باخچێوە بېگەرد
ئاماڎەکەرڎەی: ئەسعەد ڕەشید
بەشې سەڎ و پاڼزەهەمە
دمای تەمەنو ویس ساڵیش، ئیتر مەلائیکې وەرە وەرە ئېنې وەرچەمو محەمەڎی، جە وەرمەنەو جە حاڵەتو بېڎارینە، ئیتر محەمەڎ چا حاڵەتەیە، سەرەش سوڕ مەنې، پەوکەی مامۊش هاگاڎار کەردۆ، ئاڎییچی بەرد پەی لاو تەبیبی، کاتێ تەبیب دیاش پۊرە، زاناش کە ئاڎ فەخرو کائیناتین، مامۊش هاگاڎارکەردۆ ئەر یەهودیەکۍ پەنەش بزانان، ئانە بە شمشېر قەتڵش مەکەران.
بە بیست و یەک ساڵ، سونعی ئەو سەروەر
عومری هەمایۆن، شای خەیرولبەشەر
مەلائیک کەم کەم، وېشان کەرد ئیزهار
گاهێ، جە خەودا، گاهێ، جە بېدار
تا یەک ڕۊ حەزرەت، فەرماوا، ئەی عەم
من عەجایبات، مەوینۊم، وە چەم
چن شەو سێ نەفەر، سەرتاپا تاهیر
ڕوو بە ڕوو سەریح، وە من بین زاهیر
بە دیققەت، نەزەر، وە من کەردشان
وە ڕووی پېشانیم ئەنگوشت دەردشان
واتشان؛ وېشەن، بەڵام چوون سیاوان
واڎەی زهوورش، هېمای نەیاوان
من جەی سێ شەخسە، خەوفم حاسڵەن
هەر شەو تا بە ڕۊ، وەسوەسەی دڵەن
ئەبوتالیب وات: خەوف بەرکەر نە دڵ
ئانە خەیاڵەن، زوو مەبۊ باتڵ
خەتەرەی خەیاڵ، پەی گرد کەس بییەن
ئەو نەوعە ئوموور، گرد کەسێ دییەن
تا سێ شەو ویەرد، دیسان، هەم جە نۊ
حەزرەت، ، وات: ئەی عەم، مەعلووم بۊ جە تۊ
جوملەی سێ شەخسە، ئەم شەو یەک نەفەر
زاهیر بیی وە من، چوون شەمسی قەمەر
جە ناگا دەس بەرد، پەرێ دەروونم
نەکەرد جەراحەت، نەڕېزا، هوونم
بەڵکە جەو زەحمەت، ڕاحەت، یاوا پېم
حەقیقەت، خەیلێ حەیران بیم جە وېم
ئەبوتالیب دڵ کەرد پەڕ ئەندېش
دووربا، ئاسیبێ، نەیاوابۊ پېش
بەردش، پەی دەفعی خەتەرەی خەیاڵ
وەلای تەبیب دانای پەڕ کەماڵ
هەنی دەردی دڵ، تەمام، واتم پېت
مڎەونەش، بە تۊ، تۊ بە خوڎای وېت
تەبیب دیا، پەی جیسمی لەتیفش
کەرد مولاحەزە، نەفسی شەریفش
ئەعزای موبارەک، حەزرەت، دیی بە چەم
موهری نبوەت، نیشانەی خاتەم
وات: ئەبوتالیب ئەی فەرزەندی تۊ
بەخت ئەرجومەند، هەمایۊنی تۊ
بڵندەن، بەڵام، نەیاوان، هاڵا
پارچە ئەقدەسش، بڕیان وە باڵا
جە عەیب و عیللەت، مەبڕڕا پاکەن
خوڎا جە فریشتان، هەرهەفت ئەفلاکەن
جە ئاسیب جڼی و شەیاتین دوورەن
جن، کەی قودرەتش، وە شوعلەی نوورەن
ئەو ئەشخاسانە، ئەو دییەن جە شەو
گرد مەلایەکان، مەیان، وە لای ئەو
پەی ئاگاداریی، وەقتی زەروورەت
تەفتیش مەکەران، پەرێ نبووەت
ئەگەر یەهوودان، بزانان خەبەر
شمشېر، پەی قەتڵش مەبینان کەمەر
تا، ئەبوتالیب، دارای زەمانە
حەزرەت بەردەوە، وە دەوڵەت خانە.[1]