کۊر بام جە دیدە یە ساڵی نەوەن
تەمام مەنسووبان، ئەر ڕۊ، ئەر شەوەن
مات و سەرگەردان بێ خورد و خەوەن
نە دووریی خەسرەو مەدان وە سەردا
یەخە تاکو دامان وستەن بە وەردا
ماچان: مەر خەسرەو سەرمەستی خاوی؟
مەر بېزار نە سەیر شکار و ڕاوی؟
یە وەخت و وادەی سەیر و شکارەن
سەحرا پۊشیدە سەبزەی وەهارەن
خیابان سەبزەن چوون زومەڕەد ڕەنگ
بوڵبوڵ مەشغووڵەن بە ناڵەی ئاهەنگ
گوڵسورخ نەمەندەن ڕەنگ نە جەمینش
شەقایق ڕەوان ئەشک و ئەسرینش
نەرگس حەسرەتمەند نە دیداری تۊن
داغداری باڵات، ئەر شەوەن، ئەر ڕۊن
شەوبۊ نە کۊهسار [هەر داد پەلاش]
بەنەفشە و ڕەعنا نەوحە و عەزاش
زێبا و نەستەرەن چەنی سیسەنبەر
ئەلوەداشانەن پەی شای لاڵ کەمەر
سۊسەن و لالە ئەر بە داخەن
گوڵەزەرد پەرێت نە ئاخ و داخەن
گوڵ زەمەق پۊشا لیباسی ماتەم
ئەو داغداری تۊن شای دارا حەشەم
هەر یەک وە ڕەنگێ داخ وە بانی داخ
نە داخی باڵات سەرتاپا قەڵاخ
نەوحەخوانی تۊن نە باغی خەسرەو
جەم بەستەن نە دەور ئوتاغی خەسرەو
خوسووسەن «سوڵتان» مەحزوونی موزتەر
مەناڵوون پەرێت جە زەینەب بەتەر
مەواچوون: فەریاد فوغانم خەسرەو
ڕەنج بەردەی بێ سوود وە بادم خەسرەو
عەزیزی نازار باوانم خەسرەو
بینایی بە ڕاست چاوانم خەسرەو
نەهاڵی تازە پەی یاوام خەسرەو
ئاتەشپارەی جەنگ هەم داوام خەسرەو
موونیس چەنی دەرد هەم غەمم خەسرەو
مەلوولی زەنجیر ستەمم خەسرەو
وە دەستی ئازار عەلیلم خەسرەو
نە دامانی خاک زەلیلم خەسرەو
نەو قەبری تاریک دەستاخم خەسرەو
ساحێب سوپا و سان بەیداخم خەسرەو
برای مەنۊچیهر سیفاتم خەسرەو
کۊچ کەرد وە ڕاگەی نەهاتم خەسرەو
جوانی بیست و نۊ ساڵەم خەسرەو
دڵخوشی ماتەم نە عاڵەم خەسرەو
بەبێ تۊ وێڵم نە هەردان خەسرەو
قەسەم بە ئیعجاز شای مەردان خەسرەو
تا ئەو ڕۊ سەحرای مەحشەر مەخێزۊ
شەرت بۊ ئەسرینم بە گڵکۊت ڕېزۊ
لاڵ بام جە زووان، کۊر بام جە دیدە
نە دووریی باڵات، شای پەسەندیدە
هەرچەند مەگرەوو بە زاری و خورۆش
جارێ تەر دەنگت بژنەوون بە گۊش
هیچ دەنگێ نییەن پەی ساکنیی دڵ
وێڵ و سەرگەردان خەرگاو و خجڵ
مەناڵوو زار زار بە دیدەی غەمبار
ئەسرینم ڕەوان چوون سەیلی وەهار
یە زایەڵەی شین ڕۊی ڕەستاخێزم
مەگرەوو زار زار پەی شای پەروێزم
مەواچوون: خەسرەو قەزات بە گیانم
مەڵهەمی دەروون ڕېشی بوریانم
بەو خودا قەسەم واحید و فەردەن
نە تۊ زیادتەر کەسم نەمەردەن
شەو و ڕۊ نە هیجر داغی باڵای تۊ
هەر مەواچوون: داد، هەر مەکەروون ڕۊ
مەواچوون: هەی داد، شای خەسرۆم ڕۊ
جێگەی گشت کەسم نە جای بابۊم ڕۊ
مەحرەمی ڕازان جەی وەرتەرم ڕۊ
دڵداری عەزیز هەم دڵبەرم ڕۊ
نە یاگەی بابۊم جێگەی خوېشم ڕۊ
ئیسە سەر دەفتەر ڕۊژی ڕەشم ڕۊ
ساحێب وەفا و شەرت جای هاوارم ڕۊ
ئەنیس و موونیس غەمگوسارم ڕۊ
شەوکەتی جەمیع ئەردەڵانم ڕۊ
خامۊشیی چرای نۊ باوانم ڕۊ
نەهاڵی دەوڵەت لافاو بەردەم ڕۊ
جە نەخلی شادی بەر نەوەردەم ڕۊ
ئەمیری ئەعزەم کوردستانم ڕۊ
مایەی دڵخۊشیی دۊستانم ڕۊ
سەرداری ساحێب موڵک و ماڵم ڕۊ
مەجنوونی چۊڵگەرد پەشێو حاڵم ڕۊ
خەسرەو، خۊم فیدای ناکامیی کامت
فیدای جوانیی نیمە تەمامت
چۊن مەبۊ -ئاغەم- نە ڕای دەهری دوون
من ساغ و سەلیم تۊ بە سەرنگوون؟
ئومێدم بە حەق دانای زولجەلال
منیچ هەر بەو شەرت شێخان کەم بە ماڵ
تا جە ڕووی خەسرەو نەبوون شەرمەسار
بشوون وە خدمەت شایی جەم ویقار
ئیسە تاکو زیندەم قەلبم چوون کەواو
جە دووریی خەسرەو مەسۊزۊ بە تاو
«عیزەت» دۊعا کەر وەس بدەر گەزاف
مەشی بەو مەکان بە یەقینی ساف
#مەستوورە ئەردەڵانی# [1]