‘Wê berxwedaniya me serkeftinên mezin tacîdar bike’
Ronaz Silêman/Qamişlo
Welatiyên bajarê Qamişlo li hemberî êrişên dewleta Tirk a #dagirker# helwesta xwe nîşan dan û gotin, “Dagirkerî israr dike ku li herêmê me her tim şer û pevçûn were meşandin û gelê herêmê bi aramî jiyan nekin, lê wê berxwedaniya me bi serkeftineke mezin tacîdar bibe.”
Careke din ji bo qirkirina gelê herêmê dagirkeriya Tirk di şeva 23’ê Cotmehê de, dest bi êrişeke berfireh li ser Bakur û Rojhilatê Sûriyê kir. Dagirkeriyê di êirşên xwe de rasterast binesaziya herêmê, navendên stratejîk, xizmetguzarî, sivîl û mal û milkên wan dike hedef. Di encama êrişan de, bi 10’an welatî şehîd bûne û binesaziya herêmêm ziyanên gelek mezin dîtiye. Lê li hemberî êrişên qirkirinê gelên herêmê rabûn ser piyan û ji dagirkeran re helwesta xwe nîşan kirin ku ew ê tu carî serî ji dagirkeran re netewînin û tola şehîdên xwe rakin. Herwiha QSD’ê jî di çarçoveya mafê parastinê de, li dijî baregeh û xalên dagirkeriya Tirk çalakiyên bi bandor pêk anîn.
Derbarê êrişên dewleta Tirk a dagirker ên li ser herêma Bakur û Rojhilatê Sûriyê welatiyên bajarê Qamişlo ji rojnameya me re axivîn.
Welatiya bi navê Cîhan Ehmed diyar kir ku êrişên dewleta Tirk a dagirker ên li ser herêma Bakur û Rojhilatê Sûriyê qelsbûna wê diyar dike û wiha got: “Dewleta Tirk a dagirker ji van êrişên hov û qirker dixwaze berê gelê kurd û pêkhateyên herêma Bakur û Rojhilatê Sûriyê bide şerekî taybet. Êrişên Tirkiyê êrişekî newêrekî ye, ji ber singa me ji êrişên meydanî vekiriye, lê Tirkiyê êrişên ku di şerekî tarî de li ser me dide meşandin, tengasî û qelsbûna xwe dide diyarkirin. ”
“Bi fikirên Rêber Apo wê kurdistaneke azad pêk bê”
Cîhan Ehmed di berdewamiya axaftina de êşkere kir ku çareserî wê bi rakirina tecrîda li ser Rêber Apo pêk bê û wiha got: “kilîta çareseriya ku em bi hev re di Rojhilatekî Navîn a aram, di Kurdistanekî azad û cîhanekî aram de jiyan bikin wê bi fikir û felsefa Rêber Apo pêk bê. Lê dagirkerî israr dike ku li herêmê me her tim şer û pevçûn were meşandin, ne gelê kurd û ne gelê herêmê di nava aramiyê de jiyan bikin û li ser girkirin û tunekirina gelan li hev kirine, da ku berxwedanî û têkoşîna gelan vala derxînin û wan bê moral bikin. Lê wê berxwedaniya me bi serkeftineke mezin tacîdar bibe û di têkoşîna xwe de em bi israrin.”
‘Em xwediyê raman û felsefeya azadin’
Cîhan Ehmed da zanîn ku bi rakirina tecrîda li ser Rêber Apo wê çareseriya kirîz û şer misgor bibe û wiha got: “Beriya çend rojan hevdîtin bi Rêber Apo re hat kirin, em bi vê yekê kêfxweşin ku piştî çend salan me agahî ji Rêberê xwe girt, lê divê hevdîtin li ser bingeha çareseriyê bêne kirin, ji ber tu carî em di nava şerê taybet de neyên xapandin, hevdîtinên rast bi rakirina tecrîdê ye, bi vekirina diyalogê ye, ji derveyî vê em teslîmî siyasetan nebin. Em xwediyê raman û felsefeya azadin a ku tu carî xwe li ser siyaseta teslîm nebûye û wê teslîm nebe. Dewleta Tirk çawa ku pêhateyên din di nava qetilaman de derbas kirine, dixwazin vê sedsalê jî qirkirina gelê kurd bikin. Da ku coşa gel û berxwedaniya gel gave paşde bavêjin û di siyasetên teng de bidin xapandin êrişên xwe li seranserî Bakur û Rojhilatê Sûriyê dide meşandin.”
‘Em ji qelenê azadiyê re amadene’
Cîhan Ehmed axaftina xwe bi van gotinan dawî kir: “Ev ware lê ne ev buhare, heger qelenê azadiyê giranbuhaye em jî, ji vê qelenî re amade ne. Em ê serbikevin û em ne tenê Rojavayê Kurdistanê azad bikin em her çar perçeyên Kurdistanê ji destê dijmin û neyar derxînin.”
‘Heya kêliyên dawiyê nîşaneya serkeftinê bilind bikin’
Di heman mijarê de welatiyê bi navê Ezîz Xalo diyar kir ku ew rê nadin ku armaca dewleta tirk pêk were û wiha got: “Dewleta Tirk her dem li ser herêma me êrişên hovane pêk tîne, di wan êrişan de derveyî hedefgirtina zarok, jin û sivîlan binesaziya me dike armac, dixwaze mîna ku ew îro roj di nava kirîzeke aborî de jiyan dike, gelên me jî vê yekê jiyan bike. Lê em ê heya kêliyên xwe yên dawiyê nîşaneya serkeftinê bilind bikin.”[1]