میرزام یە وەعدەی نەو وەهارانەن
سەرەتای تەلمیت خاتر دارانەن
فەسڵ وەسڵ دۊست سەیر هەردانەن
لەڕەی لەڕزانەی زەنەخ دارانەن
زەمزەمەی بوڵبوڵ، دەبدەبەی گوڵەن
نە زارەی هوزار دەروون پەڕ چڵەن
نە پرشەی شۆنم نە ڕووی پەردەوە
نەرگز مەست چەم وەلاو کەردەوە
نەقارەی منقار تەیرانی سوب خێز
بېزەنان نەغمەی نەکیسای پەروێز
چریکەی چەکاوس چوون حەنجەرەی عود
مەر دەنگی چل چەنگ پەنجەی بارەبود
هۆ هۆی بایەقوش شەو وە هەردەوە
زامی دەردینان تازە کەردەوە
دەنگی قیڕەی قاز سوب نە سەحرای سووس
مەر موزیقەی مەشق شەهەنشای عەرووس
تیپ تیپ قوڵنگان قەتارەی قازان
میرزام تاکو وە ژوور ئاوات مەوازان
جەرەس وە ئاهەنگ خۊش قانوونەوە
دەنگ وە سەدای ساز ئەرغەنوونەوە
قومری وە قووقووی نەغمەی هوېشەوە
مل وە تەوقی زەڕ وەفا ڕیشەوە
قوقوشەن وە فەرق شاخی سەروەوە
مەر حاجی وەرای سەفا و مەروەوە
قەواقوی قەتار قوڵەنگی تیژ پەڕ
کەردەن هۆش و گۊش کەڕڕووبییان کەڕ
فەرشی فەرەح بەخش سەوزەی قەدەم خێر
فەرشەنەن وە مڵک سەحرای گەرمەسێر
دەی ساجەی دەمدا هەر کەس دڵێش بۊ
چوین بوڵبوڵ هەوای سەودای گوڵێش بۊ
یا خود چوین فەرهاد دڵ ئاهەرین بۊ
مەزەی مەزاقش نامی شیرین بۊ
یا خود جە دەروون مایە مەیلش بۊ
چوون مەجنوون هەوای خاڵی لەیلش بۊ
مەبۊ ئەزمی سەیر سەوزە و سارا کۊ
دامانش نە هوون دەروون دارا کۊ
نەو فەیزی فتووح نەو وەهارەوە
نەو بەیزای ئەنوار کۊی دڵدارەوە
سەیری سەحرا و دەشت سەری دیارانەن
ناڵەی مورغەزار... مێرغوزارانەن
دۊست لە بەهانەی دڵستانی بۊ
لا قەید نە جەواب «لَن تَراني» بۊ
شەو سەرگەردانان سەر ئازاد کەرۆ
شیان وە وادي أيمَن شاد کەرۆ
مەر مەلایش نیشۆ شەو نە دەیجووردا
نە تیرەی تاریک سیای بێ نووردا
ئەر ستارەم بێ نەوا و بەرگ بۊ
وە دینی دڵدار هویت شاد مەرگ بۊ
#مەلای جاباری# [1]