینووسی سەرچاوەی ئاماژەپێکراو نووسراوە کوردیپێدیا بەهیچ شێوازێک دەستکاری نەکردووە=KTML_End=