Mastereke di asta cîhanî de ji bo xizmeta civakê
Yûsif Îsa
Min teza xwe ya masterê îsal li Enstîtûya Zanist û Teknolojiyên Nûjen, li beşa Beşa Petrolê temam kir. Navê teza min Development of PVT Correlations for Rmelan Crude Oil Using Nonlinear Multiple Regression and Artificial Neural Network e; yanî ez li ser pakkirin û miamelekirina bi nefta Rimêlanê daketim.
Dewreya Yekemîn a masterê di sala xwendinê ya 2020/2021’ê de hat vekirin bi destê
Zanîngeha RojavaZanîngeha Rojava li Enstîtûya Zanist û Teknolojiya Nûjen. Wê demê, min master di beşa Endezyariya Petrolê de tomar kir, piştî ku min şert û mercên masterê pêk anîn, yanî di ezmûna nivîskî de bi ser ketim û di ya devkî (hevpeyvîn) de jî bi ser ketim, lazim bû asta zimanê îngilîzî heta asta C1 û zimanê dayîkê (Kurdî) heya asta 3’yê, ez bi ser bixim. Piştre jî ez derbasî xwendina masterê bûm.
Ez vê serketina pîroz diyarî malbata xwe û diyarî şehîdên Rojava dikim.
Rewşa xwendinê
Zimanê xwendinê, ji ber ku mamosteyên me ne kurd bûn, bi îngilîzî bû. Xwendina min online dewam kir. Profesorê min ji Misrê bûn, hemû jî kesên pispor bûn û gelekî jêhatî bûn û min gelekî sûd ji wan girt.
Destpêkê, min salekê gelek dersên lazim xwendin û ew bi dawî kirin; ev jî weke Dîplomaya di Endezyariya Petrolê de tê naskirin. Piştre min xwendina masterê dewam kir, ew jî ji du salan pêk tê: Min di sala yekemîn de dersên lazim serketî xwendin û di sala duyemîn de jî min li ser teza xwe ya masterê kar dikir.
Bi piştgirî û alîkariya Zanîngeha Rojava û Enstîtûya Zanist û Teknolojiya Nûjen û nexasim jî Dr. Haidar Saify (Heyder Seyfî) çi di aliyê piştgiriya madî ango peydakirina profesoran de û çi jî di warê manewî de min serketî master di beşa Endezyariya Petrolê bi dawî kir.
Min hin zehmetî dîtin di aliyê komkirina agahiyan (Datasets) de ji bo teza masterê, lê bi alîkariya Kompaniya Nefta Rimêlan û bi taybetî endezyar Hesen Hajî, ew zehmetî hatin çareserkirin.
Di 13’ê Hezîrana 2024’an de min teza xwe ya masterê pêşkêşî komîteyê kir û komîteyê bi min re li ser teza min nîqaş kirin, bi awayekî gelekî serketî min parastina teza xwe kir û bi pileya 93% min mastera beşa petrolê bi dest xist.
Bi rastî ez gelekî serbilind im û kêfxweş im, ji ber ku min bawernameya derçûna lîsansê wek dewreya yekemîn ji Zanîngeha Rojava bi dest xist û di mastera beşa petrolê de jî her wisa bû.
Serpereşt û şêwirmendên teza min Prof. Sayed Gomaa, Prof. Tarek Aboul-Fotouh, Prof. Abu Zied Ahmed bûn. Min sûd ji van profesorên xwe girt û vê sûdê ez ê têxim xizmeta xwendekarên lîsansê yên kû di Zanîngeha Rojava de dixwînin.
Ez vê serketina pîroz diyarî malbata xwe û diyarî şehîdên Rojava dikim.
[1]