Nav û Paşnav: Muhammed Abdulrezak Eser
Nasnav: Bager Farqin
Cihê Jidayikbûnê: Amed
Navê Dayik – Bav: Medîne – Abdullah
Cih û Dîroka Şehadetê:#04-11-2018# / Herêmên Parastinê yên Medyayê
BAGER FARQÎN
Hevrêyê me Bager li navçeya Farqîn a Amedê ku yek ji navendên girîng ên şerê me yê azadiyê ye û bi sekna xwe ya serhildêr a li dijî dijmin pêşengî dike di nava malbateke welatparêz de ji dayik bû. Hevrêyê me Bager ku ji ber welatparêziya hawirdorê ya ku lê dijiya, di temenê biçûk de derfet dît ku têkoşîna me nas bike. Hevrêyê me ji ber hişmendiya welatparêzî û terbiya ku ji malbata xwe wergirtî, bi cewhera xwe ve girêdayî mezin bû. Weke her zarokekî Kurd ê li Kurdistanê dijî, hevrêyê me Bager jî di emrekî biçûk de rastî, zext û komkujiya dijmin ên li dijî gelê me dît, hêrsa wî li dijî dijmin mezin bû. Hevrêyê me ku hîn bû zimanê wî yê dayikê li dibistanên dijmin ên lê amade bûn qedexe ye û her wiha dît ku ew nikare bi rengekî azad ziman, çand û nasnameya ku wî afirandiye bijî. Ji ber vê yekê hêrs û kîna wî ya li hemberî dijmin mezintir bû. Ji aliyekî ve hevrêyê me dibistan xwend û li aliyê din jî ji bo tevkariyê li debara malbata xwe bike di gelek karan de xebitî. Hevrêyê me ji ber girîngiya kedê di temenek biçûk de zanî, zû karî li ser piyan bisekine. Hevrêyê me ku berpirsyariyên xwe bi baldarî bi cih anî, bi kesayetiya xwe ya gihîştî re hurmeta malbat û hawirdorê bi dest xist. Hevrêyê me ku bi ciwantiya xwe re lêgerîn û pirsên wî yên li ser jiyanê zêde bûn, zehmetiyên jiyana li welatekî dagirkirî dît. Fêm kir ku gelê me tenê dikare li welatekî azad bi ziman, çand û hebûna xwe bijî. Li ser vê bingehê hevrêyê me têgihişt ku ev yek wê bi têkbirina dagirkeriya li welatê me, pêkan be. Di vê wateyê de sempatiyeke wî ya mezin ji bo Gerîlayê Azadiya Kurdistanê ku li ser xeta fedaiyane li dijî dewleta Tirk a mêtinger şer dikir, pêş ket. Hevrêyê me Bager ê ku weke ciwanekî Kurd ê welatparêz di ferqa berpirsyariyên xwe yên li pêşberî gelê me bû, li ser vê bingehê pêşî di nava xebatên ciwanên şoreşger û welatparêz de girt. Hevrêya me yê ku piştre ji bo xwendina zanîngehê derbasî Bedlîsê bû û xebata xwe li vir domand, bi lêhûrbûnên ku li vir jiyaye re têkoşîna me hê bêhtir ji nêz ve nas kir. Hevrêyê me Bager ku li zanîngeha lê dixwend pêşengî ji xebatên ciwanan re kir, ji bo gelek ciwanên Kurd bi têkoşîna me bide naskirin kedeke mezin da. Hevrêyê me ku bi zanebûn û jiyana xwe ya mutewazî bi ciwanan re têkilî danî, her ciwanê ku naskiriye bandor kir û hişt ku ciwan tevlî nava refên têkoşînê bibin û wezîfeya dikeve ser milê xwe bi awayekî serketî bi cih anî. Di sala 2015'an de dema ku dewleta Tirk a qirker 'Plana hilweşandinê' li dijî gelê me û Tevgera me da destpêkirin, hevrêyê me yê ku armanc dikir têkoşîna xwe hê mezintir bike, fikirî ku ev yek tenê bi tevlîbûna nav refên gerîla li çiyayên Kurdistanê pêkan e. Li ser vê bingehê ji Beşa Endezyariya Sivîl a ku sala dawî dixwend derket û şert û mercên jiyanê yên ku sîstemê ji bo wî avakirî dehf da aliyekî, azadî hilbijart û tevlî nava refên gerîla bû.
Hevrêyê me Bager ku ji qada Garzanê tevlî nava refên gerîla bû, perwerdeya xwe ya destpêkê li vir wergirt. Hevrêyê me ku agahiyên destpêkê yên li ser gerîlatiyê ji hevrêyên xwe yên bi tecrûbe yên li vê derê wergirt, di demeke kurt de hînê şert û mercên jiyana çiyê bû. Ji têkiliyên hevrêtiyê û sekna jiyanê ya gerîlayên li qada Garzanê bandor bû, hevrêyê me Bager her gerîlayek ku didît ji xwe re mînak digirt. Ji bo vê jî her çendî ji bo gerîlatiyê nû bûbe jî bi tecrûbeyên ku bi dest xistî re karî jîrbûnek xurt bi dest bixe. Li ser pêşniyara hevrêyên xwe, hevrêyê me ji bo hîn bêhtir xwe perwerde bike û xwe bigihîne asteke profesyonel, derbasî Herêmên Parastinê yên Medyayê bû û li vê derê perwerdeya xwe ya yekemîn a akademîk dît. Hevrêyê me ku bi vê perwerdeyê re derfeta xurtkirina zanebûna xwe ya li ser jiyana gerîla û hunera şer bi dest xist, di demeke kurt de di kesayetiya xwe de guhertinên girîng çêkir. Hevrêyê me li dijî êrîşên dijmin bi israr xwest derbasî qadên şer bi taybetî Herêmên Parastinê yên Medyayê bibe da ku destketiyên gelê me biparêze. Hevrêyê me piştî perwerdehiya xwe bi awayekî serketî qedand, gihişt vê armanca xwe.
Hevrêyê me ku berê xwe da Zagrosan ku êrîşên dewleta Tirk a dagirker lê giran bûn, li wir bi rengekî çalak tevlî karê pratîkî bû. Tevî ku gerîlayekî nû bû jî hevrêyê me Bager bi tevlîbûna xwe ya bi moral û coş ji bo hevrêyên xwe bû mînak û bêyî cudahiyê bixe navbera kar de berê xwe da her xebatê. Hevrêyê me yê ku dizane milîtanekî xwe bi kedê afirandiye wê bibe xwedî meşeke xurt a şoreşgerî, di tevahiya jiyana xwe ya şoreşgerî de ev pîvan esas girt. Hevrêyê me ku bi keda xwe hurmeta hevrêyên xwe qezenç kir û di şerê li dijî dagirkeran de xurt bû, di pratîkê de hînî gelek taktîkên gerîla bû. Di heman demê de hevrêyê me kêliyek xwe jî vala derbas nekiriye û ji bo ku di felsefeya Rêber Apo de xwe bi pêş bixe, tiştên ku hîn bûye kir bingeh ji kesayeta xwe re. Ji bo vê jî karî bandorê li hevrêyên xwe yên têkoşînê bike û parazvaniya şêwaya jiyana Apoyî kir. Hevrêyê me Bager ku di dema mayîna xwe ya li Zagrosan de bi êrîşên dewleta Tirk a dagirker re rû bi rû ma, li dijî mêtingeran bi rengekî çalak tevlî gelek çalakiyan bû û darbên girîng li dijmin xist. Bi cesareta xwe ya li qada şer, bi fedakariya xwe û meşa xwe ya bê dudilî ya li ser dijmin, hêza hevrêyên xwe yên pê re şer dikir, xurtir kir. Di vê wateyê de hevrêyê me Bager milîtanekî wisa ye ku hemû hevrêyên wî dixwazin pê re têkoşînê bimeşînin, ji bo ku layiqê vê nêzîkatiya hevrêyên xwe bibe hê bêhtir têkoşiya û ked da.[1]