بە گوێرەی ڕاگەیەنراوی ناوەندی ڕاگەیاندنی #هەپەگە#، سوپای تورکیا لە ناوچەی گەردیا-ی سەر بە شارۆچکەی #شەمزینان# گورزێکی تووندی لێ دراوە. ڕاگەیەنرا لە ئەنجامی چالاکییەکی گەریلادا کە لە 4 لاوە کراوە، 2 کابینە و 2 ڕەبایەی سوپای تورکیا تێکدراون و لایەنی کەم 20 سەرباز کوژراون.
لە لایەکی دیکەوە لە سنووری شارۆچکەی گەڤەر لە ئەنجامی چالاکیی نیشانەشکێنی گەریلاکانی یەژا ستار (یەکینەکانی ژنی ئازاد) 2 سەرباز کوژران. لە شوێنێکی دیکەی هەمان شارۆچکەش لە ئەنجامی چالاکییەکی گەریلادا ڕەبایەکانی سەربازانی تورکیا تێکدران و 6 سەرباز کوژران.
دەقی ڕاگەیەنراوی ناوەندی ڕاگەیاندنی هەپەگە:
$لە چالاکییەکی بەرفرەوانی گەڤەردا 20 سەرباز کوژران$
(هێزەکانمان لە چوارچێوەی هەڵمەتی شۆڕشگێڕیی شەهید پیرۆز و شەهید ئاگری-دا، لە دژی سوپای تورکیای داگیرکەر چالاکیی بەرفرەوانیان ئەنجام دان. زانیاری بەرفرەوان دەربارەی چالاکییەکان وەهایە:
ئێوارەی 19ی ئەیلوول\28ی خەرمانان کاتژمێر 18:15 لە شارۆچکەی شەمزینانی جۆلەمێرگ هێزەکانمان لە دژی گردی پاراستنی سەربازگەی ستونێ لە ناوچەی گەردیان چالاکییەکانی بەرفرەوانیان ئەنجام دان. لە چوار لاوە لە پەناگە و ڕەبایەکانی دوژمن درا و لە ئەنجامی چالاکییەکەدا 2 کابینە و 2 ڕەبایە بەتەواوی ڕووخێنران. لەم چالاکییەدا ئەوەندەی ڕوون بوویەوە 20 سەربازی دوژمن کوژران و چەندین سەربازیش بریندار بوون. سوپای تورکیای داگیرکەر لە دوای چالاکییەکە بە ئۆبوس، هاوەن و کۆپتەری جۆری کۆبرا بۆمبارانی ناوچەکەیان کرد و بە کۆپتەری جۆری سکۆرسکی-ش تەرمی سەربازانی خۆیان و سەربازە بریندارەکانیان لە ناوچەکە هەڵگرتەوە.
$لە ئەنجامی چالاکیی یەژا ستاردا لە گەڤەر 2 سەرباز کوژران$
هەمان ڕۆژ کاتژمێر 20:30 هێزەکانی یەژا ستار لە دژی سەربازانی داگیرکەر لەسەر گردی عەلی شێر لە سنووری شارۆچکەی گەڤەری جۆلەمێرگ چالاکییەکی نیشانەشکێنییان ئەنجام دا و 2 سەربازی دوژمن کوژران.
$لە گردی عەلی شێر 6 سەربازی دیکە کوژران$
ڕۆژی 20ی ئەیلوول\29ی خەرمانان هێزەکانمان جارێکی دیکە لە داگیرکەرانی سەر گردی عەلی شێر-ی شارۆچکەی گەڤەریان دا. لە 2 لاوە هێرشکرایەسەر پەناگە و ڕەبایەکانی دوژمن و 2 ڕەبایە ڕوخێنران. ئەوەندەی ڕوون بوویەوە 6 سەرباز کوژران.
$ئۆپەراسیۆن لە سنووری پولور$
17ی ئەیلوول\26ی خەرمانان کاتژمێر 14:30 سوپای تورکی داگیرکەر لە دەوروبەری ناوچەی پولور-ی دێرسم دەستی بە ئۆپەراسیۆن کرد. فڕۆکە جەنگییەکانی سوپای تورکیای داگیرکەر هەمان ڕۆژ لەنێوان کاتژمێر 8:30 - 12ی شه و بۆردومانی ناوچەکەیان کرد. لە دوای بۆردومانەکە بە فڕۆکەی جەنگی، کۆپتەرە جەنگییەکانی جۆری کۆبرا بەرەبەیانی 18ی ئەیلوول\27ی خەرمانان بۆمبارانی ناوچەکەیان کرد. لە دوای بۆمبارانە سەختەکە، سوپای تورکیای داگیرکەر بە کۆپتەری جۆری سکۆرسکی سەربازەکانی خۆی لە ناوچەکە دابەزاند. هەمان ڕۆژ کاتژمێر 15 هێزەکانی داگیرکەر بەبێ ئەنجام لە ناوچەکە کشانەوە. مێدیای سوپای تورکیای داگیرکەر بە بڵاوکردنەوەی هەواڵی درۆ بانگەشەی ئەوە دەکات کە لە ئۆپەراسیۆنەکەدا گەریلا شەهید بوون. بەڵام لە ئۆپەراسیۆنەکەدا هیچ هەڤاڵێکی ئێمە شەهید نەبووە.
$بۆمبارانکردنی هەرێمەکانی گەریلا$
فڕۆکە جەنگییەکانی سوپای تورکیای داگیرکەر بۆمبارانی هەرێمی زاپ-ی سەر بە هەرێمەکانی پاراستنی مەدیایان کرد:
فڕۆکە جەنگییەکان ڕێکەوتی 19ی ئەیلوول\28ی خەرمانان کاتژمێر 20 گوندی فلەها، ڕۆژی 20ی ئەیلوول\29ی خەرمانان کاتژمێر 22:30 و 23:00 گوندی فلەها و ساجا، 21ی ئەیلوول\30ی خەرمانان کاتژمێر 4:30 ناوچەکانی کونشکا و چەمچۆ-یان بۆمباران کرد. بەهۆی بۆمبارانەکە ئاگر لە دارستانی گوندی فلەها کەوتەوە و زیان بە دەخڵ و ڕەزی گوندنشینانی ناوچەکە گەیشت.)[1]
#21-09-2018#