باخچێوە بېگەرد
ئاماڎەکەردەی: ئەسعەد ڕەشید
بەشەی سەڎ و وېس و چوارەمە
چی بەشەنە باس چانەیە مەکەرۊن کە تەمەنو محەمەڎی یاوان بە (سی و پەنج) ساڵې، نیشانەکۍ پېخامئاوەریش وەرە وەرە چەنە بەرکۆتېنۍ، ئەچی ساڵېنە، فاتیمەی کناچېش ئامێنە دنیا.
حەزرەت جەو دما، جە مەککە ئاوا
عومری شەریفش، وە سی و پەنج یاوا
چنێ، وەقایعات، چن مەملەکەی سەخت
ڕوودا، یەکا یەک، بە وەقت و بېوەقت
زاتی بۍ زەواڵ، تاک و تەنیای فەرد
جە شەڕی دوژمن، موحافەزەش کەرد
جە بەعزی کوتوب، سەیر، مەستوورەن
جە لای ڕاویان، وەیتەور، مەشهوورەن
فاتیمەی زەهرا، حەقق ڕازی بۊ لېش
جەو ساڵ، پېڎا بیی، جە لای قەوم و خوېش
تا عومری حەزرەت، یاوا، بە سی و هەشت
تەنها، جە سەحرا، مەکەردش، گوڵگەشت
مەیاوا، بە سەمع، شەریفش هەرسات
بە ئاوازی بەرز، کەڕات و مەرات
شەجەر و حەجەر، نەباتات، یەکسەر
سەلام، مەکەردەن، گرد، بەپېغەمبەر
ڕوشنی عەجیب هەم مەدیش وە چەم
خەوف، مەبەرد، وە دڵ، چەم منیا وە هەم
بەڵ، بە ئەسېح، ئەسڵی حیکایەت
وەیتەورە، ڕاوی، کەردەن ڕیوایەت
قەریب، بە بەعسەت، ئامای ڕۊحانی
نزیک بیی، نزوول، وەحی ڕەببانی
تەشریف حەزرەت، نە تۊی ئەندەروون
هەر وەقت، پەی کارێ، مەشیی وە بەیروون
شەجەر و حەجەر، یەکسەر وە لەبەیک
مەوات: یا ڕەسوول، سەلام و عەلەیک
وە هەرجا، حەزرەت، تەشریف مەبەردش
هەر ئەشیا، پەی وېش، سەلام مەکەردش
حەزرەت، جە ئاواز، جە دەنگ و بۍ دەنگ
حەیران، مەندە بۍ، جە لای دار و سەنگ
یەمین و یەسار نیگاه مەکەردش
کەس نەبۍ، چوون خەوف نە دڵ مەبەردش
جەودما، وە حوکمی شای لا تەناهی
ئاساری ئەنوار، لوتفی ئیلاهی
زاتی عەقیدەش، وە حەقق کەرد حاسڵ
جای سیراجەی دڵ، حەزرەت گرد مەنزڵ
سەفحەی زەمیرش، بغەیر، جە ئەڵڵا
خاڵی بۍ تەمام، جە ماسیوەڵڵا
مەیلی حەقق، بەو تەور، جە دڵ نەقشش بەست
جە گرد ئوموورات، غەیرە، کېشا دەست
قەتع، کەرد، نە دڵ، مەیلی عەلایق
لا بەرد ئیختیلاف، چەنی خەلایق
مەرتەبەی عیشقش، بەو جاگە یاوا
هەر شەو، تا سوب و، سوب تا خورئاوا
یاڎش، هەر هەوای یاڎی خوڎا بۍ
کەی خوڎا، جە ئەو، یاڎش جیا بۍ
مەواتەن، عەرەب، گومڕای دەروون ڕەق
نەدین محەمەد، عاشق بۊ بە حەقق
چوون مەبۊ، کەسێ، دڵ پەسەندیدە
عاشق بۊ، وەیاڎ، خوڎای نادیدە
تەسویری خەیاڵ، نەفسانی، نە دڵ
وە ئاوی ئەغماز، شتش وېنەی گوڵ
تەشریف بەرد، پەی بەیت، کەعبەی موعەززەم
مەکەردش، تەواف، بارەگای حەرەم
مەنزڵ، جە کۊی بەرز حەڕا، دا قەرار
شەوان، تا بە ڕۊ، ڕوان، تا ئێوار
بە قاعیدە، قەعر، تەوەجوه کەردش
وەیتەور، زیافەت، داییم مەبەردش
ڕای عبوودیەت، وەیتەور، گرت نە وەر
مەحکەم بیی، بە حوکم، دەهەندەی، داوەر
گاهێ، پەی کاری شای گەردوون بۍ گەرد
تەشریف. وە حوجرەی، خەدیجە مەوەرد
هەر جە کۊی حەڕا، مەعبەدگای جاران
ئەوقات، سەرف مەکەرد، جە ڕۊزگاران.[1]