KNK'ê bila qirkirina 1915'an bê qebûlkirin
KNK'ê #qirkirin# a sala 1915'an a bi destê Osmaniyan li hemberî gelênxwecihî yên Mesihî hate kirin şermezar kir û xwest, qirkirin ji aliyê tevahiya dem û dezgehên pêwendîdar ve bê qebûlkirin.
KNK'ê bila qirkirina 1915'an bê qebûlkirin
+
Konseya Rêveber a Kongreya Neteweyî ya Kurdistanê (KNK) ji ber salvegera qirkirina Ermen û Asûrî-Suryanî û Kildaniyan ku bi destê Împaratoriya Osmanî di sala 1915'an de hate kirin, daxuyaniyek da.
Daxuyanî bi vî rengî ye:
Împaratoriya Osmanî û hevkarên wan di sala 1915'an de li dijî gelên xwecihî yên Mesîhî (Xiristiyan) ku li cografyaya Mezopotamya û Anatolîya dijîn, qirkirinek mezin pêk anî. Hejmareke bilind a Kurdên Êzidî jî bi ber vê jenosîda wan ketin. Di vê qirkirine da rêvebirên Cemîyeta Ittihat Terakî, çeteyên Teşkîlata Mexsûsa, Alayên Hemîdiyê û Artêşa Osmanî, efserên (sûbayên) di Artêşa Osmanî da kar dikirin, li hemberê mirovahîyê sûc kirin. Gelê Ermenî û Asûrî-Suryanî-Kildanî, bi armanca ku bi dirok û kultura wan ve ji holê rakin qir kirin. Ev qirkirin li dijî mirovahiyê sûcek e ku ne mumkun e bê înkarkirin. Belgeya berçav û heqîqî hejmara kuştina ji milyonek û nîvan zêdetir mirovan e. Qeydên nufûsa Împaratoriya Osmaniyan jî vê rastîyê teyîd dikin.
Ji gelê Asûrî-Suryani-Kildanî zêdetir ji nîv milyonê, ji gelê Ermenî jî di ser milyonekê mirov bi barbarî û bi rengên cuda û li cihên cuda hatin kuştin. Bi sed hezaran kes jî, ji cih û warên wan, bi Qanûna Tehcîrê hatin surgun (mişext) kirin. Bi deh hezaran, piranî zarokên keç û jinên ciwan, hatin misilmankirin û bi awayekî xeyrî insanî, bi zorê hatin zewicandin. Bi hezaran warên bicihbûnê, dêr û manastir, dibistan û pirtûkxane, kargeh hatin wêrankirin. Hejmareke ne diyar mal û milk û dewlemendî hatin desteser kirin û xesp kirin. Kuştin û birandina gelên Asûrî-Suryanî-Kildanî û Ermenî û wêrankirina wargeh û şopên kulturî û dîrokî yên wan mubah hate ditin; bi bangên cîhadê û bi fermanan paksaziya etnîk û dînî hate kirin.
Împaratorîya Osmanî, axa Mezopotamya û Anatoliyayê dagir kir û bi sedsalan talan kir û di sala 1915'an de jî ev gel qir kirin ku ji vê birîna jenosîdê hêj jî xwûn tê. Ev travmaya ku bi serê van xelkan hatî ev e sed û deh sal in li ser nifşên nû bûye trajedî ku bi bîrhatinên gelek tahl ve tijî ye. Piştî jenosîda ku sed û deh sal ji ser ra derbazbûyî, Komara Tirkiyeyê ku mîratxwera Împaratorîya Osmaniyan e, vê qirkirinê qebûl neke hingê dibe şirîkê vî sûcî ku ev e tê manaya bi awayekî din domandina jenosîdê. Bi munasebeta 110. sala jenosîdê em bang li Komara Tirkiyeyê dikin ku qirkirinê qebûl bike û pêdivîyên wê jî bîne cih.
Em wek KNK, jenosîda sala 1915'an careke din bi xurtî şermezar dikin û daxwaz dikin ku ji aliyê tevahiya dem û dezgehên peywendîdar ve bê qebûlkirin.[1]