بە تاجت قەسەم، فەسڵی وەهارەن
شکۊفەی گوڵان جە دوور دیارەن
ئیبتیدای فەزای گوڵ و گوڵزارەن
زومەڕەد ڕەنگەن سەحرا و کەش و کۊ
بە جەخت مەناڵان نە هیجرانی تۊ
گوڵان و گوڵزار وە هەم جەم بەستەن
بوڵبوڵ جە بادەی وەسڵشان مەستەن
ژەرەژ مەوانۊ نەسەر کڵاوان
مەدۊ جیلوەی وېش نە پای وەفراوان
بوڵبوڵ نە سۊزش بییەن نەغمەخوان
هەزار مەوانۊ بە هەزار دەستان
درەختان خەڵات ئەخزەری پۊشان
دڵەی دەساخان جە نەو مەخرۆشان
دەهەن وا کەردەن شکۊفەی دڵ چاک
بەرگی تاک پۊشان خەڵات وە ڕووی خاک
وەنەوشە و ڕەعنا، گوڵ مینا و سۊسەن
خەیمەشان پێکان زێبا و یاسەمەن
بداخ و زەمەق، نەسرین و ڕېحان
گوڵ سورخ و گوڵ زەرد چەنی ئەرغەوان
هەر یەک بە تەورێ خودسازیشانەن
ئەمما پەشێوی دووریی تۊشانەن
سوپای سیسەنبەر خێزان جە باخان
گوڵ مێخەک کەردەن چەمەن چراخان
لالە و شەقایق سونبوڵ و شەوبۊ
زار زار مەگرەوان پەرێو عەزڵ تۊ
نەستەرەن نە باغ، نەیلۊفەڕ نە ئاو
نەرگس نە چەمەن، سەمەن نە شەتاو
پەی دووریت -قوربان- سەرحەڵقەی یاران
هەر یۊ بە نەوعێ ماتە مۍ داران
نی مۍ گەردن کەچ، نی مۍ سەر نەوەر
نی مۍ جگەرخوون، نی مۍ خاک وە سەر
نی مۍ سووچیان سەبوونی دووری
نی مۍ وا بەردەی واگەی مەهجووری
نی مۍ جامەی گیان وېشان کەردەن چاک
نی مۍ دوور جە تۊ، سەر نییان وە خاک
نی مۍ چەنی غەم سەر نییان وە هەم
نی مۍ پەی ئامات، گەرتەنی وە دەم
خولاسەی کەلام: مایەی نیشاتم
ڕۊح ئەفزای ڕۊحم، مایەی حەیاتم
قەسەم بەو لیقای یووسف ئاسای تۊ
هیچ یەک نەی گوڵان نەکەردەنم بۊ
تەماشای سەحرا و گوڵانی وەشبۊ
شەرتەن نەی وەهار جە من حەرام بۊ
سەیری گوڵاڵان نە پای کۊساران
بێ تۊ - دوور جە تۊ - سەفا نەداران
ڕەزای فدەویت زویر و زارەن
پەرێو مەعزوولیت جە گیان بېزارەن
گەردوونی چەپگەرد چە نەردێ بازا
ئەساسەی عوزلەت نیم ساعەت سازا
چێش مەبۊ فەڵەک نەردێ بشانۊ
دەردەکەی ئېمە بەوان بنمانۊ؟
مەستوورە ئەردەڵانیمەستوورە ئەردەڵانی [1]