خەندان- خۆشناو حسێن
لەماوەی نزیکەی 17 مانگی ڕابردوودا لە تورکیا، هەشت هەزار و 432 ئەندامی هەدەپە و دەبەپە دەستبەسەر و دەستگیرکراون، له و ژمارەیەش دوو هەزار و 360 کەسیان، هاوسەرۆکانی گشتی هەدەپە و پەرلەمانتاران و هاوسەرۆکی شار و ناوچە و شارۆچکەکانن، ئەوەش بەوتەی جێگری هاوسەرۆکی گشتی هەدەپە.
لە کۆنگرەیەکی ڕۆژنامەوانیدا ئەمرۆ پێنجشەممە، لە بارەگای ناوەندی هەدەپە لە ئەنقەرە ئایسەل توغلوق، جێگری هاوسەرۆکی گشتی هەدەپە کە لەهەمانکاتدا، بەرپرسی کاروباری یاسایی و مافی مرۆڤی پارتەکەیە، ئاماری دەستەبەسکردن و دەستگیرکردنەکانی 17 مانگی ڕابردووی ئەندامانی پارتەکەی لەلایەن دەوڵەتی تورکیاوە ڕاگەیاند.
بەپێی ئامارەکانی هەدەپە، لە 22ی تەموزی ساڵی ڕابردوەوە تائێستا لە تورکیا کە ماوەی نزیکەی 17 مانگ دەکات، هەشت هەزار و 432 ئەندامی هەدەپە و بەدەپە دەستگیر و دەستبەسەرکراون، کە دوو هەزار و 360 کەسیان هاوسەرۆکانی گشتی و پەرلەمانتارانی هەدەپە و هاوسەرۆکی شار و ناوچە و شارۆچکەکانی بەدەپەن.
لەماوەی پێنج ڕۆژی ڕابردووداو لە داوی تەقینەوەکەی دەی ئەم مانگەی ئەستەمبوڵەوە تائێستا نزیکەی 400 کەس لە ئەندام و بەرپرسانی هەدەپە و دەبەپە دەستبەسەرکراون.
شەوی شەممەی ڕابردوو دوای کاتژمێر و نیوێک لە تەواوبوونی یاری نێوان بەشیکتاش- بۆرسا سپۆر لە یانەی ڤۆدافون ئارێنا لە ناوچەی دۆلمەباخچەی شاری ئەستەنبوڵ هێرشێک لەرێگەی ئۆتومبێلی بۆمبڕێژکراو ئەنجامدرا و لە هەمانکاتدا لە پارکی ماچکا تەقینەوەیەکی خۆکوژی ڕویدا، بەوتەی وەزیر ناوخۆی تورکیا له و تەقینەوانەدا 44 کەس کوژراون کە 37یان پۆلیس بوون.
ئێوارەی یەکشەممەی ڕابردوو گروپی هەڵۆکانی ئازادی کوردستان (تاک) لەراگەیەندراوێکدا لەسەر ماڵپەڕی فەرمی خۆیان، بەپرسیارێتی ئەو تەقینەوەکانیان لەئەستۆ گرت و ڕایانگەیاند، "دوو هاوڕێی ئازامان لەکاتژمێر 10:30 خولەک خۆیان تەقاندوەتەوەو بەهۆیەوە 100 پۆلیس کوژراون و سەدانی دیکەش برینداربوون."
ئایسەل توغلوق هەروەها ڕونیشیکردەوە، لەکۆ ژمارەی دەستگیرکراوەکان 21 هاوسەرۆکی هەدەپە-ی شارەکانن و 44 هاوسەرۆکی ناوچە و 17 هاوسەرۆکی دەبەپەی شار و 42 هاوسەرۆکی ناوچە دەستگیرکراون، هەروەها هاوسەرۆکانی گشتی هەدەپە و 12 پەرلەمانتار و سێ ئەندامی سەرکردایەتی هەدەپە و سێ ئەندامی ئەنجومەنی پارتەکەن.
هەروەها، لە ناو دەستگیرکراوەکاندا 62 هاوسەرۆکی شارەوانی سەر بە دەبەپە هەن و 57 هاوسەرۆکی شارەوانیش لە کارەکانی دوورخراونەتەوە کە لە و ژمارەیەش 43 سەرۆک شارەوانی قەیوم لە جێگایان دانراوە، هاوکات دە هاوسەرۆکی شارەوانیش دەستبەسەرکراون.
هەر بەپێی ئامارەکانی هەدەپە، لە مانگی تشرینی یەکەم و تشرینی دووەمی ئەمساڵدا، بە گشتی هەزار و 831 ئەندامانی هەدەپە و دەبەپە، دەستبەسەرکراون و 360 کەسیش دەستگیرکراون.
تورکیا ماوەیەکە هەڵمەتێکی بەرفراوانی دەستگیرکردن و دورخستنەوەی سەرۆک شارەوانییەکانی سەر بە بەدەپه و هاوسەرۆک و پەرلەمانتارانی هەدەپەی دەستپێکردووە، کە ناڕەزایی زۆری لەسەر ئاستی ناوخۆی تورکیاو وڵاتانی دەرەوە لێکەوتووەتەوە.
- 15-12-2016