Qudis, Şengal Û #Kobanî#
Xakî Bîngol

Serokê Amerîkayê Donald Trump li Koçka Sipî daxuyanî da û got: “Amerîka, Qudsê wekî paytexta Îsrayîlê nas dike û em ê qunsulxaneya xwe ji Til Ebîbê veguhêzin Qudsê”.
Bi vê daxuyaniya Trump re, islamîstên polîtîk ên şovînîst li defa hawarê xist, xwe bilind kirin û li erdê xistin. (Di nava wan de, hejmareke gelekî girs ji Kurdan jî heye.)
Baş e, em ê bibêjin ku mafê islamîstên Tirk, Ereb û yên din heye ku Qudsê biparêzin; lê divê ku Kurd serê xwe têxin nava destên xwe û çend kêliyan bifikirin..!
Her kes dizane ku ji beriya Islamê, Qudis Kabe bû.
Li gorî ola Xiristyanan û pirtûka wan a pîroz “Încîl”, Hz. Îsa li Qudsê hatiye çarmîxkirin.
Rast e Qudis bajarekî Pîroz e!
Dîsa li gorî ola Cihûyan, Qudis bajarekî pîroz e û cara yekê ( Ji beriya Zayîna Hz.Îsa), Quds ji hêla Melik-Qiralê Îsrayîlê Dawûd ve hatiye avakirin.
Piştre ji hêla lawê Dawûd “Silêman” ve wekî Paytexta Qiraliyetê hatiye ragihandin û Dîwarê Baweriyê di nava bajêr de ava kiriye.
Mijara me ne tenê bajarê Qudsê ye, ez dixwazim durûtî û sextekariya islamîstên-polîtîk ên şovenîst li ber çavan raxim, û ka binihêrin çi qas bêujdan û bêîman in.
Şerê Selahedînê Eyûbî û Xaçperestan!
Her kes dizane ku Selahedînê Eyûbî kalebavê Kurdan e û di dîrokê de rola xwe lîstiye.
Di şerê Misilman û Xaçperestan de mora xwe li Qudsê xistiye.
Ji 20’ê Êlûna 1187’ê hetanî 2’yê Cotmehê (Yanî di nava 12 rojan de) bajêr ji destên Xaçperestan azad kiriye.
Li gel ew qas ked û hewldanên Selahedîn, bi sedên salan e ku Misilman li Rojhilata Navîn zilmeke bêhempa li ser Kurdan û welatê wan “Kurdistan” dimeşînin.
Di sedsala 20’ê de bi destên Misilmanan; li Mahabad , Agirî, Dêrsim, Koçgirî, Geliyê Zîlan û bi dehan deverên din, Kurd di binê Şûran re derbas bûn.
Dest û lingên serok û rêvebirên Kurdan li qeyd û zincîran xistin.
Kalebavên Kurd Şêx Se’îd, Seyid Riza û Qazî Mihemed ji hêla Misilmanan ve hatin bidarvekirin.
Di destpêka sedsala 21’ê de, qirkirina Kurdan hêj jî berdewam kir.
Wexta Kurd qala azadî û serxwebûna xwe dikin, bi heman dengî Misilmanên Rojhilata Navîn radibin ser xwe û li defa hawarê dixin û êrîşî cih û warên Kurdan dikin.
Ji beriya demeke ne gelekî dûr, Serokê Filestîniyan Mehmûd Ebas derket pêşiya medyayê û got: “Avabûna Kurdistana serbixwe, nayê qebûlkirin”!…
Şengal û Şêxan jî Pîroz in!
Em werin li ser mijara Şengal û Şêxanê.
Kesên ku rojê pêncwext nimêj dikin û qaşo dibên “Em Misilman in”, bi navê DAIŞ’ê di 3’yê Tebaxa 2014’ê de êrîşî ser Şengalê kirin; jin, qîz û bûkên Kurdan birin û li mazatan ji xwe re firotin.
Bi hezaran mirovên bêguneh kuştin û bi hezaran jin û zarok ji tî û birçînan li der û dora çiyayê pîroz, li Şengalê mirin.
Gelo çend Misilman piştî nimêja Înê derketin kolanan û komkujiya li ser Şengalê şermezar kirin? Rast e, Qudis di dîrokê de hetanî niha 23 caran hatiye dagîrkirin, 52 caran li ser Qudsê êrîş pêk hatiye, 44 caran jî ketiye destên desthilatdarên cûrbicûr û dîsa hatiye azadkirin.
Li ser Şengal, Şêxan û Laleşa pîroz jî heftê û çend ferman hatine kirin û gelê Êzdî di komkujiyan re derbas bûye.
Lewma jî, divê her kes zanibe ku ji bona Misilman û Cihûyan “Qudis” çi qas pîroz e, ji bona Kurdên Êzdî jî Şengal, Şêxan û Laleşa Nûranî ew qas pîroz in!
Kobanê ji Qudsê Pîroztir e!
Di 13’ê Êlûna 2014’ê de, DAIŞ’ê êrîşî ser Kobanê kir.
Her çi qas bajêr bi tevahî rûxiya jî, lê bi berxwedaneke bêhempa û bi dilekî hevbar, Kurdan bajêr ji destên berberiya islamîstan parast û DAIŞ li Kobanê têk çû. Girê Miştenûrê û kolanên bajêr, bi xwîna keç û xortên çeleng hatin avdan. Bi hezaran zarok sêwî man. Keç û jinên Kurd bedena xwe bi bumbe û dînamîtan pêça û xwe feda kirin. Lewma jî divê ku Kobanê ji bona Kurdan pîroz be, ne jî Qudis!.
Kerkûk û Sûrên Amedê!
Dîsa rewşa Kerkûkê li holê ye.
Hîna duh bû çeteyên Ereb û çeteyên Heşda Şabî yên Faris hatin û ji 30% ji xaka Kurdistanê dagîr kirin.
Cîhana Misilman û ya nemisilman, tev de bêdeng man û temaşe kirin.
Dîsa çend roj berê, li kampa penaberan a Mexmûrê teqîn çêbû û bi dehan Kurd şehîd bûn.
Jixwe em qala bajarên ku li Bakurê Kurdistanê bi destên kujerên Tirk ên Misilman hatin rûxandin û bi hezaran şêniyên van bajaran ên ku ji cih û warên xwe der bûn, nekin!
Îcar Qudis çi qas ji Misilman, Cihû û Xiristyanan re pîroz e; divê ku Şengal, Şêxan, Mexmûr, Sûrên Amedê, Kerkûk û Kobanê jî ew qas ji bo Kurdan pîroz bin.
Aniha pirsa min ji Misilmanên Kurd û yên ne Kurd re ev e: Kîjan Xwedayî Qudis daye avakirin û kîjan Xwedayî Şengal û Şêxan dane avakirin?
Kîjan Xwedayî Meke daye avakirin û kîjan Xwedayî Kobanê daye avakirin? Kîjan Xwedayî ez xuliqandime, kîjan Xwedayî tu xuliqandî?
Eger heman Xwedayî ez û tu xuliqandibin, eger heman Xweda Şengal û Qudis dabin avakirin, çima hûn ji bona Qudsê xwe li erdê dixin, li defa hawarê dixin, piştî nimêja Înê mîna hespê ku tewla xwe qetandibe derdikevin kolanan û hîrehîr bi we dikeve; çima hûn ji Şengal, Kerkûk û Kobanê re bêdeng û kor in?
Ma gelo ez munafiq im, an hûn?
[1]