بادی لەیلا خان
بادی عەنبەر باد بورجی لەیلا خان
مشنیای تای دێز بەڕەزای شاخان
مەشاتەی گێسووی بڵند دەماخان
نەسیمی مەحرەم مابەینی یاران
شارەزای شوقەی شەوبۊ نەوهاڵان
نامەیەک نە شەرح دڵەی پەڕ دەردم
شەرحێ نە سەودای هەناسەی سەردم
بێ خەیلۍوەختەن دوور کەفتەی زێدم
غەیر جە تۊ وە کەس نییەن ئومێدم
نووسانم وە زۊخ زامانی کاری
برەش وە زامن تون وە دیاری
نامەم بگێڵان وە هۆزانەوە
بدەرۆش وە دەس دڵسۊزانەوە
وە سۊزی سینەی دڵ خەراشەوە
هامسەران یەک یەک بواناشەوە
هەر کەس دڵسۊز بۊ سۊزێش نە دڵ بۊ
دیگی دەروونش پەی من وە کوڵ بۊ
بگرەوان باچان لێڵاییم لێڵەن
بە نامەی مەلان نەزانی وێڵەن
شەماڵ دەخیلەن تۊ وە دڵشادی
باوەر نامەیەک گەردن ئازادی
ئەوە من ڕۊییم وەلای ڕۊمەوە
مەر دۊعای خوېشان باوەرۆمەوە
سەر نیام وە پای موڵکی ڕۊمەوە
مەر دۊعای خاسان باوەرۆمەوە
#مەلای جەباری# [1]