نامۍ: فەتانە
نازنام: وەلیدی
نامۊ تاتەی: موحەمەڎ شەریف
ساڵۊ پېڎابییەی: 1953ز.
ڕۊ مەرڎەی: (#24_09_2024#ز.)
یاگۊ پېڎابییەی: سنە
یاگۊ مەرڎەی: سنە
ژیۋاینامە
فەتانەی وەلیدی؛ فەتانە محەممەد شەریف وەلیدی، هونەرمەڼە و گۊرانیواچە، ساڵەو (1953ز.) دلۍ بنەیانێ هونەردۊسینە جە شارو سنەی، وەرکۆتو کوردەسانی ئامێنە دنیا. وانای سەرەتاییش هەر ئەچاگە تەمامنان، دلۍ وانگای باڵاو میوزیکی جە شارو تارانی وانانش، ساڵەو حەفتاکا جە ڕاو حەسەن کامکار، تاتەو گرووپو کامگارەکانی و موحەممەد شەریف وەلیدی، تاتەو وېش، ئاشناییش چەنی دنیاو مۊسیقای پېڎاکەرڎەن. فەتانەی وەلیدی جە ساڵەکانو حەفتا و هەشتاکا سەڎەی وەڵینی خاوەنو دەنگێ خەمگین و ناسک و دڵنشینی بۍ، تاکو ئیسەیچ دلۍ دڵ و دەروون و یاڎەوەرییەکا خەڵکینە یاگېش هەر مەنېنە. ئەچا ماوە کوڵەنە تاواش کە (56) گۊرانیۍ دلۍ ڕادوینو سنە و کرماشانینە تۊمارۍ بکەرۊن. ژیوای ھونەری ئا ھونەرمەڼۍ بە مەڵامەتو باری نالەبارو ژیوای و نەوەشی دەروونیشۆ، فرە زوو کۊتاش پەنە ئاما، چەنی ئانەیج چا تەمەنە کوڵەنە تاواش کەلەبەرێ دلۍ هونەرو گۊرانیانە پەڕەکەرۊوە. فەتانە پېسە ژەنۍ، یەکەمینە بۍ کە وەرپەنگە کۊمەڵییەکېش ماڵێ و تاواش بە تەرزێ هونەریانە و نەرم و نیان سەڎاو ئاوازە دڵگیرەکاش بیاونۊ بە وەردەنگەکاش.
بەشێ چا گۊرانیا جە ماوەو چن ساڵێ جە تەمەنی ھونەریشەنە تۊمارېش کەردېنۍ:
1. ئەی دڵی غەمینم بۆچ بێقەراری
2. لە ژین بێزارم
3. لای لای دڵم لای لە باغی سینەم
4. ئای لە دەست یارم ماڵی وێرانم
5. لە سەرووی قامەتی یار
6. ھاتەوە یارم یاری وەفادارم
7. بێ تۆ بیمارم بێ دۆست و یارم
8. بەھار فەسڵێکی خۆشە
تاتەو فەتانەی، هەم ژەنیەرو کەمانچەی بییەن، هەم گۊرانیواچێ سەردەمو وېش، هەر ئاڎیچ یەکەم هاندەرو فەتانەی بېیەن پەی یاوایش پا قۊناغە باڵێ جە هونەر و مۊسیقای کورڎینە.
فەتانەی وەلیدی، زېیاتەر جە نیم سەڎەین دلۍ گۊشەو تەنیایی وېشەنە مەنېنۆ و بە تەنیا مەژیوۊن.
خاتوو فەتانەی وەلیدی، دمای کۊچی دمایینو تاتەیش ساڵەو (2017ز.)، بېکەسە و بۍ دەرەتانە مەنۆ، ئیتر قۊناغێ تەر جە ژیوای کونجیانەیش دەسش پەنەکەرد، بە وایەو هاگاڎاری و چەمڎاریکەردەیش، فاڕێنەشاوە پەی میانێ خێروازی و چەمڎاری و پەنادای نەوەشییە دەروونییەکان بە نامۍ (بەهار) جە گەڕەکۆ بەهارانی شارو سنەی.
خاتوو فەتانە یەرۍ واڵۍ و برێوەش هەنۍ، کە ڕاشا پەنە مڎریۍ سەردایش بکەران. نەوەشی و باری دەروونی و نەڎاری، ڕاشا نەڎا پی ژەنە دەنگ وەش و بەهرەدارۍ کە زیاتەر خزمەت بە هونەرو نەتەوەکەیش بکەرۊن، دماجار تاریخو (#24_09_2024#ز.) مەرگ بی بە مېمانەش و شارو سنەیش جیائاست.
ئەسعەد ڕەشید.[1]