باخچێوە بېگەرد
ئاماڎەکەرڎەی: ئەسعەد ڕەشید
بەشې سەڎ و چواردەهەمە
دمای سەرلەنۊ سەفەرو محەمەڎی پەی (شام)ی، چەنی مامۊیش، نیمەو ڕێنە پەی نانواردەی، لاشادا، محەمەڎ لوا چېرو سەیەو درەختێنە نیشتەرە، ڕاهیبێ گۆرە ئاما پەی لایشان، کاتێ محەمەڎش دی بنەو دارەکەینە، سەرەش سوڕمەن، ماچۊ: ئا دارە تەنیا دوې کەسې ملانە سایەش، یۊشا عیسای مەریەمەن کە وەڵتەر لوانەنە چېرش، دوەمشان، پېخامئاوەرو ئاخر زەمانییەن.
تەشریفی حەزرەت، شای ئەرفوعەلقەدر
قەدەم، ڕەنجە کەرد، پەی درەخت سەدر
بە نشت و ڕاحەت، چوون مەلەکەی عەرش
سەف بەستەن، جە فەوق، فریشتانی فەرش
ڕاهیبی کەبیر، ئاما، پەی تەسدیق
پەی ئازمایی، پەرسا، جە سدیق
وات: ئەو شەخسە کېن، نە پای ئەو درەخت
چوون پادشاهان، ساحیب تاج و تەخت
واتش: محەمەد، وە عالەم موحەبب
ئیبن عەبدوڵڵا، عەبدولموتەلیب
ڕاهیب، وات: وەڵڵا، ئەو پېغەمبەرەن
شانش شەفاعەت، یەومەلمەحشەرەن
سەرداری ئەعزەم، گرد سەردارانەن
مەعلووم بۊ خاتەم، پېغەمەرانەن
وەیتەور جە ئینجیل دییەنم، وە چەم
جە عیسای مریەم، ڕەسوولی خاتەم
بە غەیر، ئەو دوو شەخش باقی هیچ ڕەسوول
وە پای ئەو درەخت، نەکەردەن نزوول
سدیق، هەر ئەو ڕۊ، پەی بە مەتڵەب بەرد
بە نبوەتش، بە دڵ باوەڕ کەرد.[1]