باخچێوە بېگەرد
نویستەی: میرزا ئۆلقاڎرو پاوەی
بەشۍ: دەهەمە
ئەچی بەشېنە میرزا ئۆلقاڎر باس جە خەلقو (کەش و کۊ وکەمەری) کەرۊن، چەنی بنیاڎنیای (قولۍ قافی)، هەکە کەشێوە گۆرەن بە چواردۆرو زەمینیرە وەشکریان. پېسە مزانی کەش و کۊکۍ کۊیێنېرە، بەشێشان ئینێ دلۍ زەمینیەنە، ئانەیچ پەی مەحکەمی وېشان و زەمینیچ، ئانە باسێ زانستین، میرزا ئۆلقاڎریچ هەر پاسنە ماچۊ:
جەو زەلزەلەی سەخت، جایی چۊڵناکدا
کوان، وېنەی (مېخ) ، کۊیا بە خاکدا
زەمین سەنگین بی، هەتاکە تاوا
تا سەنگین، نە پشت، گاو ماهی یاوا.
بەڵام دماتەر میزا دلۍ قووڵایی زانستینە مەگېڵۊوە سەرو ئەفسانە وەڵینەکا، (تا سەنگین، نە پشت گاو ماهی یاوا) .

دیسان هەم جە نۊ، بینای بانی سەر
خەلقەت کەرد، کاوان، کەش و کۊ و کەمەر
هەردان، شاخان، زەردان، ئېڵاخان
بەرزان، کۊساران، زاغان، سەخناخان
کان کۊی کەرەم، ڕەبلعالەمین
یەک یەک قەرار دا، نە بانی زەمین
بەڵ لاڎێ زەمین، بگېرۊ ئارام
هەنی ساکن بۊ، تاکو قامەلقیام
سەنگی هەرد و خاک، گرد مەلاقی بۍ
حەدەکەی زەمین، باز، هەر باقی بۍ
دیسان هەم بېباک، دانای سنعەت باف
مەوجوود کەرد دەردەم، هەر هەفت قوللەی قاف
هەر هەفت قوللەی قاف، دەوری دنیای دوون
قافش قەرار دا، وە بۍ چەند و چوون
جەو زەلزەلەی سەخت، جایی چۊڵناکدا
کوان، وېنەی مېخ، کۊیا بە خاکدا
زەمین سەنگین بی، هەتاکە تاوا
تا سەنگین، نە پشت، گاو ماهی یاوا
غەوز وە کۊی قاف، کوان گشتەوە
هەر تاکە، جەنبش، دنیا نیشتەوە
بەڵام دنیای، خۊشڕەنگی دولبەر
خاڵی جە شېوە، سەدای، زیلبەشەر
موڵکی بۍ ساحیب، یۊرتی چۊڵ و هۊڵ
نە شنۊی شەماڵ، نە شانای شاقووڵ
نە شار، نە قەریە، نە ئاوەدانی
نە دار، نە ئاتەش، نە ئاو نە کانی
تەنیای بۍ شەریک، لوتفش یاری کەرد
پەی ئاوەدانی، ئاوش جاریی کەرد
ئەشجارات، یەکسەر، نەباتات، یەکسەر
بەرئاما جە خاک، بە ئەمری داوەر
بە حوکمی فەرمان، قەدیمی ئەقدەس
ئاما ئاتەشەن، وە یەک نیم نەفەس
جە کوورەی دوزەخ، کەفت وە سەربیسات
باقین، هەتا ڕووی، عەرسەی عەرەسات
پەی ئېد، تاکو کەمتەر، ببۊش سۊزی تاو
هەفت جار شوشنشان، ئەو نار، هەم بە ئاو
گشت هەم، جە قودرەت، پادشای بېچوون
وەیتەور، داریا، وە ڕووی دەهری دوون
تیوور و وحووش، مورغ و موور و مار
غەیر، جە ئادەمی، سازنا، وە یەک جار
نە چۊڵ و ئاوان، قەرار دا، جاشان
مەعاش و ڕۊزی، زەید و ماواشان
غەرەز، وە شەش ڕۊ، یاوا وا تەمام
حەقق، وېش، فەرماوان، سیتەتە ئەییام.[1]