سابیر عەزیزی: ئەدابیەو 3ی چێڵکڕ(جۆزەردان)1348ک.ڕ جە دەگا خنجیلانەکێ هانەگەرمڵەی سەر بە شارەسانوو پاوەی. تا کەلاسوو پەنجەی جە دەگانە وانانم، چا دمای ساڵەو 1359 ک.ڕ پەی درێژەدای بە وانای ئامانا شاروو مەریوانی. ساڵەو 1366ی ک.ڕ دیپلومم وەرگێرتەن. چادمای لوانا زانکۆ بەشوو تەربیەت بەدەنی(پەروەردٚەو لەشی) بەکارلیۆسم وەرگێرتەن و ئاماناوە شارەکاو سەڵواوای و مەریوانی جە خزمەتوو وانیارەکانە بیەنا، دماو 25 ساڵا خزمەت، ساڵەو 1391ی یانەنشین بیەنا. حەر جە زارۆڵیەوە هۆگرو شێعرێ و وانای بیەنا. بە درێژایی مامۆساییم جە موتالێحە و تێکەڵی چەنی ئەدەبیاتی نەبڕیانا. ساڵەو 1390ک.ڕ ئەوەڵین دەفتەری شێعریم بە شێوەی دەقی تازەی هەورامی و سۆرانی بە نامێ (هەناسەی کاڵ) 102لاپەلێنە جە لاو چاپەمەنی کانی شاروو سنەی چاپ و پەخش بیەنەوە. ساڵەو 1392ک.ڕ دۆوەمین دەفتەرەشێعریم ئادیچ بە شێوازی دەقی تازەی بە نامێ: (سۆسکەقەتیسەکا) 62 لاپەلێنە جە لاو چاپەمەنی ئەوینوو شاروو مەریوانیەوە،چاپ وپەخش بیەنەوە. ساڵەو 1398ی ک.ڕ یەرۆمین دەفتەرە شێعرەم بە نامێ: (نەپەردەچیام تا پەدەچیۆم، دیدارێ نەترەکا...) 116 لاپەلێنە جە لاو چاپەمەنی زایەڵەو مەریوانیەوە چاپ و پەخش بیەنەوە. هەر چا ساڵەنە ئەوەڵین بەرویری داستانیم بە نامێ: (زەماوندەو وەرمی) 7 داستانێ سەردەمیانێ، جە لاو چاپەمەنی زایەڵەو مەریوانیوە چاپ و پەخش بیەنەوە. ساڵەو1400ی ک.ڕ دۆوەمین بەرویری داستانیم بە نامێ: (نوخشەو قەڵاو ژیوگای) 8 داستانێ مەحاڵیێ تایبەت بە فەزا و فەرهەنگوو هەورامانی، جە ڵاو چاپەمەنی زایەڵەو مەیوانیوە چاپ و پەخش بیەنەوە.
ساڵەو 1390ی تا بە ئیسە دەسەو وەرپرساو ئەنجومەنوو فەرهەنگی- ئەدەبی ڕۆجیاری خەریکوو ئەرکی بەڕاوبەرینا و ئینە یەرێ ساڵێن پێسە پلەو ئەوەڵوو بەڕاوبەراو ڕۆجیاری هۆرچنیا و ئێدامە بە ئی ئەرکە پیرۆزەیە مدۆ.
پەنەوازا ئێشارە کریۆ چی ماوەنە جە فرەیە چا ڕۆنامە و هەفتەنامە و گۆڤارە کوردی و هەورامیەکا وتار و نوێشتەم جە بارەو شێعرێ، داستانێ، و خانشوو کتێبە شێعری و داستانیەکاوە چاپ و پەخش بیەنەوە.
بەشداروو فرەیە کۆڕ و کوبونەوە و بەرنامە ئەدەبی و فەرهەنگیەکاو مەحاڵوو هەورامانی و کوردەواریم کەردەن.
جە دەسەو بەڕاوبەراو گجارنامەو ڕۆجیارینە کە 11 ژەمارێش چەنە چاپ بیەن تێکەڵیم کەردەن و بەشدار بیەنا.
دەسەو نویسەراو زەنجیرە کتێبوو های تایبەت بە (ڕەوتی شێعرێ نوێ) کە تا ئیسە یەک ژمارەش چەنە چاپ بیەن.
ئیسەیچ بەردەوام خەریکوو وانای ونویستەینا.[1]