نامۍ: حەبیبوڵڵا
نامۍ تاتەی: سەی حەسەن
ساڵەو ئامای دنیای: 1884ز
ساڵەو کوچی دمایی: 1965ز
یاگۍ ئامای دنیای: تەپەلەر
یاگۍ کوچی دمایی: کرماشان
$ژیواینامە$
سەی حەبیبوڵڵا ئەڎاش جە سەیدەکاو (لهونی) و تاتەش جە سەیدەکاو(باینچۆ)ینۍ، جە دەگاو(تەپەلەر)ی ئامان دنیاوە ساڵەو(1884ز). هەر جە تەمەن و زارۊڵەیشۆ خەریکو وانای بیەن و دماتەر بیەن بە فەقی. تەمەن و فەقیەتیشەنە فرە دەگایەکان و هۆرامانی گېڵان پەی وەرگېرتەی زانستی شەرعی، دماتەر گېڵانۆ پەی زېدو وېش(ڕوانسەر) و خەریکو کارو کشتیاری بیەن. جە تەمەن و پەنجا ساڵینە بە مەڵامەت و داواکەردەی ماف و ئازادی، دە ساڵۍ زیڼان و ئەسفەهانینە زیڼانی کریان. دمای ئازاڎ کەردەیش گېڵانۆ پەی زېدو وېش و ساڵەو(1965ز) جە تەمەن و(81) ساڵینە جە (کرماشان) کوچی دماییش کەردەن و سەرو وەسیەتو وېش جە (گوڕستانو ڕوانسەری) بە خاکی ئەسپاریان. سەی حەبیبی ڕوانسەری پیێوە خوڎاناس،زانا، خاوەن ویروڕاو وېش، دایمە چەنی خەڵکە زاناو ژیرەکا سەروکاریش کەدەن و نزیک بیەن چەنەشان. حەزش جە موتالاتی بیەن، زیاتەریچ کتېبۍ(مېژوویی، ئەدەبی، جوگرافی). هەرچن وېش شاعېرێ گۆرەو نامدار بیەن، چەنی ئانەیچە دەسێ باڵاش جە شیکەردەیۆ شېعرەو شاعېرەکا بیەن. فرەو شېعرەکاش بابەتۍ(دڵداری، کومەڵایەتی، دینی، تاریفۍ سرووشتی). وەختێ جە زیڼان و ئەسفەهانی زیڼانی بیەن، داوامەکەرۊن ئەو شەماڵی(بادی شەماڵ) داڎو سکاڵاش بەرۊ پەی لاو بارەگاو پېخامئاوەری(ص) بەڵکم بە خاترەو زاتی موبارەکیش خوڎای گورە دەرێ خێرېش پەی کەرۊوەو زیڼانەنە ئازاڎ بۊن.
شەماڵ دەخیلەن قاسدمان نیەن
عەرزەی زەلیلان هەر بە تۊ بیەن
جەی وەرتەر هەرکەس مەبیا گرفتار
هاناش بە تۊ بۍ پەیکی وەش ڕەفتار
تۊ پەناو مەلجەو دەردەدارانی
واستەی وسول بەینی یارانی
قاسید بیت جە بەین مەجنون و لەیلۍ
عەرزەی قەیس یاونای فراوان خەیلۍ
جە ڕوژی ئەزەل تا وە ڕۊی مەحشەر
هیچ کەس چوون ئېمەش نەیاوان بە سەر
جە جەفای گەدوون، ڕەنج بەڎکاران
مەر خالق زانۊ چونمان ویاران
های هانا شەماڵ عەرسەمان تەنگەن
پای قاسید وەلای فریادڕەس لەنگەن
بۊ نە ڕاگەی هەق شەماڵی ڕەهبەر
هەرچن زەحمەتەن مدارا مەکەر
عەرز ئی جەرگەی جگەر هوونینە
ببەر وە قاپی شاهی مەدینە
شەرح حاڵمان وە سوزی دەروون
یەک یەک بەیان کەر تۊ زاتی بېچوون
عەرز کەر یا ڕەسول پادشای ئەکبەر
پەنای ئوممەتان نە سارای مەحشەر
جەمع مەحبووسین حەبس ئەسفەهان
ئیرادەی تەقدیر پادشای سوبحان
ئومېدشان جە لای مەخلوقات بڕیان
پەردەی سەبرشان هەزار جار دڕیان
جە قاپی قادر تاک تەنیای فەرد
تۊشان وە شەفیع گوناشان ئاوەرد
بە حاجەت قوربت نە دەرگای ئەکبەر
ناجاتشان نە حەبس ئەسفەهان بدەر.[1]