#میرزای لوڕستانی#

هەردەم هەر ساعەت ڕازان مەکەردن
جە گۊشەی لەبان شەربەت مەوەردن
ئاخەرەلئەنجام خاتۇ زین بەوېش
عەرزکەرد وە خدمەت ئەمیر دڵرېش
بەوېم مەزانۇن چەرخ پڕ ستەم
ئاخر مەکەرۊ هەر دۇمان جە هەم
ئېد خاسەن نگین ڕەدبەدەل کەریم
نەبا جە ناگاﮪ جە یەک بوېیەریم
هەر دۇ نگینان ڕەدبەدەل کەردن
نە جامەی ڕاحەت سەر وە خواب بەردن
بڎیە وای چەرخ، جەور ستەمکار
چە قەهرێ دارۊ جە یاران یار
قېیامەت ئەوسا مەبۊ ئاشکار
عاشق بۍ مەعشۇق بگېرۊ قەرار
ئەی دونیای فانی هەر پاسە کەردەن
مایەش ڕەنج وە غەم فەراق وە دەردەن
بە ئەمر قودرەت بەنای بانی سەر
پەیدا بین دەر دەم ئەو دۇ کەبۇتەر
هۊرداشتن خاتۇن هەم وەبۍ ئەندېش
بەردن وە ئۊتاق جاگە و ماوای وېش
پاسەشان واتەن بوزرگان دین
ڕازشان مەندن نە ڕۇی سەرزەمین
هەر کەسێ دۇ کەس بکەرۊ جە هەم
بېشک یاگەشەن ماوای جەهەننەم
ئەر کەسێ کەسێ وە یەک شاد کەرۊ
جەنەتولماوا پەی وېش مەبەرۊ
مەبۊ وە هەمراز حۇریان جەنان
سەر ئازاد مەبۊ بە ئەمر سوبحان
بشنەو جە خاتۇن وەقتێ سوب سەحەر
جە خواب مەستی سەر ئاوەرد وە بەر
هەرچەند نېگە کەرد کەس نەدی وە چەم
دل دا وە تۊڕ دام نە خمخانەی خەم
نېگە کەرد نگین شناسا جە دەست
ئاهی سەرد کېشا پەیاپەی پەیوەست
واتش خودایا گونەکار نیم
عاسی شەرمەسار دۇر جە یار نیم
ببەخشی بە حال جەستەی گرانم
تەن سفتەی زۊخال هەم ناتەوانم
ئیم شەو چ شەو بۍ من کەرد گرفتار
سۊپەند ئاساییم وست نە کۇرەی نار
درېغا درېغ ئېم شەو مەمردم
دامان کەفەن وە خاک مەبردم
نەوا بەی دەستۇر مەحرۇم و مەهجۇر
دۇر جە یاوەر بۇم یاوەر دۇر جە دۇر
ئومېدم ئیدەن حەیی ڕەبانی
فەرد و فریادرەس حەق سوبحانی
یا باری هەنی شاد بۇن وە ئەمیر
بەرداری نە پام ئی بەند و زەنجیر
یا ڕۊحم بستان جە تەن بېقەرار
بېزارم جە گېیان مەدەرەم ئازار
بېخود بۍ دەردم، مەدهۇش بۍ جە خاک
نەرگسان و ئەسر خۇنی کەرد نمناک
بەی دەستۇر خاتۇن گرفتار غەم
ئەم جار بواچین ئەخبارات مەم
سوپای خاوەری چۇن سەردا ئەسەر
داش نە قەلب لەیل شکەست دا لەشکەر
[1]