ئی بابەتۍ بەپاو ستانداردۍو کوردیپێدیای ھەڵای ناتەمامە ھەنە و پەنەۋازییش بە پۊرەلۋای بابەتیی و زۋانەۋانیی فرەتەری ھەن!

بەناوی خودای بەخشندە و میهرەبان

بە بۆنەی سی و دووەمین ساڵیادی ڕاپەڕینە مەزنەکەی گەلی کوردستان پیرۆزبایی لە خانەوادەی سەربەرزی شەهیدان و پێشمەرگە قارەمانەکان و هەموو خەباتگێڕ و ئازادیخواز و نیشتمان پەروەران و سەرجەم خەڵکی کوردستان دەکەم.

ڕاپەڕین لە سایەی ئیرادەی ئازادیخوازیی گەلی کوردستان و، قارەمانێتی پێشمەرگە و پلان و یەکڕیزیی لایەنەکانی ناو بزووتنەوەی ڕزگاریخوازی کوردستان هاتە دی و سەرکەوتنی بەدەست هێنا. ڕاپەڕین ئەو ڕاستییەی بۆ دۆست و دوژمن سەلماند کە ستەمکاری و تۆقاندن هەرگیز ناتوانێ ئیرادەی ئازادیخوازی لە ناخی گەلی کوردستان خامۆش بکات. ڕاپەڕین هەڵگری بەها و ئامانجی بەرز بوو، بۆ ئەوە بوو گەلی کوردستان ئازاد بێ و ژیانێکی سەربەرزانەی لە وڵاتی خۆیدا هەبێت.

لە یادی ڕاپەڕیندا هەزاران سڵاو بۆ شەهیدانی ڕاپەڕین و هەموو شەهیدانی ڕێگەی ڕزگاریی کوردستان دەنێرین و جەختیش لەوە دەکەینەوە، قەوارەی هەرێمی کوردستان کە یەکێکە لە بەرهەمەکانی ڕاپەڕینی خەڵکی کوردستان، دەستکەوتێکی مێژوویی و گرانبەهای گەلی کوردستانە. ئەو دەستکەوتە دەبێ بپارێزرێ و بەهێز بکرێت و نابێ بە هیچ شێوەیەک کار بۆ لاوازکردن و بەلاڕێدابردنی ئەو بەها و ئامانجانە بکرێ کە گەلی کوردستان لەپێناویدا ڕاپەڕینی کرد.[1]

مەسعود بارزانی
5ی ئاداری 2023

(5/3/2023) سی و دوو ساڵ بەسەر ڕاپەڕینی گەلەکەمان دژی زوڵم و ستەمی دیکتاتۆریی ڕژێمی بەعسدا تێپەڕ دەبێت.

لە دەروازەی ڕاپەڕینەوە بۆ وێستگەکانی زەماوەندی #سلێمانی# و ڕوخانی قەڵای ستەم لە #هەولێر#ی دێرین و ڕاماڵینی سوپای بەعس لە دهۆکی دەلال تا تاجی ڕاپەڕینەکان لە نەورۆزی ڕزگاریی کەرکووکدا، دەیان شار و شارۆچکەی کوردستان بە خوێنی دەیان شەهید و ڕەنجی دەیان هەزار ڕاپەڕیوی میللەتەکەمان ئازادکران.

یەکێتیی نیشتمانیی کوردستان بەشانازییەکی زۆرەوە 32 ساڵە خاوەندارێتی ڕێبەرایەتیکردنی ڕاپەڕین و پارێزگاریکردن لە پەیام و ئامانجە پیرۆزەکانی دەکات. بە هاوکاری هێز و لایەنە نیشتمانپەروەرەکان لە هەموو کایەکاندا خەباتی بێوچان دەکات بۆ گەشەپێدانی دەستکەوتەکانی ئازادی و دیموکراسی و حوکمڕانییەکی ڕاست و درووست، بۆ ئەم مەبەستە پیرۆزەش قوربانی داوە و ئامادەی قوربانیدانی زیاتریشە.

ئەمڕۆ (32) ساڵە نەوەکانی ڕاپەڕین لە سایەی کوردستانی ئازاد دا پێدەگەن و بەگیانی پەیامی ڕاپەڕین دژی ستەم و دیکتاتۆری چاویان لە ئاییندەی گەش و ئاسۆیەکی شایانتری ژیان و گوزەرانە. ساڵ لە دوای ساڵ نەوەیەکی تازە دێنە کۆڕی ژیانی سیاسی و گشتییەوە و ڕوانینی نوێیان بۆ کوردستان و بۆ ڕاستکردنەوەی ئەزموونی حوکمڕانی وڵاتەکەمان هەیە و هەقیشیانە بە نەفەسی ڕەخنەگرانە و بە پەرۆشی پەیامی جارانی ڕاپەڕینەوە ویست و ئیرادەی تازە لە خۆیان نیشان بدەن. یەکێتیی نیشتمانیی کوردستان بەگیانی هەمیشە زیندووی ڕاپەڕین و بۆ پارێزگاری لە دەستکەوتەکانی 32 ساڵەی ئازادی و دیموکراسی ڕووی لە هەموو هێزە سیاسییەکانی وڵاتە بۆ ئاشتییەکی سەربەرزانە و دادپەروەرانە، ڕووی لە کچان و کوڕانی کوردەوارییە تا پێکەوە خاوەندارێتی لە پەیامی هەمیشە نوێبوونەوەی ڕاپەڕین بکەن و پێکەوە بەخەباتی دیموکراتی و مەدەنی و هەڵبژاردن ویستی جیاکاری و مەیلی پاشەکشێ لە ئازادی و دیموکراسیی بەرپەرچ بدەینەوە.
کە ئەمە داخوازی ڕەوای کوردەواری سەدەی بیست و یەکە و پابەندبوون و ڕێزگرتنیشە لە خەباتی دەیان ساڵەی گەلەکەمان و شەهیدە سەربەرزەکانی کاروانی دوورودرێژی شۆڕش و ڕاپەڕینەکانی.

پیرۆز بێت یادی ڕاپەڕین و نەمری بۆ شەهیدە سەربەرزەکانی، پیرۆز بێت لە کچان و کوڕانی کوردستانی ئەمڕۆ کە خەباتی دیموکراسی و مەدەنیان بۆ ژیانێکی شایستە و هیوابەخش جوانترین دیاری بەهارییە.[1]

مەکتەبی سیاسی
یەکێتیی نیشتمانیی کوردستان
5/3/2023

لە ساڵیادی ڕاپەرینی ڕزگاری کوردستاندا، بەناوی فراکسیۆنی سەوز لە پەڕڵەمانی کوردستانەوە سەری ڕێز لە ئاست ڕۆحی بەرزەفڕی شەھیدان دادەنەوێنین، پیرۆزبایی لە کۆمەڵانی خەڵکی کوردستان و کەسوکاری سەربەرزی شەھیدان و پێشمەرگە قارەمانەکان دەکەین.
ڕاپەرین بەری ڕەنجی خەبات و تێکۆشانی چەندین ساڵەی گەلەکەمان و بەرھەمی خوێنی ئاڵی دەیان ھەزار شەھیدی قارەمان و بە بەشداری و پشتیوانی سەرجەم چین و توێژەکانی خەڵکی کوردستان و یەکێتی و یەکڕیزی ھێزە سیاسییەکان بوو.
لە کاتێکدا یادى (32) ساڵەی ڕاپەرین دەکەینەوە، بەداخەوە جارێکی تر ھەرێمی کوردستان ڕووبەڕووی قۆناغێکی تری قەیرانی سیاسی و ناکۆکی ناوخۆیی بۆتەوە، ئەم لێکترازانە ناوخۆییە ئەگەر زوو چارەسەر نەکرێت و بەردەوام بێت وەک پێشھاتێکی مەترسیدار دەبینین بۆ سەر ئاییندەی ھەرێمی کوردستان و دەسکەوتەکانی ڕاپەرین، بۆیە لەسەر ئاستی ناوخۆیی داوای یەکێتی و یەکڕیزی ھێزە سیاسییەکان و خەڵکی کوردستان دەکەین، پێمان وایە ئەرکی لەپێشینە چارەسەرکردنی کێشە ناوخۆییەکانی ھەرێمە، بەشێوەیەک پەیڕەوی ھاوسەنگی لە شەراکەتی حوکمڕانی و کۆتایی بەجیاکاری و نادادپەروەرییەی لە دابەشکردنی داھات و پێشکەشکردنی خزمەتگوزاری بێت، داھاتی کوردستان لەھەرکوێ بێت، سەرچاوەکەی ھەرچییەک بێت لە یەک خەزێنە کۆبکرێتەوە و بەیەکسانی بەسەر شار و شارۆچکەکانی کوردستاندا دابەش بکرێت، ناکرێت چیتر ھاووڵاتییان باجی میزاج و ململانێی سیاسی لایەنەکان بدەن.
لە ھەمانکاتدا بەئەرکی لەپێشینەی دەزانین ڕێکەوتن لەگەڵ حکومەتی فیدراڵی بکرێت لەپێناوی پاراستنی بەرژەوەندی گشتی و پرسی مووچە و قوتی ھاووڵاتییان.
لە ئاستی ناوخۆشیدا پەیرەوی ئەوپەری شەفافیەت لە دۆسێی نەوت و چاکسازی ڕیشەییدا بکرێت لە سەرچاوەکانی داھات، ھاووڵاتییانی کوردستان کە بەدرێژایی مێژوو بەرگەی سەختی و نەھامەتی زۆریان گرتوە نابێت باجی ئەم دۆخە بدەن.[1]

بەرزو پیرۆزبێت یادی ڕاپەرین

فراکسیۆنی سەوز لە پەڕڵەمانی کوردستان