ئاژەڵداری جە هۆرامان
ئەوەنویستەی و دەسکاریکەرڎەی: ئەسعەد ڕەشید
بەشۍ دوەمە
جە ژیوای هەوارنشینی و ئاژەڵدارینە، چن واچۍ و دەسەواچۍ میانو ئا خەڵکانە ئاموشۊکەران، پەی زانیاری تۊمارېشا کەرمۍ:
پەچەگا_ بێرەگا:
شوانو گەلەی، جە وەهارەنە ڕوێ دوۍ جارۍ و جە هامن و پاییزەنە ڕوێ جارێ، گەلەکەی مارۊوە پەی یاگێ کە نزیکو دەگێن، پەی دۊشای مەی و بزەکا بە دەسو ژەنەکا(گەلەبێرەکەر)، ئا یاگۍ(پەچەگا یان بێرەگا)ش پەنەماچان. چا وەختایچەنە کناچۍ و ژەنی وېشان ڕازناوەو لاوۍ و گەنجۍ دەگێچ مەگناڕا پەی ئاگەیە.
بەڵام دمای پەڵەو وارانی و نزیک بېیەیۆ زمسانی، گەلەو حەیوانی، جە بەرۆ، نمەمەنۊوەو گرڎ وېرەگانێ (شوان)ەکە، گەلەکەی پەی دەگێ مارۊوە، هەر کەسەو سەرە ئاژەڵو وېش بەرۊوە یانەو دلۍ گۆڕیش کەرۊ، شەوېنە ئاڵفشا پەنە مڎریۊ.
جە (پەژم) و (مەرەز) و (موو) ئاژەڵەکا (چۊخەڕانک، خەرار، وەرېسە، لېف، جاجم یان مەوجە، قاڵییە) وەشکریان.[1]