$باکووری کوردستان$
- ڕێکخستنە گشتییەکانی پارتی دیموکراتی گەلان-#هەدەپە# لە شاری #وان#-ی باکوری کوردستان، دوویەمین کۆنگرەی خۆی بەست، سەلاحەدین دەمیرتاش، هاوسەرۆکی گشتیی زیندانیکراوی ئەو حزبە، پەیامێکی پیرۆزبایی ئاراستەی کۆنگرەکە کرد.[2]
$باشووری کوردستان$
- بەهۆی خراپیی ڕەوشی #کەرکووک#ەوە، شەوانە قەدەخەی هاتوچۆ ڕاگەیەندراوە.[1]
- لە گەڕەکی ڕاپەڕینی شاری #سلێمانی# گەنجێکی ئاوارەی کەرکووک کە لە کەمپی ئاوارەکانی خاکدا دەژیا بە فیشەک کوژرا.[2]
- ڕێکخراوی ستۆپ بە هاوکاری ڕێکخراوەکانی RIDو NPAی نەرویجی، میتینگێکی لە هەولێر لە بارەی بەرپرسیارێتی میدیا لە ڕووداوەکان و تەنگەژە ئەمنییەکانی ئەمدواییە ئەنجامدا. لە سیمینارەکەدا باس لە ڕۆڵی خراپی میدیای کوردی لە ڕووداوەکانی ئەم دواییەدا کرا.[3]
- وتەبێژی نوسینگەی سەرۆک وەزیرانی عێراق ڕایگەیاند ئەوەی ئێستا لە باکوری عێراق دانوستان نییە بەڵکو ڕاگرتنی ئۆپەراسیۆنەکان و جوڵەی هێزە عێراقییەکانە لەپێناو دەستەبەکردنی بڵاوبونەوەی هێزە عێراقییەکان و سەپاندنی دەسەڵاتەکانی حکومەتی فیدراڵی.[4]
- دان لۆ بۆتیلیێە، وتەبێژی ڕەسمی وەزارەتی بەرگری کەنەدا لە کۆنگرەیەکی ڕۆژنامەنوسیدا ڕایگەیاند، وڵاتەکەی تەواوی هاوکارییە سەربازییەکان بۆ عیراق و هەرێمی کوردستان بەشێوەیەکی کاتی ڕادەگرێت.[3]
- جەعفەر ئیبراهیم، جێگری سەرۆکی پەرلەمانی کوردستان ڕایگەیاند، #مەسعود بارزانی#، نامەیەکی بۆ پەرلەمانی کوردستان ناردووە و لە دانیشتنی سبەی یەکشەممەشدا نامەکە دەخوێندرێتەوە.[1]
$رۆژئاوای کوردستان$
- تۆپخانەکانی تورک، بنکەکانی هێزی ئەرکی خۆبەڕێوەبەریان لە گوندی زورمغار تۆپباران کرد کە دەکەوێتە ڕۆژئاوای شاری #کۆبانێ# و کەناری ڕووباری فورات بەرامبەر شاری جەرابلوس.[2]
- دەستەی ناوخۆیی کانتۆنی #جزیرە#، ڕایدەگەیەنێت کە دەروازەی #سێمێڵکا# بەڕووی هاوڵاتیاندا کراوەیە کە نەخۆش بن یاخود کاری مرۆیی بکەن یان ئیقامەی باشوری کودستانیان پێ بێت.[2]

بەڕێز سەرۆکایەتی پەرلەمانی کوردستان
سڵاوێکی گەرم
بەپێی فەرمانی هەرێمی (128) لە 12-7-2017 داوامان کردووە هەڵبژاردنەکانی سەرۆکایەتی پەرلەمان و سەرۆکایەتی هەرێم لە ڕۆژی (1-11-2017) ئەنجام بدرێت، بەڵام لەبەر هۆکاری سیاسی و ئەمنی و تەکنیکی و نەبوونی کاندید، کۆمسیۆنی باڵای سەربەخۆی هەڵبژاردنەکان و ڕاپرسی ئامادەکارییەکان بۆ هەردوو هەڵبژاردن هەڵپەسێردرا
لە (24-10-2017) پەرلەمانی کوردستان تەمەنی حکومەتی هەرێم و پەرلەمانی بۆ ماوەی دوو خولی یاسادانان درێژکراوەتەوە.
سەبارەت بەپۆستی سەرۆکایەتی هەرێم لەدوای 1-11-2017 بەردەوام بوونم لەم پۆستە ڕەتدەکەمەوە و نابێت یاسای سەرۆکایەتی هەرێم هەمواربکرێتەوە یان تەمەنی سەرۆکایەتی هەرێم درێژبکرێتەوە، بۆیە پێویستە بەزووترین کات کۆببنەوە بۆ ئەوەی بۆشایی یاسای لەئەرک و دەسەڵاتەکانی سەرۆکی هەرێم دروست نەبێت و ئەم بابەتە چارەسەر بکرێت.
منیش وەکو #مەسعود بارزانی# پێشمەرگە، لەناو جەماوەری گەلەکەمان و پێشمەرگە ئازیزەکان لەخەبات و تێکۆشان بۆ بەدیهێنانی مافە ڕەواکانی گەلەکەمان و پارێزگاریکردن لەدەستکەوتەکانی میللەتەکەمان بەردەوام دەبم.
مەسعود بارزانی
28-10-2017

بە هۆی ناجێگریی باری تەندروستی بەڕێز جەعفەر ئیبراهیم ئێمینکی جێگری سەرۆکی پەرلەمان، دەستەی سەرۆکایەتی پەرلەمان بریاریدا بە دواخستنی دانیشتنی ژمارە (4)ی ئاسایی کە بڕیار بوو ڕۆژی شەممە ڕێکەوتی 28-10-2017 ئەنجام بدرێت. بە هیوای سەلامەتی بۆ بەڕێزیان.
نووسینگەی ڕاگەیاندنی جێگری سەرۆکی پەرلەمانی کوردستان
27-10-2017

دەبارەی چالاکی گەریلاکان لە #شەمزینان# و #گەڤەر# و چەلێ، ناوەندی چاپەمەنی و ڕاگەیاندنی #هەپەگە# ڕاگەیاندراوێکی بڵاوکردەوەو کوژرانی 10 سەربازی تورکیای ڕاگەیاند.
ئەمڕۆ، ناوەندی ڕاگەیاندن و چاپەمەنی هێزەکانی پاراستنی گەل- هەپەگە، نوێترین زانیاری دەربارەی چالاکی گەریلاکانی لە سنوورەکانی شەڕەوە بڵاوکردەوە.
لە ڕاگەیەندراوەکەی هەپەگەدا هاتووە:لە چوارچێوەی قەناغی دووەمی شەهید بەدران گوندیکرەمۆ و شەهید نالین مووشدا، لە شەمزینان و چەلێ و گەڤەر چالاکییان ئەنجامداوە.
هەپەگە ڕاگەیاند: لە 26ی ئەم مانگەدا سوپای تورک، لە گردی شەهید سەرحەد-ی سەربە شەمزینان، لەڕێگەی یەکینە شاراوەکانیانەوە ئۆپەراسیۆنێکی سەربازییان دەستپێکرد، هەمان ڕۆژ گەریلاکانمان ئەو یەکینەیان خستە ژێر چاودێرییەوە، پاشان دوێنێ یەکینەکەیان کردە ئامانج، لە ئەنجامی چالاکییەکەدا ئەوەی ئاشکرا بووە، 10 سەرباز کوژراون و سێ سەربازیش برینداربوون.
هەپەگە ڕاشیگەیاند:دوێنی هێزەکانمان چەند سەربازێکی سوپای تورکیان کردووەتە ئامانج، کە لە ڕێگادابوون بۆ گردی باێی سەربە گەڤەر، لە ئەنجامی ئەو چالاکییەدا چەند سەربازیک کوژراون و برینداربوون، بەڵام ژمارەکەیان نەزاندراوە.
هەپەگە دەربارەی چالاکییەکی دیکەیان لە سنووری چەلێ، ڕایگەیاند: ئیوارەی دوێنێ گەریلاکانمان لەدژی سەربازەکانی سوپای تورک لە گردی کۆردینەی سەربە چەلێ چالاکییان ئەنجامدا، لە ئەنجامدا چەند سەربازێک کوژراون و برینداربوون، بەڵام ژمارەیان ئاشکرانەبووە، پاش چالاکییەکە سوپای تورک بە سەختی دەڤەرەکەی بۆردوومان کردووە.
هەپەگە لە کۆتاییدا شەهیدبوونی گەریلایەکی ئاشکرا کردووەو، ڕایگەیاندووە:لە21ی ئەم مانگەدا، سوپای تورک لە ڕێگەی فڕۆکە و هاوانەوە سنووری چیای گاباری بۆردوومان کردووە، لە ئەنجامیدا هەڤاڵێکمان بەناوی 'ئازاد چیا' شەهید بووە و گەیشتووەتە کاروانی نەمران.[1]
28-10-2017