جە قازان خەم دڵ کەردەن وە ئاو
وە درۊ ماچۊ مەگېروو گوڵاو
زێوەری شاعېر ماچۊ:
عارەق نیە لە عالەما، کە لابەرێ لە دڵ غەما
بە غەیری قەترە عارەقێ، لە ڕووت کە دێتە خوارەوە

دلۍ باخ و گوڵزارو ڕوومەتو مەعشوقېنە(کوڵمۍ) وېناکریێنۍ بە گوڵ، گوڵ وەختێ شەونم مەوارۊنە سەرش جوانتەرو گەشتەر مرمانۊ، عارەق و کوڵما زیاتەر گەشی مڎۊ بە ڕوومەت و ژەنۍ. پەی فرەو شاعېرەکان کەرەسێ بەردەوامو زەریفەن پەی خولقنای شېعرە جوانەکا. مەولەویچ هەر پاسە:
عەرەق چوون شەونم نیشتەن نە ڕووی گوڵ
تەڕ کەردەن تاتای توغراکەی سونبوڵ
ئیتر وەختێ زوڵفان و یارۍ بە شنەو شەماڵی باوەشین و کوڵما کەران، بە قەترە عارەقەکا تەڕۍ مەبان و بۊو بەرام و گوڵان و کوڵما مەگېران. ئینە وەسېن پەی ئەفشان کەردەی عەترو زوڵفانی بە دەشت و سارا، سەیدی واتەن:
جا کە بۊی زوڵفت وە گوڵان یاوا
گوڵان خېزیان پەی عەزمی داوا
مەعشووقەو مەولەوی بارەقەڵڵاو ئینەیە هەڵای تېرواردەیش نیەن، ئاڎە زیاتەر گوڵاوش گەرەکەن. بە خەفەت، خەم، مەینەت سینەو دەروون و مەولەویش گرینان، سینەی قازان ئاساش قوڵۍ مڎۊ، وایەش گرینای دڵ و خونچە ئاساو مەولەویەن دلۍ قازانەو سینەیشەنە، پەی گېرتەی گوڵاوی. بەڵام مەولەوی وەرگەو ئا گەرمی دەروونی و سینەیشە نمەگېرۊن، پەوکەی ماچۊ:
عەرەق چوون شەونم نیشتەن نە ڕووی گوڵ
تەڕ ڪەردەن تاتای توغراکەی سونبوڵ
جە قازان خەم دڵ ڪەردەن وە ئاو
وە درۊ ماچۊ مەگېروو گوڵاو
ئازیزم! گوڵاو بۊی خۊی کوڵم تۆن
ئەر بۊی تۊ نەبۊ، بۊی گوڵاو جە کۊن؟
زەڕەی بۊی زوڵفت کەفتەن نە بەرزان
بۊی گوڵان کەردەن، جە بەرزان هەرزان
ئازیز، وە مەرگت گەر ئینسافت بۊ
هەنی کافییەن بۊی زوڵفت پەی تۊ
ئیتر چ حاجەت وېت مەدەی عەزاو
قەبووڵ کەری جەور، مەگېری گوڵاو؟.[1]