#میرزای لوڕستانی#
سێ شەبانە و ڕۇز مەجلس بۍ نەکار
ژەندن پەرێشان ساز و مۇسیقار
تاجئەلدین سێ شەو نەشی بە دیوان
ھەم عەفۇ چە کۊ-ی مەردی پەھلەوان
شەخسێ کېیانا ئەمیر بە دەوان
سێ شەوەن تاجدین ناما ن بە دیوان
مانېعش چېشەن چېشش دان ئەسەر
بکېیانۊ جواب جە خەیر و جە شەڕ
جوابدا تاجدین واچە وە ئەمیر
مېھمانم ئامان با نەبۊ دڵگیر
ئاما ئەو دما فرستادە جە ڕا
عەرزکەرد وە جەناب ئەمیری ھېجا
میر زەیندین جە نۊ کېیانا پېغام
وېش و مېھمانش بېیان وەقتی شام
چۇن یاوا بە گۊش ڕېحان ئی خەبەر
دل و دەرۇنش پېش ئاما وە دەر
شی وە لای دایە عەجۇزەی دەوران
واتش ئەی دایە فکرێ کەر پېمان
ئېم شەو میر زەیندین تاجدین و مېھمان
دەعوەت کەردەنان پەرێ وەردەی نان
تاقی مەزانۇن ئەمیری گوزین
مەدەرۊ پەنەش ئېم شەو خاتۇ زین
پەی من دۇد و داغ مەمانۊ وە جا
ئەگەر عومرم بۊ نەی زێد و ماوا
بۊ تا ئەمن و تۊ پەیوەندێ کەریم
کار و تەدبیرێ پەسەندێ کەریم
وات دایە فەرزەند یە چە فۊغانەن
بە دەستم ئی کار خەیلێ ئاسانەن
دام و تەزویرێ بکەرۊن ئەو پا
ھەر دۇشان جە ھەم بکەرۇن جودا
دەردەم ھۊرېزا ئەو زاڵی وەرین
لوا وە یانەی قەرە تاجئەلدین
نگەکەرد جە دۇر قەرە تاجئەلدین
چەنی مەم وە پا ئیستادەن قەرین
لادێ شی وەلاش دەرۇن پەڕ جە غەم
عەرزکەردش وە مەم ڕازانی دژەم
واتش ئەی فەرزەند نۇر دیدەی دین
ئەر شیت بە دیوان ئەمیر زینەدین
بە وېم مەزانۇن تاقی خواھەرەش
مەدەرۊ پەنەت مەشۊ نە وەرش
خواھەرێ دارۊ نە مەتبەخ کەفتەن
گڕس و گەندیدە ھەم لار و چەفتەن
بەناشەن بە مەکر بە فەن و فنۇن
جوانێ چۇن تۊ کەرۊ سەرنگۇن
جە ڕاگەی سەواب من واتم پەرېت
باقی ئېختېیار بەوېتەن بەوېت
ئەمیر چۇن شنەفت قەوڵی زاڵی پیر
دڵ پەرێ دڵدار بەندکەرد بە زەنجیر
وەقتی شام یاوا وارد بین وە ھەم
یاوان ئەو سەرای ئەمیرانی جەم
بە ڕەسم و ئاداب شەرتی ئەدەب کەرد
مەشرۇت زەیندین میر بە جا ئاوەرد
زەیندین ھەم بۇسا ھەر دۇ گۊنای مەم
نېشاند جە پەھلۇش نېشتن چەنی ھەم
واتش وەش ئامای ھەزار بار وە خەیر
قودۇمت ئاوەرد بەی مەکان و دەیر
[1]